اهلا بيكم كلكم

(غلطة مطبعية ترحب بكل زوارها الاعزاء وبتمنى ليكم قضاء وقتت ممتع ومفيد فى مدونتى المتواضعة )

روعة الايمان

روعة الايمان

جوهرة الحياة هى ذكر الله

جوهرة الحياة هى ذكر الله

الثلاثاء، 21 أكتوبر، 2008

زحمة يا دنيا زحمة ومعدشى فيكى رحمة

طبعا انا بعتذر جدا عن المشكلة اللى حصلت ان الريدر فى كل المدونات قرا ان فى بوست جديد
هو كان فى فعلا بوست انا عملته وشلته وده لانه كان بيعتمد على فيديو والفيديو مرضاش ينزل على العموم تتعوض ان شاء الله
نيجى بقى لموضوع انهاردة وهو المترووووووووووووووووووو وااااااااااااااه من سيرتك يا مترو
انا بحس انى كل يوم بشوف عجائب وغرائب وبعمل مغامرات بسبب مترو الانفاق (اللى هو بيمشى فى الانفاق ولما يحس انه حران يطلع برة النفق وكدة ):))
عارفين بقى العجائب فى ايه ؟؟؟؟
لما تشوفوا الاجسام كدة بشكل تانى يعنى المفروض ان الجسم ليه تلت ابعاد ده الطبيعى .....فى المترو بقى مش هيكفى اننا نبقى 3 ابعاد علشان كدة بنبقى مسحطين انا عن نفسى مش بلاقى نفسى وبحس ان الاورجان كلها بقت فى سلسلة ظهرى
لا والاغرب انك ممكن متلاقيش اجزاء جسمك معاك بمعنى انك ممكن يكون جسمك فى حتة ورقبتك فى حتة تانية
او مثلا تلاقيك بقيت برجل واحدة والرجل التانية ملهاش مكان عادى جدا متخافش مش هتقع مهو مفيش مكان ليك انت نسيت ولا ايه !!!
ده بالنسبة للعجائب
المغامرات بقى
ان لازم يكون فى صوات وصراخ وحاجات كدة اكشن لدرجة ان لو ملقتش حد بيصرخ بقول ايه ده فى ايه انهاردة يارب يكون خير ههههههههههه
والله بجد ناس كتير ايدها بتدخل فى الباب من كتر الزحمة وطبعا بتكون مؤلمة جدا ربنا يستر علينا
او بجد شفت الموقف ده كذا مرة ان واحنا نازلين ست كبيرة او بنت تقع وللاسف الناس مكملة نزول عادى ولا كأن فى حد واقع مفروض نشيله لو يطولوا يدوسوا عليها علشان ينزلوا ايزى جداااااااااا
او ان مثلا واحدة متلحقشى تنزلى المحطة بتاعتها وتضطر تنزل المحطة اللى بعديها وتغير الناحية التانية والحوارات دى وتتأخر ويبقى يوم جميل جدا بالنسبة لها
والله مرة كان فى بنت هى شكلها فى اولى اعدادى مثلا وللاسف معرفتشى تنزل المحطة بتاعتها لاقتها بتعيط جامد اوى رحت مسكت ايدها وطبطبت عليها وقلتلها تعالى معايا انا هنزلك واقلك تعملى ايه لاقتها بدأت تبطل عياط ومسكت ايدى جامد اوى وكأنها ياعينى لقت قشاية تتعلق فيها والله بجد انا كنت هعيط معاها
انا اتذكر اول مرة ركبت فيها المترو من حوالى 8 سنين كنت قدها كدة مكنتش لسة متعودة بقى عملوا فيا ايه :((
كنت داخلة عادى بالعرض زقونى لحد مابقيت بالجنب (يعنى لو الباب قفل هيقسمنى بالنصف علشان تتخيلوا معايا بس )زنقونى فى الباب ودخلوا هما وانا فضلت كدة لحد ماكلهم دخلوا ملقتش مكان جيت انزل شنطتى اتقطعت ااااااااه متفكرونيش والله كانت ايام
من كام اسبوع بقى كدة طبعا زى ماتفقنا كنت مسطحة وطبعا علشان ايدى مكنتش معايا نزلت لاقيت روج على هدومى وده معناه ان ايدى كانت عند بق واحدة حاطة روج ههههههههههههههههههه لا وحظى كنت لابسة ابيض والروج بينك (وايه بقى كنت عاملة شغل ياخراشى عليا وانا بالروج فى ايديا)
الفكرة بقى ان زى مانتم شايفين الموقف مبيبقاش مستحمل والله بدون مبالغة وبالرغم من كدة تلاقى ناس مش طايقة نفسها وتزعق فى اى حد بس يلمسها ولا يخبط فيها (اايه انتى بتهزرى الناس مسطحة وانتى مش طايقة حد يلمسك واتفرج بقى على الخناقات انتى بتزقى لاا انا بتزق مش بزق امسكى نفسك انا ماسكة نفسى وانتى شايفة فى مكان يعنى وخدوا بقى من الحوارات اللى الواحد حفظها دى )
طب يا جماعة احنا والله مفروض نستحمل بعض كلنا فى نفس الموقف مش انت بس اللى تعبان كلهم تعبانين زيك راعيهم علشان تلاقى اللى يراعيك لما تتعب او تتعبى بلاش زعيق بلاش زق
اعملوا زيى انا بقف ساااااااااااااااااااااااكتة خالص خالص مش علشان مش لاقية كلام علشان مش قادرة الكلام ماهم ظاغطين على الحجاب الحاجز بقى
طب بالله عليكم كل الستات اللى بتنزل دى اللى فى الشغل واالكلية والمدارس وطبعا كلنا عارفين ان نسبة البنات زادات عن نسبة الرجالة بقت
1راجل :6 بنات هل من العدل يكون فى عربيتين بس للستات ؟؟؟؟؟؟؟؟؟؟؟؟؟؟؟؟؟
طبعا فى حد هيقول مانتم من حقكم تركبوا معانا هرد اقول طب بالله عليكم ينفع فى المنظر ده ست تركب عربية رجالة طب وهتقف ازاى استحالة طبعا فاحنا كدة مضطرين لانه مينفعشى انا بيجيلى حالة من الاستغراب والاسبهلال لما بشوف بنات راكبة عربية الرجالة فى الزحمة دى وبسمعهم بيقولوا حاجة (والله عربيات الرجالة مبتبقاش زحمة كدة ومبيزقوش كدة ده الستات دول فظاع )
انا فعلا عايزة حد في الرجال اللى بتركب المترو الصبح يجاوبنى هل فعلا الزحمة بتبقى عندكم كدة ولا اخف ؟؟؟؟؟؟؟؟؟؟؟
اعتقد انها مبتبقاش كدة لان عدد العربيات بتاعت الرجال اكتر والله اعلم !!!!!!!!
يعنى اعتقد ان المشكلة واضحة ولازم نفكر فى الحلول انا من رأيى
اننا نزود عربيات المترووووو وتبقى فى حوالى عربيتين كمان للسيدات
ان المدة بين كل مترو ومترو متزدشى عن 5 دقائق علشان المحطة متلحقشى تزحم مع ان فى الخمس دقايق دى بتيجى حشود حاشدة بس اهو قضى اخف من قضى
اخر حاجة اننا نستحمل بعض فى المترو بلاش كل واحد يقول يلا نفسى
اخر اقتراح بقى انهم يخلوا يوم للشغل ويوم للكليات ويوم للمدارس ههههههههههههه اه والله هيريحوا نفسهم ويريحونا
عارفة والله انى طولت عليكم بس انا عايزة اعرف رأيكم فى الحكاية دى وعايزة اسمع الحلول من وجهة نظركم
كنتم مع معلقتكم من قلب المترو (عربية السيدات صباااااحا ):))
تحياتى
ايمى

الثلاثاء، 7 أكتوبر، 2008

البنت زى الولد ماهيش كمالة عدد

البنت زى الولد ماهيش كمالة عدد
بنسمعها كتير الجملة دى
ومش بس كدة المرأة =الرجل
وبنسمع ان الست زى الراجل فى كل حاجة وتقدر تعمل كل حاجة زيها زى الراجل بالظبط
زمانكم بتقولوا اخلصى ولخصى عايزة ايه يعنى
حاضر هقول اهو
انا بالرغم انى بنت وممكن كتير منكم يستغربوا الاانى مش مقتنعة بالكلام ده
انا شايفة زى ماكيد كلكم شايفين ان :
ربنا خلق الرجل اقوى من المرأة جسمانيا فبالتالى ده يأهله ان يقوم باعمال متقدرشى تقوم بيها المرأة
ربنا خلق المرأة الايموشين عندها عالى اوى طب بزمتكم انتم وانا اول البنات انا لوبشتغل قاضى مثلا والمتهم عيط قدامى هديله البراءة واقول جوايا ربنا يسامحه لو كان بيكدب بقى ولو مسكت نفسى ومتدتهوش البراءة هزعل انى عملت كدة وحبسته واقعد افكر بقى فى ولاده ومامته ومراته واقول ياعينى ومنمشى طول الليل
فى وظائف كتير من وجهة نظرى لاتناسب طبيعة المرأة بغض النظر ان الطبيعة دى بقت موجودة ولا لا زى مثلا :
انها تعمل قاضى وده زى ماقلت بسبب ان الايموشين عندها عالى وهيكون صعب عليها انها تتطبق العدل وطبعا كلكم عارفين ان ربنا حتى ذكر فى كتابه الكريم ان شهادة الرجل تعادل شهادة انثيين علشان لو باءت احدهما فتذكرها الاخرى
ونيجى بعد كل ده نعين المرأة قاضي ونخليها تصدر حكم (وش متعجب !!!)
ثانيا انها تشتغل جزارة وسواقة وحاجات كدة غريبة زيها زى الراجل بزمتكم لما تبصولها هتحسوا انها انثى الانثى ايه غير حياء وخجل وصوت هادى ووظيفة تلائم طبيعتها
طب لما المرأة زيها زى الرجل ليه ربنا جعل القوامة للرجل مش للانثى ؟
وبالرغم ده بدأنا ننادى بحرية المرأة فى كل حاجة طب ماحنا لازم نحترم الحرية دى ومنخلهاش تفقدنا اساسيات فينا
انا مش ضد حرية المرأة نهائى بس انا من رايى لازم الامور تتعدل شوية انا شايفة ان المرأة ممكن تكون احسن من الراجل فى تفكيرها ورايها وشخصيتها وده ممكن تعمله من خلال حاجااات كتير جدا
تبقى وزيرة سفيرة معيدة مدرسة محامية دكتورة مرشدة سياحية مضيفة ووووى ......................
يعنى اه المراءة تشتغل بس فى حدود مايناسب طبيعتها
بجد انا والله بسمع حاجات عمرى مابعرف اصدقها مطلقا زى ان البنات هما اللى بقى يعاكسوا الولاد وحاجات كتير كدة معرفشى حاسة انى بحن انى اشوف البنات كدة بتتكسف ووشها بيحمر زى ماكان بيحكولنا زمان
هى الفكرة ان للاسف لو فى صفحة ناصعة البياض بس فيها نقطة سودا الناس كلها بتركز مع النقطة السودا وتسيب بقية الصفحة البيضا وده بالظبط اللى بيحصل دلوقتى تلاقى الجمل التالية :
ياعم اسكت هو فى بنات بتتكسف دلوقتى؟؟؟ (اه فيه !!!)
قال بنات قال دى بنات مسترجلة ياعم سيبك (فى فرق بين انها بتحاول تكون جد علشان تفرض شخصيتها على اللى قدامها وانها جديرة بالاحترام ومش زيها زى البنات اللى بتشوفهم حضرتك وبين انها تبقى راجل دى حاجة تانية خالص )
فمن موقعى هنا انادى ان المرأة مش زى الرجل فى كل حاجة وانما هى مثله ويمكن احسن فى اشياء معينه وان اى مرأة كفيلة انها تكون جديرة بالاحترام بدون ان تفقد طبيعتها ولكم منى جزيل الشكر
امضاء
واحدة بتحن لايام زمان هههههههههههههههه
انا عارفة انى صدعتلكم دماغكم بس لو مكنتش اصدعلكم دماغكم انتم هصدع دماغ مين (وش مبتسم للحياة )
تحياتى
ايمى

الأربعاء، 1 أكتوبر، 2008

بوست عجبنى بجد

بسم الله الرحمن الرحيم


مقدرتش يعدى العيد من غير ماقلكم كل سنة وانتم طيبين كلكم بجد اول عيد يعدى عليا فى التدوين ونفسى يكون عيد مختلف وانا معاكم بجد بحبكم كلكم اوى وفى ناس حبتها اوى زى اخواتى واكتر واكيد هما سامعنى دلوقتى وعارفين انى اقصدهم بشكر كل حد فيكم كان ليه فضل عليا فى انه علمنى حاجة او اثر فيا من غير ما يقصد او يقصد كل حد ادانى نصيحة او نقد كل واحد حبنى من قلبه بجد


لما نزلت اصلى العيد النهاردة كنت فرحانة اوى وكنت بقول التكبيرات وانا مبسوطة وكل عيد بحس انى حد جديد بس معرفشى ليه افتكرتكم كلكم وحسيت انى حاسة بيكم وانتم بتصلوا انتم كمان


كنت عاملة البوست ده علشان فى بوست بجد عجبنى اوى هزنى جامد لدرجة انى من ساعة ما اقريته لحد دلوقتى حاسة انى فاكرة كل كلمة فيه ومش قادرة انساه بتمنى ان كلكم تقروه واكيد هتحبوه البوست ده

هو اخر بوست لمحمود العدل صاحب مدونة عالم محمود العدل

وده اللينك



اتمنى يعجبكم زى ماعجبنى


باكد تانى كل سنة وانتم كلكم طيبين ويارب تحققوا احلامكم كلها


تحياتى


ايمى