تاج جالى على الباب

قبل بس ما اخش فى موضوع انهاردة بعتذر عن فترة غيابى بس بجد كانت ظروف وكانت حالتى النفسية مش مستقرة ومازالت صراحة

نخش بقى فى الموضوع



استيقظت مبكرا على صوت مزعج فقد كان جرس الباب يدق فنهضت من نومى مسرعة لافتح الباب ولكنى لم اجد احدا فتعجبت !!!ولكن لم البث بضع ثوانى حتى وقع نظرى على الارض لاجد تاج غاية فى الروعة والجمال موجود امام الباب فاخذته بين يدى وفوجئت بوجود كارت ملحق به مكتوب عليه (اهداء من عايش ولكن صاحب مدونة عجبى ولكن لكى تحصلى على هذا التاج عليكى باجابة هذه الاسئلة وكانت الاسئلة كالتالى )

أذكر ستة أسرار قد لا يكتشفها من يقابلك لأول مره!!!؟

انا بس عايزة اقول ان ممكن اول لقاء ده انا بقى واخدة حالة من الهدوء وببقى قليلة الكلام لحد ما اكتشف الشخصية اللى قدامى وبعد كدة يعرفونى على حقيقتى

وبما انى بجد مبعرفش اكلم عن نفسى هقول اللى الناس بتقوله

علشان مفيش حد من اللى بالى بالك يقول عليا مغرورة ههههههههه
هقول اهو

ودودة واجتماعية وساعات بكون انطوائية ومش قادرة اندمج مع الوضع

بحس باللى قدامى قوى حتى لو مش قدامى لدرجة هو ممكن يتفاجئى منين جالى الاحساس ده

دمى خفيف وبحب الهزار وساعات ببقى مش عايزة اضحك وفقرية

لماحة وذكية وباخد بالى من حاجات الناس مبتاخدش بالها منها او اخد بالى من حاجات اللى قدامى ميتوقعشى انى اخد بالى منها اصلا

عصبية وساعات بتوتر على اتفه الاسباب

لمضة وشعنونة ومبسبش حقى الا بمزاجى مزاج غبى بعيد عنكم

حساسة وممكن حد يزعلنى من غير ما يقصد

رغاية بس المهم الكلام يكون عاجبنى كدة وليه لزمة

بحب المنطقية فى الكلام يعنى احب اقتنع مش اللى هو بقى نظام متعمليش كدة وخلاص

من النوع اللى بيهتم بمشاكل الناس لدرجة انى بحس انها مشكلتى وممكن اوصل لدرجة انى افكر فيها اكتر من مشاكلى وساعات بعيط


كفاية كدة بدل ماتقولوا عليا مجنونة:))

سبع حاجات نفسك تعملهم!!!

نفسى اعمل حج وعمرة

نفسى اشوف الرسول فى المنام

نفسى احفظ القراءن

نفسى ابقى حد جامد جدا فى اى مجال هكون فيه

نفسى ارجع زى زماااااان (وطبعا زمان يحتوى كثير من الحاجات اللى بتمناها دلوقتى )

نفسى اشترى العربية اللى بحبها

نفسى اسافر الهند ولبنان

سامعة حد بيقول اشمعنى ؟؟

هسيبها لخيالكم الخصب بقى :)

سبع حاجات معرفتش تعملهم!!!

معرفتش اجيب امتياز

معرفتش اذاكر من اول السنة

معرفتش ابطل انى اهتم بالناس واتاثر بمشاكلهم اوى لدرجة البكاء

معرفتش اخاصم حد حتى لو غلط فيا

معرفتش احفظ القراءن :(

معرفتش اكتب السى فى اول مرة برافكتو حتى اسالوا 00000ولا بلاش :)

سبع حاجات دايما بتقولهم !!!؟

بصى يابنتى \بص يابنى

انطق اقر اعترف

اساسا

اصلا

بجد

اى خودعة

طويب

سبع مشكلات فى حياتك ممكن تحليهم بالفلوس!!!

كل حاجة ممكن تتحل بالفلوس الا اكتساب حب الناس والقرب من ربنا

سبع أماكن بتحبها!!!

اوضتى وخاصة قدام الكمبيوتر

كليتى بحبها جدا

البحر بعشقه

البالكونة بهواها

اى مكان فيه خضرة بيجذبنى

بيت العيلة يوم مانجمع فيه كلنا

نادى كليتنا علشان على النيل

سبع أشخاص بحبهم غير بابا وماما واخواتى!!!

نورى

نودة

نونا

هند

باختصار كل اصحابى

قرايبى كلهم

المدونين كلهم بجد والله بحس انكم قريبين اوى منى بدون ذكر اسماء علشان محدش يزعل

سبع حاجات بتحبهم قوى!!!

المناظر الطبيعية

اسرة سمارت فيت

النت

الصور العائلية

مدونتى

مدونتاكم

المصاصة هههههههههه اللى بالكريز



سبع مدونات بتحب تقرالهم!!!

احم احم ايه السؤال الحليوة ده

طب انا هقول اهو

واوعوا اوعوا حد يزعل انى نسيته

لالالالالالالالالا بجد انا فكرت لاقيت السؤال ده مينفعشى ده سؤال قاسى جدا

7 ايه دووووول كتير

كل اللى موجودين فى الليستة دول بحب اقرالهم تمرر الواجب/التاج لمين؟
بلاش سفروتة لحسن تعيط

وبلاش علاء علشان هو اللى بعتهولى

وبلاش انجى وحسن حنفى واروجانيل هارت علشان خدوه من علاء

ننتقم من الاخرين كلهم

يلا نبتدى

تامر الحسينى القاتل المحترف

Blue wave

حبيب

عبد الهادى _سارة

Mregypt

رومنسى
انا ودماغى

Some times

كيارا

مجنوووووووووون

صباح الصباح

اختكم فى الله

ليكوريكا

نهر الحب

سندس

روزى

البنت الشقية

عمرو وجيه

واى حد عايز يجاوب على التاج

لان فى ناس مبتحبش التيجان

وكل سنة وانتم طيبين رمضان خلاص والعيد جاى وعيد سعيد عليكم كلكم

ومتنسووووووووش تدونى العدية وتكون فلوس جديدة :))

تحياتى

ايمى

ياليته كان 000000!!!

جلست على مقعد فى حديقة جميلة تمتلى بالاشجار القوية شديدة الخضرة تستظل تحتها

وترى امامها الورود فى الونها المتنوعة الاحمر والاصفر والابيض والبنفسجى ثم قطفت وردة حمراء

وبينما هى جالسة تنصت لاصوات الطيور وهى تغرد بصوتها الصافى العذب الذى يطرب الآذان اذا بفراشة تطير امامها قمة فى الروعة ملونة بالوان خلابة

فاخدت تتبعها بنظراتها التأملية الرقيقة ووجدت نفسها دون ان تشعر اصبحت كالطفلة تجرى وراء الفراشة الملونة لا تقصد امساكها وانما تقصد ان تظل تراها بالوانها المتناسقة التى تريح عينيها واخذت تجرى وراءها

وبينما هى تجرى بين الاشجار وراء الفراشة الجميلة سقطت على الارض فوجدت يد تمتد اليها لكى تساعدها على النهوض

فتمسكت بها ونهضت فرأت ذلك الوجه الذي كان يزورها في احلامها من قبل انه هو؟؟ حقا انه هو !!! وبدون ان تشعر امتلأ وجهها بالحمرة

واذا به يسرح فى وجهها ويقول يالها من رقيقة جميلة تحب الطبيعة وتعشق الهدوء انها حقا الفتاة التى لبثت طويلا احلم بها

ولكنها لملمت نفسها سريعا وقطعت خياله وقالت له :شكرا لك ومدت يدها له واعطته الوردة الحمراء التى ظلت تمسكها جيدا منذ ان قطفتها

ولكن بينما يمد يده ليأخذها منها فاذا بصوت عالى

( ايه يا بنتى اصحى انتى نمتى كل ده علشان اتاخرت عليكى شوية) فاذا بها تستيقظ لتجد صديقتها التى تاخرت عليها ساعة كاملة فنظرت اليها وابتسمت فى خجل وقالت لها( لا ابدا دانا كنت بخطف حلم على السريع كدة) وضحكا ضحكة عالية

واكملا يومهما سويا ولكنها كانت تقول فى نفسها( يا ليت الحلم كان حقيقة وياليتها لم تيقظنى)

ولكن اثناء سيرهما فى الطريق كانت المفاجاءة وهى

الشخص الذى رايته فى الحلم للمرة الثانية موجود امامها وليس هذا فقط وانما اخد يقترب منهما فوجدته يسلم على صديقتها فقد كانوا زملاء فى سنوات الدراسة وعرفته على صديقتها ولكنها لم تكن المرة الاخيرة فى لقاءهما فقد تكرر اللقاء فقد اعجب بها كثيرا منذ المرة الاولى واحس بانه يعرفها منذ فترة طويلة وبعد شهرين تقدم لخطوبتها من ابيها

واصبح الحلم حقيقة :)
تمت

***********************

ملحوظة على الهامش :انا اول مرة فعلا فى حياتى اكتب قصة بس هى طقت فى دماغى كدة يارب بس تعجبكم ولو معجبتكمش فما هى الا مجرد محاولة لعمل شى جديد

ملحوظة تانية تفتكروا ده ممكن يحصل فعلا فى الحقيقة؟؟؟؟؟؟؟؟

****************

تحياتى

ايمى

يا ناس يا عسل التاج وصل

بدون مقدمات انا هخش فى الموضوع علطول ممكن توسعوا شوية علشان اخش

ها

خلاص وسعتم

يلا

ا

2

3

ايه الرخامة دى

يلا يابنتى خلصينا

طيب خلاص هبتدى اهو

كنت اهديت تاج منذ فترة للغالية عليا مش عارفة اودى جمايلها فين بس ياربى original heart وطبعا لازم تنتقم فاهدتنى بتاج جميل عسول خالص يلا هحله اهو علشان لسة فى واحد كمان :))

بدأت تدون من امتى ؟ودخلت العالم ده ازاى ؟

بدأت تدوين من يوم 16 يوليو 2008 يعنى بقالى حوالى شهر ونصف وشوية

دخلت ازاى بقى كنت طول السنة الدراسية اللى فاتت ادخل على الايميل الاقى سفروتة تبعتلى لينك مدونتها اشوف اخر بوسيت عملته ومش بس كدة كنت بقرأ الكومنتات واقلها رايى فى الاشخاص هههههه

ولما خدت الاجازة طقت فى دماغى الفكرة فجأة وكانت وقتها سفروتة بتكلمنى ولاقتها بقى شجعتنى وتمت بحمد الله عمل مدونة غلطة مطبعية وكانت الذ غلطة مطبعية فى حياتى

ايه كان انطباعك في البداية ؟

كنت حاسة ان محدش هيعرف مدونتى ولا حد هيحط كومنت حتى وكنت حاسة انى هقعد بالشهور محطش ولا بوست لكن الوضع حاليا بقى عكس كدة تماما الحمد لله مبقدرش اقعد اكتر من اسبوع محطش بوست جديد


مين اكتر واحد بتهتم بتعليقه علي بوستك الجديد ؟

اى حد الحمد لله بيحط تعليق عندى يهمنى وبرد عليه وادخل مدونته واتابعها بانتظام


ايه أهم حاجة اتعلمتها من عالم التدوين ؟

الصبر بجد انا ممكن اقعد على المدونة حوالى 3 ساعات ارد على الكومنتات واتابع اللى حطوا بوستات جديدة وادخل على مدونات الناس الجديدة لا وايه اقرى كل بوست للاخر

وبلاحظ ان المدونين بيحطوا كلهم بوستات جديدة فى مرة واحدة ادخل الاقى حوالى 8 حطوا بوستات جديدة

ايه أكتر حاجة كرهتها ؟

الناس اللى بتناقش قضايا فيها اساءة للاسلام او الناس اللى بتدخل تشتم هو ده محصليش فى مدونتى لكن فوجئت بناس فعلا فى منتهى قلة الذوق معندهمش اى حياء او احترام للشخص الاخر او الراى الاخر فى مدونات ناس كتير

حاسس ان التدوين له تأثير ؟

اكيد طبعا

لازم الانسان يستفيد من كل حاجة بيعملها ياما ميعملهاش احسن لانها هتبقى تضييع للوقت

من رايى ان زيارتى لمدونة شخص تعنى ان قدامى فكر كامل يعنى بعرف افكار مختلفة اراء مختلفة واعتقادات مختلفة

بصراحة عمرى ماكنت اعتقد ان فى ناس ممكن تشتم او تهين الاسلام او او بس بجد الواحد لما بيشوف بعينه بيكتشف انه كان ساذج لانه اعتقد ان الناس كلها محترمة

بجد اكتساب المعلومات سواء دينية سياسية تاريخية او حتى اجتماعية وعلمية

يعنى كل لما اقرى بوست لشخص انا خدت خبرته فى مجال معين

بتعرف على ناس بجد جميلة زيكم جديرة بالاحترام فعلا بعتبر كل واحد فيكم اخت او اخ ليا

تهدى التاج لمين ؟
قلتيلى بقى

اسمع منى هقلك ايه

سفروتة -تامر الحسينى -محمود العدل -كواراث -قلب مصرى -رومنسى -نهرالحب -مجنون -cold air-ليكوريكا

عاشقة الفردوس -باجوجو -همس الاحساس -DR:m -صباح الصباح -ادم

واى حد يحط عندى كومنت

وكل اللى عايز

شفتم الكرم اى خودعة نياااها

نيجى بقى يا حلوين للتاج التانى واللى جالى برضه على غفلة من المبرمج المحترف مفروض يعملوا كلكس يصفر قبل مالتاج ييجى علشان ميبقاش على غفلة

بطلى رغى وحلى

طيب اهو بس متزقيش

معرفش ايه العنف ده

خلاص اهو يلا اربطوا حزام الامان

1-أذكر 5 أحلام على الاقل تخص ماضيك وتحلم فيها بتغيير أشياء ماذا ستعدل وماذا ستترك ؟

1كنت بحلم وانا صغيرة اكون رسامة مشهورة اوى بس اكتفيت انى اخليها هواية لما كبرت

2كنت بحلم البس بالطو ابيض وابقى دكتورة والحمد لله ادينى لبسته وبقيت دكتورة

3حلمت اول مادخل الكلية امسك امينة اتحاد الكلية على اساس انى كنت فاهمة غلط طبعا وكنت فاكره صوت الطلبة وادينى بقيت فى الاتحاد وفهمت الحقيقة المرة

4حلمت ماما تجيبلى بيبى صغير وكنت بقعد اقلها ماما كلى 100 طبق رز علشان تجيبلنا نونة هههههههه واهى جابتلى وادينى حرمت اطلب بيبى تانى

5حلمت بحاجات كتير اوى حلمت ابقى محامية كدة واقعد اكلم فى المحكمة

6وحلمت ابقى مدرسة علشان اضرب العيال بالعصاية هههههههههههه كنت عدوانية شكلى

هما كتير اوى الواحد اصلا مبيبطلش يحلم

2-أذكر 5 أحلام على الأقل تخص مستقبلك ؟

1انى اكون اسرة صغيرة ويكون عندى ولد(يوسف ) وبنت (ملك) وتكون اسرة فى منتهى السعادة وتكون مبنيه على اساس الدين

2انى اكون حد جامد جدا فى مجال الاتش ار واوصل مانجر اتش ار

3انى اتعين معيدة فى الكلية ههههههههههه بقدرة قادر

4نفسى بجد جدا اكون حد قريب من ربنا اووووووووووووى

5نفسى احج واعمل عمرة

6نفسى اوى اوى اشوف الرسول فى المنام

3-أذكر شخصين على الأقل متواجدين في حياتك حاليا .. كنت تود وجودهم قبل الآن بزمن ؟

نورى (سفروتة )ونودة (دى مش مدونة دى صاحبتى )

4-أذكر شخصين على الأقل غير متواجدين في حياتك حاليا .. كنت تود وجودهم الآن أو في حياة أولادك مستقبلا ؟

الرسول صلى الله عليه وسلم

سيدنا ابوبكر

كان نفسى اوى بجد اكون معاهم

5-لمن تهدي هذا التاج ؟

ياسلام الخير كتير

اورجانيل هارت

الحكمة ضالة المؤمن

محمد الدخاخنى

عبد الهادى _سارة

كيارا

هايدى

عمروجيه

موناليزا

فارس بلا جواد

DR.A.S.BLACK

حنين

عالم حبيب

لو اى حد برضه عايز يجاوب عليه يتفضل بكل ثقة واياك يتردد

ولا اقلكم انا عارفة انكم هتترددوا

كل اللى يعدى من هنا يحله هههههههههههههه

معلش تعبتكم معايا وانا كمان تعبت والله

تحياتى

ايمى