عندما يحدث يتحول

طبعا كلنا دخلنا فى مناقشات ومحاورات قبل كدة كتييييييير بس اكيد اكيد مش كلنا طلعنا منها مستفدين

بس

فى اللى استفاد انه دمه اتحرق واتعصب ......وفى اللى عرف ان الناس كلها مبتفهمشى وهو الوحيد اللى بيفهم

سبحان الله له ف

ى خلقه شئوون

مفروض اللى اعرفه عن كلمة نقاش انه حوار بيتفتح ما بين شخصين او اكتربيحاولوا يوصلوا فيه فى الاخر لفكرة او حل منطقى

لكن ده يحصل لو احنا اصلا عندنا ثقافة احترام الرأى الاخر وعارفين يعنى ايه نقاش

لكن المعظم للاسف معندهوش الثقافة دى

ويااما بيتعصب لرأيه .....يااما بيكابر يعترف ان رأى اللى بيناقشه هو الصح

ده لو رسى على كدة بس وملقتشى نفسك متعور او محدوف عليك حاجة

فى مناقشات بتبقى مهازل وبتقلب خناقات فى الآخر

وترجع تقول ياريتنى ماكنت اتناقشت من اصله

بس انت اكيد ليك دور فى النقاش ده و ممكن تدير النقاش بمنتهى النجاح وممكن تكون سبب فى فشله

وعلشان تنجح

حاول تكون هادى ......تسمع اكتر ما تكلم........ وبعدين اعرض رأيك ووجهة نظرك

طبعا اللى قدامك هيدافع عن رأيه فى الاول

لاقيته من النوع اللى بيتمسك برأيه وبيكابر وهو عارف انه غلط انسحب من النقاش لانه ساعتها هيتحول لجدال لا يجدى نفعا

يقول الإمام علي بن أبي طالب : " ما جادلت جاهلا إلا وغلبني وما جادلت عالما ًإلا غلبته"

لكن لو لاقيت اللى قدامك بدأ يسمعك ويأخد منك كمل معاه النقاش للاخرر حتى لو مش مقتنع برأيك بس على الاقل احترم النقاش ده وكان محترم فى اسلوبه ومنقاشته

يعنى اللى عايزة اقوله اننا لازم نحترم رأى الاخر حتى لو مش مقتنعين بيه ....لان مفيش رأى صواب 100% كل رأى يحتمل الصواب والخطأ وهنا يأتى دور عقلك فى موازنة الامور والسلبيات والايجابيات وتشوف الرأى ده هو اقرب للصواب ولا للخطأ

{فبشر عباد الذين يستمعون القول فيتبعون أحسنه أولئك الذين هداهم الله وأولئك هم أولو الألباب}

صدق الله العظيم [صورة الزمر: 17،18]

كن حذرا ولا تجعل نقاشك يتحول الى جحيم

تحياتى

ايمى

عذرا..عفوا ...عدنا ...اى حاجة بحرف العين

كل سنة وانتم كلكم طيبين ولوانها متاخرة اوووووووى انا عارفة.......... بس الحمد لله انى لحقت اقلها قبل ماالعيد يخلص

وعلشان احنا فى عيد ومفضلشى منه غير ساعات قليلة وعلشان تسامحونى... فاللى عايز عيدية يلحق يطلبها بسرعة بسرعة

بجد سورى كمان مرة للتأخير فى العيد والغيبة فى رمضان

وادى العيدية اهى

واللى عايز عدية غير دى يلحق يطلبها مش هكررها تانى..... اللى يتاخر ذنبه على جنبه

وده كحك العيد

تحياتى

ايمى

.

فاصل ونواصل

كل سنة وانتم طيبين ورمضان كريم عليكم كلكم

هاخد فـــــــــــــاصل من هنا ونواصــــــــــــل بعد العيد

علشان ارجع اكل الكحك معاكم

واخد العدية منكم

هتوحشونى اوى

وياريت اللى يفتكرنى يدعيلى من قلبه

تحياتى

ايمى

لحظاااااات

يتأرجح الانسان دائما بين لحظات تحمل الكثير من التناقضات فحينا يشعر بحزن عميق وحينا اخر يشعر بسعادة تغمره حتى انه احيانا يصل الى درجة يشعر فيها انه طائر من السعادة ويشعر ان الابتسامة اصبحت جزء من وجهه لا تفارقه

وبالرغم من هذا لا يتذكر الانسان دائما الا كل ماهو حزين وينسى او يتناسى لحظات السعادة ويعتبرها قليلة فى عمره
ونجد البعض يردد (حياتى كلها حزن وغم )(انا مش عايزة اعيش )(ياااااه الناس بقت وحشة اوى )(الدنيا غدارة )(مبقاش فى صحاب )
بالرغم ان لحظات السعادة اكثر بكثير ولكننا دوما لا نستطيع ان ننسى احزاننا ونجعلها دائما تترك بصمة فى قلوبنا
لماذا لا نتغلب على احزاننا دوما بتذكر لحظات سعادتنا

دعونا نسترجع سويا كم شعر كلا منا بلحظات سعادة

الم تبكى يوما من خشوعك وانت بين يدى الله ثم تشعر بعدها بانك قمة فى السعادة .

الم تساعد يوما شخص ما احتاج اليك ثم شكرك وكنت سعيدا بقضاء حاجته ووضعت رأسك على وسادتك وانت تشعر بكامل سعادتك .

الم تجلس يوما مع اسرتك تضحكون وتتجادلون ثم شعرت كم انت سعيد وسطهم وحمدت الله بأن رزقك خير انيس لك .

الم تجلس يوما الى اصدقاءك لتتسامروا وتضحكون وتحثون بعضكم البعض على طاعة الله

الم ترى المناظر البديعة التى خلقها الله لنا بجلوسك على البحر او بمرورك من على شاطىء النيل او بالنظر الى السماء او القمر ليلا .

الم تشعر بان الله رزقك حبيب حبيبة او زوجة زوج تجدهم دائما الى جانبك يلطفون عليك متاعب الحياة ومشقتها .

الم تحقق يوما ما حلم لك او شعرت بانك تقترب من احلامك يوما بعد يوم

الم ترى ابتسامة طفل جعلتك اسعد شخص ثم تلعب معه وتجد نفسك قد نسيت الحزن الذى بداخلك وشعرت انك طفل مثله .

الم ترى يوما ما نتيجتك مكتوب بها ناجح او تقدير مرتفع وفرحت فرحا شديدا .

الم تكن سعيد عندما انجزت عملا تحبه وحققته بنجاح كامل .

الم تكن سعيدا حينما شعرت بصديق لك يساندك وقت حاجتك اليه .

الم تشعر بكل هذه الاحاسيس يوما ما ومنها ما يتكرر يوميا

عليك دائما ان تتذكر كم من مرات وهبك الله النعم التى تجعلك دائما سعيد وعليك ان تجعلها تترك بصمتها فى قلبك وتجعل الحزن ماهو الا حادث عابر تتعظ منه او تزداد قوة وحكمة
وعليك ان تكن موقنا بان الله يأتى دائما بكل ماهو خير لك .

تحياتى

ايمى

حيث اجتمعنا

المفروض انى كنت محضرة بوست تانى بس بصراحة مقدرشى افوت لقاء النهاردة من غير مااصدعلكم دماغكم كالعادة

النهاردة حيث اجتمعنا فى الازهر بارك فى لقاء للمدونين

بجد كااااان يوم ممتع جداااااا وبصراحة اتعرفت على ناس كتير محالفنيش الحظ انى اتعرف عليهم قبل كدة او ادخل مدونتهم بس فعلا ناس راقية ومحترمة اوى وياريتنى كنت عرفتهم من زمان

رحت فى الميعاد لاقيت :

ستيتة بجد حد راقى اوى وهادى جدا وعقلية جميلة وبتقدر تفكير الشباب اوى وكفاية انها ادتنا فرصة جميلة للقاء ده

وفاتيما حسيت فيها بحنان جميل اوى وبجد حد عواطفه رقيقة وانا اعتبرتها اختى الكبيرة لو هى تسمح يعنى واهم حاجة انها جبتلنا بسكويت ههههههههههههه

وكان موجود مصطفى صاحب مدونة مش عارف حد طيب وتلقائى وفضل معانا للاخر

ومحمد غالية حد محترم اوى وصاحب فكر يحترم وكفاية دعوته الدائمة للسعادة والتفاؤل ربنا يكرمه وكان معاه اخته كمان

وبعددين بقية الناس بدأت تيجى

هند صاحبة مدونة دموع الملائكة بالفرنساوى ههههههههه

ورنيم صاحبة مدونة المبتسمة دائما اللى خلتنى اكتبلها اوتجراف ومتقدرشى تنكر p:

واختهم الكبيرة كانت معاهم

وجه عموو فشكوووووووول صاحب الاراء المختلفة دائما تحت شعار نحن نختلف عن الاخرين :)

ربنا يخليك ياعمو فشكول ويديك طولة العمر

ومسدس صغير بس هو طلع مسدس طويل p:

واينوووو صاحبة مدونة رقة الاحساس اللى دايما اقلها اسم على مسمى

وجت كيكى وفتاة حالمة وكان معاهم شنطة ومش هسيح واقول فيها اكل وكدة ولا هقول اى حاجة D:

وجه احمد ابو العلاااااااا وياسر صاحب مدونة ومضات

وبعدين بقى دخلنا قعدنا جوة فى مكان كان ضلة وجميل بغض النظر عن الناس اللى اتحرقت من الشمس هما عارفين نفسهم

وشوية جوم

ميمايا وعادل ورامز عباس وخالد فودة وهانى صاحب مدونة نط فى الكوز وبدراوى

وبعدين جه مصطفى حسان اقلنا شعر من كتابه الجديد

وانفض اللقاء الساعة 3 تقريبا ودعوة للانصراف

كل الناس مشيت تقريبا وفضل انا واخت محمد ومحمد ومصطفى وابووووووووعلى اتصل وقال انه جاى

بجد كان نفسى اشوفه جداااا لانه شخص انا بحترم فكره جدا ودعوته للتغيير وقعدنا نتكلم تقريبا لحد 6 ونص

وميرسى يا ابو على على التوصيلة دى كلك جدعنة وذوق طول عمرك

وكريم مش زى ناس صحابنا اكيد عارفهم ياابو على وهما عارفين نفسهم p:

كان نفسى اشوف ناس كتير المفروض انها كانت جاية بس قدر الله وماشاء فعل

يارب اليوم ده يتكرر تانى

كنت سعيدة جدا بلقائكم

ومع تحياتى

مراسلتكم من وراء شاشة الكمبيوتر

ايمى

بنتى ضنااايااااا

بنتى ضنايا كملت اول سنة ليها

وطبعا انتم عارفين ان البكرى دايما ليه معزة خاصة فلازم اعمل احتفال يليق بمقام بنتى

كل سنة وانتى طيبة يا حبيبتى

كل سنة وانتى طيبة يا مدونتى

محدش يستغرب انى بقلها بنتى لانها اتولدت قصاد عينى وعلى ايدى وفضلت تكبر معايا لحظة بلحظة وكنت بزوقها بايدى

بزمتكم تبقى بنتى ولا مش بنتى ؟؟!!

.

.

مش عارفة اقول ايه بجد والله بس كانت من اروع التجارب بالنسبة لى فعلا لاقيت ناس بتحبنى بجد وعرفت ناس بقوا خلاص متمركزين فى الناحية الشمال عندى (قلبى يعنى للى ثقافته عنجليزىD: )

بشكر سفروتة شكر خاص لانها كانت سبب فى دخولى عالم التدوين طبعا هتدعوا عليها انا عارفة ههههههههههههههه
اوعوا اوعوا حد يدعى على سفروتى هى اه كانت سبب فى ان واحدة غلسة ومصدعالكم دماغكم دايما تدخل عالم التدوين بس مهما يكن برضه سفروتة دى بنتى يعنى اخت مدونتى p:

.

.

بشكر كل واحد فيكم كان بيعتبرنى زى اخته او بنته بجد .......بشكر كل حد فيكم رفع من روحى المعدنية فى وقت كنت محتاجة فيه كلمة طيبة وابتسامة من القلب .....بشكر كل حد فيكم ادانى نصيحة بجد وكان نقده بناء وغير جوايا حاجة

بشكر كل واحد فيكم كان قلمه بيدعوا للحق ومبيخافشى من حاجة مهما كانت ........بشكر كل واحد كتب فى مدونته حاجة لمستنى او زودتلى معلوماتى

بجد والله بحبكم اوووووووووووى ومهما قلت مش هعرف اعبر

.

.

وفى ناس كتير غابت عن التدوين بس بجد مينفعشى انساهم وهفضل فاكراهم واتمنى لحظة رجوعهم تانى

واخيرا بعتذر عن اى حاجة عملتها ممكن تكون ضايقت حد فيكم وبعتذر عن عدم متابعتى لمدوناتكم الفترة الاخيرة
بس انا عارفة انكم شايلينلى معزة كبيرة او حتى خروف وهتسامحونى D:

************

يلا ده مش وقت الكلام ده وقت الطعام كلوا نونو نونو علشان بنتى متتخضش ههههههههههه

كل سنة وكلكم طيبين وبخير وسعادة وحب

.

.

تحياتى

ايمى

مهازل مرئية

بسم الله الرحمن الرحيم

((ان الله لا يغير ما بقوم حتى يغيروا ما بانفسهم ))
كلنا عارفين كويس ان فى مهازل كتير اوى بتحصل فى حياتنا.......ناس بتبيع ضميرها ,ناس بتقبل رشاوى واللى يقلك اكرامية غير الكوسة وساعات بسلة علشان اللى مبيحبوش الكوسة وكدة يعنى :)

مش عارفة اقول ايه بس لما الوضع ده يبقى عينى عينك كدة وكلنا شايفينه وساكتين يبقى اكيد احنا كمان غلطانين

انا عارفة ان اللى بقوله ممكن ميكنشى مقنع بالنسبة لكتير منكم بس اللى بيخلينى اكلم ان نادر اوى لما اشوف حد بيحاول يغير الاوضاع لكن معظمنا بيتكيف مع الاوضاع وبنشوف الغلط ونقول عدى عدى... هو ده اول واحد يغلط يعنى فى غيره غلطوا قبل كدة كتير

ومش بس كدة ده المضحك كمان دلوقتى ان اللى يمشى صح يبقى حاجة من اتنين ياما شخص مثالى نادر مينفعشى يعيش فى وسطينا
ياما مجنون وبيتكلم فى حاجات خرافية

كل واحد فينا بيشوف مهازل كتير فى مهنته او فى مجال شغله عموما
حبيت اتكلم من منظور بيطرى شوية (الحنين بقى والانتماء انتم عارفين ههههههههههه)
لما الطبيب البيطرى اللى مفروض مسئول عن حماية الحيوان والمحافظة على صحة الانسان يتقاضى رشوة مقابل انه يسمح بدبح حيوان غير صالح للدبح
لما الطبيب البيطرى يبقى واقف مهزوز وخايف قدام الجزار لحسن يرفع عليه سكينة
لما نلاقى ان فى امراض بتدخلنا عن طريق اللحوم او المنتجات او الحيوانا ت والطيور المستوردة يبقى راحت فين الرقابة

يبقى راح فين ضميرنا :(

ده طبعا مبيحصلشى فى مجال الطب البيطرى لوحده لا بيحصل فى مجالات كتير

لما تلاقى عمارات بتتبنى وتانى اسبوع بتتهد علشان الغش فى مواد البناء وتوفير التكلفة

لما نلاقى الطبيب بيعمل عمليات مفهاش اى نسبة شفاء او الحالة مش محتاجها لمجرد انه ياخد فلوس

وغير ها كتير ................

كل اللى احنا وصلناله ده احنا السبب فيه لاننا بعنا ضميرنا ومفكرناش فى اخرتنا يوم ما نقابل رب اسمه الكريم

نعيب زماننا والعيب فينا......... وما لزماننا عيب سوانا

انا عارفة ان الكلام ده انتم حافظينه صم بس انا اتعودت انى اقول اللى مضايقنى وانا معاكم ومستنية اسمع رأيكم واتمنى انكم تجاوبوا على الاسئلة دى وبصراحة
*هل انت ممن يسعون للتغيير ام ممن يتكيفون مع الاوضاع ؟؟؟؟؟؟؟وياريت لو فى موقف حصلك تذكره
*ايه الحلول المنطقية للتغيير او الحد من اللى احنا فيه دلوقتى من وجهة نظرك ؟؟؟؟؟؟؟
*هل انت ممن ينظرون الى من يريدوا تغيير الاوضاع على انهم اشخاص مثاليين او مجانين ؟؟؟؟؟؟؟؟

*******************************************************************
ملحوظة
انا نجحت يا جدعااااااااااااااااااااااااان يلا بقى عايزة اسمع زغرودة حلووووووووة اوى

لولولولولولولولولولى

ومش مصدقة انى هدخل رابعة خلاص عجزت بدرى بدرى وراح زمن الشباب
عقبال امتحان التدريب علشان ابقى خلصت من السنة بتدريبها
يلا اديكم على حلاوة نجاحى نياهاهاها

تحياتى

ايمى

بحبك اوى

اسعد يوم فى حياتى لانه اليوم اللى اتولدت فيه ....... دايما بتبقى جنبى
وتخفف عنى وقت حزنى ...........ترشدنى وقت حاجتى
تفرحلى وقت فرحى .............وتخاف عليا من نسمة هوا جاية
مهما قلت ومهما عدت مش ممكن اوفى حقك يا امى
بحبك اوووووى يا مامتى و ببقى فى منتهى السعادة طول مانتى جنبى

وعنيا شايفاكى دايما قصادها
كل سنة وانت طيبة يا غالية عليا
كل سنة وانتى طيبة يا ست الكل

كل سنة وانتى طيبة يا امى

هبعتلك الحمامة شايلالك وردة وهوصيها تقلك بحبك

دى بقى التورت يا جماعة بمناسبة يوم ميلاد ست الحبايب كلوا وادعولى ان ربنا يخليهالى وتفضل دايما راضية عنى

وادى المشروبات علشان الجو الحر ده




اللهم اغفر لى ولوالدى وللمؤمنين والمؤمنات الاحياء منهم والاموات

اللهم ارضى عنى واجعلنى بارة بوالديا وارضهم عنى

اللهم امين

سيكوووووووووو

كل واحد مننا عنده مشاكل كتير بتواجه.... وساعات مبيقدرشى يتغلب عليها لوحده....وممكن تسببله تقلبات مزاجية او نفسية ....وممكن يحدث اكتئاب او يقرر الانسان انه يهرب من كل حاجة ويموت نفسه ...وممكن يقرر انه يروح لطبيب نفسى يساعده بس المعظم بيخاف يروح لطبيب نفسى خوفا من كلام الناس او ان حد يقول عليه مجنوووووون

لكن

.

.

.

فى عيادتى.....سيكووو للحيوانات .......

الحيوان بيجيلى وهو مش خايف حد يقول عليه مجنون او خايف من نظرة الناس ليه

خلتونى افتكر الحمار اللى دخل عندى العيادة وكان شكله مضطرب جداااااااا واقلى انا ..انا عندى مشكلة ومش عارف انام ولا اكل ولا اعيش حياتى بشكل طبيعى وحاسس ان كل الدنيا بتكرهنى وعااااايز امووت

قمت من مكتبى وقربت منه وقلتله اهدى ونادت المساعد بتاعى علشان يديله حقنة ريلاكسشين فور دونكى وبعدين قلتله مدد هنا على الشزلونج واقول كل اللى جواك كأنك بتكلم نفسك بالظبط

بدأ يكلم وقال :

اول ما تولدت لاقيت امى محوطانى وكانت بتعتنى بيا وبتجيبلى الاكل لحد عندى... ولما بدأت اقف على رجلى كنت بروح العب مع اصحابى الحصنة والحمير والبغال ...بس وانا بلعب معاهم جه الحصان حصونة من الشارع اللى جنبينا وضربنى ...وانا كنت ضعيف ومقدرتش اخد حقى وعلشان كدة كان كل يوم بيجى يضربنى... وللاسف كل اصحابى تخلوا عنى ومحدش وقف يدافع عنى... وعلشان كدة قررت اهرب وابعد عن صحابى واهلى.. جريت بعيد وفضلت اجرى لحد ما وصلت مكان معرفهوش كان فى حصنة وحمير كتير ولاقيت راجل بيقرب منى اوووى حاولت اهرب منه لكنه مسكنى وندى على واحد تانى واقله عندنا ضيف جديد اربطه مع زمايله لحد ما ييجى زبون يشتريه ..فضلت مربوط يومين كنت ببكى وندمان انى بعدت عن امى واصحابى ..وبعد يومين جه واحد على قد حاله لابس جلابية وطقية وكان عايز يشترى حمار واختارنى انا ...قلت الحمد لله شكله راجل طيب ..بس للاسف طلعت مغفل الراجل الطيب ده كان لازم يضربنى علشان عايزنى امشى بسرعة وكان مزود الحمولة على ظهرى لدرجة ان كان رجليا وظهرى بيوجعونى وهو مش مقدر ده حتى الاكل يا دكتورة كان يادوبك بيدينى كمية يادوبك تمسح زورى مش تشبعنى ولا تكفى جوعى

واستغليت اول فرصة فكنى فيها من العربية علشان ينظفنى وينظف العربية وراح يجيب مية وقررت انى اهرب تانى قعدت اجرى اجرى اجرى لحد ما تعبت وقفت ارتاح فى حتة ضلة وبعدين لمحت يافتة مكتوب عليها

سيكووووووووووو للحيوانات للتتخلص من جميع مشاكلك ولعلاج حالات الاكتئاب الشديد مع دكتورة ايمان

فقلت ادخل ممكن تلاقيلى حل

.

.

.

ها يا دكتوورة عندك حل

.

.

يا دكتورة

لما لاقنى مبردش قام من على الشزلونج وبص عليا لاقينى بعيط اووووووووى لدرجة انى مش قادرة ارد عليه ..راح مددنى على الشزلونج واقلى اقولى اللى انتى حاساه وكأنك بتتكلمى مع نفسك D:

.

.

0

.

طبعا ده مجرد خياااااااااااااااااال مش اكتر بس لو فعلا الحيوانات كانت بتقدر تتكلم... لكانت قالت انها فعلا بتتألم

تحياتى

ايمى

ورجعنالكم بعد الفاصل والتاج فوق راسى

ورجعنالكم بعد فاصل طويل انا عارفة انه طويل بس انا كنت بمتحن من شهر 4 ولسة مخلصة امبارح ...لا وايه عليا تدريب من يوم 21 يعنى بعد 3 ايام والحياة جميلة (وش متنرفز جدااا ) وهخلص امتحان التدريب ان شاء الله 2 8

فايييييييه بقى عايزاكم تعذرونى على الاخر لحد ما اخلص الكلية دى على خير

مش عارفة اقلكم ايييه بس بجد وحشتوووووووووووونى جدا ......واكيد انا كمان طبعا وحشتكم ولا حد عنده اعتراض (وش بيخوف )هههههههه

كنت بحاول ادخل نفسى فى الموود لان بقالى فترة معملتش بوست وحاسة الموضوع غريب مش عارفة ليه

المهم بقى ايه يابت يا ايمى ايه... اه افتكرت

لا مفتكرتش لانى اصلا منستشى كنت مستنية اخلص الامتحانات بس

ايه بقى هو اللى افتكرنه ومنستهوش ده

تاااااااااااااج من رومنسى اللى معودنى دايما على التدبيس :D....وبجد والله انا بشكره جدا انه اصلا بيفتكرنى ...وبجد بشكر كل اللى سئلوا عليا فترة غيابى

يلا ندخل فى الموضوع علطول بما ان الحياة بقت سندوتش تيك اواى ...محدش يقرا البوست ده لو جعان :P

يلا سيبكم من السندوتشات ونخلينا فى الطائرات ونطلب من سيادتكم ربط احزمة الامان حتى نستعد للانطلاق

ونبدأ مع اسئلة تاج رومنسى

..................................................
إسمك ؟
ايمو بنت بودى ههههههههه

..........

سنك ؟

19سنة
وماشية فى ال 50

........
إسم مدونتك ؟

غلطة مطبعية بعيد عنكم يعنى

.........

مجال دراستك ؟

بعد الشر عنكم برضه طالبة فى كلية الطب البيطرى

...................
صورتك الرمزية فى المدونة بتعبر عن ايه ؟
براءة وحنان الاطفال
اللى بجد مفتقداهم اوى

.............

هل فكرت فى إغلاق مدونتك؟ و السبب؟
اه بصراحة
علشان مكنتش قادرة اتابعها اوى ولا اتابع مدونتكم وخفت تزعلوا بس قلت اكتبلكم احسن بوست انى هغيب
بدل ما اقفلها ممكن لما اوحشكم تدخلوا تشقروا على المدونة :)

......................

إيه رد فعلك لو حد قل أدبه عليك فى المدونة ؟

هى الحمد لله محصلتشى معايا ان حد قل ادبه بس لو حصل
هعرف ارد عليه كويس.. وهقله ديراكت متدخلشى مدونتى تانى وهحذف اى كومنت يتحط منه
لان اللى ميحترمشى غيره هو اكيد انسان مش محترم وانا مبحبش اتعامل مع ناس مش محترمة

................
أسوأ مدونة دخلتها ؟

اول مادخلت التدوين كنت ساعات بدخل مدونات غريبة كدة ملهاش اى لزمة فى الحياة غير جرح مشاعر وديانات الاخرين

.............
هيحصل أيه للإيميل بعد ما تموت؟

هيموت معايا وهيفضل اسمى اوف لاين عند الناس
والله اعلم ممكن يشوفوا اسمى ويفتكرونى علطول بدعوة

..............
عطيت الباسوورد لحد قبل كده؟

اديته لحد لا بس ممكن اخواتى بيشوفنى وانا بكتبه فعارفينه بس استحالة يفتحوه من غير اذنى احنا متعودين مع بعض على كدة

..................

السفر بالنسبة لك؟

مجربتهوش كتير بصراحة بس بجد بحس انه تغيير جو فظيع وتنشيط للحياة المملة
وخاصة لو لمكان بتحبه مع ناس بتحبهم علشان تحس بجد بمتعة السفر

..................
المود بتاعك ايه؟

امممممممم طب ايه رأيكم كل حد فيكم يقول بيحسنى مودى ايه
بعد اذنكم طبعا

..................
بتعمل أيه في وقت فراغك؟
على حسب يعنى لو لسة خارجة من فترة امتحانات زى دلوقتى كدة بحب اتنح اوى ومعملشى اى حاجة غير انى اقعد ساكتة او انام
فى العادى بقى بحب اقعد على النت او اقرأ كتاب او ارسم او استرخااااء
................
الأكلة المفضلة؟

البيتزا
وبحب الفراخ

................
الصفات التي أخذتها عن والدك؟
الطيبة والعند والعصبية والتسامح

...................

الصفات التي أخذتها من والدتك؟
ماما دايما تقلى انتى بتفكرينى بنفسى وساعات بحس انى نسخة منها
واخدة منها حاجات كتير زى
الاتزان فى الحكم على الامور والعقلانية
الحمد لله حب الناس وان الناس بترتاحلها فى الكلام وبياخدوا برايها
عدم الثقة فى الاخرين بسهولة الا بالمواقف وبالنسبالى بعتمد على احساسى كمان فى اول لقاء
انها ذكية ولماحة
كفاية لحسن تفتكرونى مغرورة ههههههههه بس ماما دى روحى روحى روحى

......................

اكثر ست حاجات بتحبهم؟

عيلتى واصحابى كلهم
منظر الغروب
البحر والنيل
هوا الفجر

..................
اكتر ست حاجات بتكرههم؟؟

الكدب والخيانة
استغلال مشاعر الاخرين او استغلال الاخرين عامة
اللامبالاة وعدم الاهتمام بمشاعر الناس
النفاق والمصالح
الحروب والمشاكل

...................
شخصيتك نوعها أيه ؟
اممممممممم السؤال يحمل معانى كتير اوى
بس فى حاجة اتقالتلى كتير وهى
انى شخصية مركبة او فيا توليفة عجيبة كدة
وماما بتقلى ان فيا الصفة وعكسها
احب اسمع رأيكم برضه

......................
لماذا دخلت عالم التدوين من الاساس ؟
كتجربة لحاجة جديدة قلت ممكن اعرف اطلع اللى جوايا فيها او انى اكلم فى موضوع حاساها واسمع راى ناس متعرفنيش فيها واشوف الناس بتفكر ازاى

..............
أحلى جملة قيلت في وصف مدونتك؟
هو الحمد لله فى جمل كتير حلوة اتقالت
منها ...فاز كل من زار مدونتك
انهم بيحسوا بارتياح فى مدونتى
انها بتلمس حاجة جواهم وانهم بيستفيدوا
وانها جميلة
................
أهمية التعليقات بالنسبة لك؟
بحسها اهم من البوست نفسه لانها بتعرفنى انا فين وراى الناس فى اللى بكتبه ايه ومفيد ولا اى كلام ولاملهوش لزمة
...غير ان فى تعليقات كتيرة اوى بتكون دفعة ليا لحاجة معينة او شحنة كبيرة بالنسبالى

........................
احلى بوست كتبته وضع اللينك مع ذكر السبب ؟
اممممم صعب اختار اوى لان كل بوست كتبته كان بيمثلى حاجة
واجمل بوست ده اللى بيقروا هما اللى يحددوه مش اللى كتبه
يعنى الدور عليكم برضه
....................
افضل مدونة قرأتها؟

ايه السؤال اللى يزعل الناس ده
انا بحب كل المدونات اللى بدخلها وكل مدونة منهم بتعجبنى فى مدونة بتعجبنى فى موضوعتها واللى بتعجبى فى التفكير بتاع صاحبها واللى بتعجبنى فى احساسها او خفة دمها او مدى استفادتى منها
بس انا بدون زعل يعنى يعنى بحب مدونة ABO ALIلانها بتدينى طاقة وغالبا سبحان الله بيناقش موضوعات بكون لسة بكلم فيها مع حد

..............
الشغل بالنسبة لك؟

تحقيق ذات وتحمل مسئولية

..............
اهمية الانترنت بالنسبة لك؟
ليه عامل كبير اوى فى بناء شخصيتى لانى بتعامل مع ناس كتير وبشوف افكار وباخد خبرات
وفى نفس الوقت وسيلة لشغل الفراغ بالنسبة لى

..................
تمرر التاج ده لمين؟

ابوعلى

محاسن

المبرمج المحترف

ازهرى

غروب

اسماء واحلام فى وجدانى

محمد غالية

اينووو

منمن

................
تحياتى

ايمى

ممكن تقبلوا....

بجد انا مكسووووفة منكم جدا لانى مش متابعة مدونتكم بس مش عايزة حد منكم يزعل منى و قريب اوى هرجع اتابعكم تانى بس زى ما تقولوا كدة مضغوطة شوية وادعوووووووولى علشان امتحانات الميد تيرم بدأت

وياريت لو اى حد زعلان منى فى حاجة يكتبلى هو زعلان منى فى ايه بليز

مكنتش عارفة اكتب ايه مع ان الافكار فى مخى كتير بس محبوسة ياخواتى معرفشى ليه!!! افكار معندهاش دم صحيح

فقلت بقى امرى لله انقلكم قصة عجبتنى ويارب تعجبكم انتم كمان علشان مبقاش اعتذرتلكم بايدى فاضية

قصة الملك و الوزراء الثلاثة

في يوم من الأيام أستدعى الملك وزرائه الثلاثة وطلب منهم أمر غريب طلب من كل وزير أن يأخذ كيس ويذهب إلى بستان القصروأن يملئ هذا الكيس للملك من مختلف طيبات الثمار والزروع كما طلب منهم أن لا يستعينوا بأحد في هذه المهمة و أن لا يسندوها إلى أحد أخرأستغرب الوزراء من طلب الملك و أخذ كل واحد منهم كيسة وأنطلق إلى البستان

فأما الوزير الأول فقد حرص على أن يرضي الملك فجمع من كل الثمرات من أفضل وأجود المحصول وكان يتخير الطيب والجيد من الثمار حتى ملئ الكيس

أما الوزير الثاني فقد كان مقتنع بأن الملك لا يريد الثمار ولا يحتاجها لنفسة وأنة لن يتفحص الثمار فقام بجمع الثمار بكسل و أهمال فلم يتحرى الطيب من الفاسد حتى ملئ الكيس بالثمار كيف ما اتفق.

أما الوزير الثالث فلم يعتقد أن الملك يسوف يهتم بمحتوى الكيس اصلا فملئ الكيس با الحشائش والأعشاب وأوراق الأشجار.

وفي اليوم التالي أمر الملك أن يؤتى بالوزراء الثلاثة مع الأكياس التي جمعوهافلما أجتمع الوزراء بالملك أمر الملك الجنود بأن يأخذوا الوزراء الثلاثة ويسجنوهم على حدة كل واحد منهم مع الكيس الذي معة لمدة ثلاثة أشهرفي سجن بعيد لا يصل أليهم فية أحد كان, وأن يمنع عنهم الأكل والشراب

فاما الوزير الأول فظل يأكل من طيبات الثمار التي جمعها حتى أنقضت الأشهر الثلاثة

وأما الوزير الثاني فقد عاش الشهور الثلاثة في ضيق وقلة حيلة معتمدا على ماصلح فقط من الثمار التي جمعها

أما الوزير الثالث فقد مات جوع قبل أن ينقضي الشهر الأول.

وهكذا أسأل نفسك من أي نوع أنت فأنت الأن في بستان الدنيا لك حريةأن تجمع من الأعمال الطيبة أو الأعمال الخبيثة ولكن غدا عندما يأمر ملك الملوك أن تسجن في قبرك- ولله تعالى المثل الأعلى- في ذلك السجن الضيق المظلم لوحدك , ماذا تعتقد سوف ينفعك غير طيبات الأعمال التي جمعتهافي حياتك الدنيا

لنقف الآن مع انفسنا ونقرر ماذا سنفعل غداً في سجننا

هااااااااااااااا ممكن بقى تقبلوا اعتذارى؟؟؟؟؟

تحياتى

ايمى

سؤال للسادة المشاهدين

وجدت نفسها وحيدة بين جدران غرفتها فقامت بفتور وقلة فى الهمة لتذهب الى المرآة حيث اخذت تنظر الى نفسها فترة طويلة حتى انها لم تشعر بنفسها الا بعد ان وجدت يدها تتحرك لتمسح دموعها التى اخذت تنهمر من عينيها بالرغم من مقاومتها الشديدة للبكاء !!

فقد لاحظت تغير شديد فى ملامحها فقد اصبحت بائسة حزينة ساكنة بعد ان كانت الابتسامة لا تفارق وجهها حتى انها كانت تجبر كل من ينظر اليها ان يبتسم رغما عنه

تركت المرآة وعادت لترقد على سريرها واضعة يدها تحت رأسها واخذت تفكر طويلا واخذت تسأل نفسها

كيف تغيرت احوالها الى هذه الدرجة ؟؟!!!بل وكيف يستيقظ الانسان ليجد نفسه شخصا اخر لا يعرفه ولا يتقن فن التعامل معه ؟؟؟!!

انها تحاول ان تجد سبب الحزن الذى يكمن بداخلها ولكنها عجزت ان تعرف السبب بل والادعى للعجب انها تشعر وكانها لا تمر باى مشكلة !!

ولكن عندما اخذت تتعمق فى التفكير وجدت نفسها تحمل الكثير من المشاعر المتناقضة لا تعرف لماذا وكيف فهى تشعر بانها تحب الناس لدرجة لا يتخيلها احد ولكنها لا تشعر بالامان والثقة بينهم !!!

لا تود الابتعاد عن من تكن لهم كل هذه المحبة ولكن فكرة البعد عن كل شىء تسيطر على تفكيرها !!!

ماذا تفعل وهى تبحث عن نفسها التى فقدتها فتشعر احيانا بانها وجدتها ولكن لم تلبث حتى تهرب منها سريعا عند تعرضها لموقف كانت تستطيع مواجهته قبل ذلك ولكنها الان لا تستطيع .....

فهل ستظل تبحث عنها كثيرا ؟؟؟وهل ستجدها يوما ما ام انها ذهبت عنها بلا رجعة ؟؟؟؟؟؟

سأترك الاجابة لكم انتم

تحياتى

ايمى

لقااااااء المدونين

بجد والله طقت فى دماغى فجاءة وقررت انى ارووووح لقاء المدونين .....وقلت لازم لما اتجنن اخد الغلبانة معايااااااااااااااا

اتصلت بسفروتة اطلعى يابنتى من المحاضرة حالا لاقتها بتقلى ايييه ليه!!!!!!

قلتلها هاتى حاجاتك بسرعة واطلعى وابقى افهمك بعداااان مفيش وقت لاقتها فعلا ياعينى جابت حاجاتها وطلعتلى هنروح فين قلتلها لقاء المدونين قالتلى لقاء ايه قلتلها لقاء عاملينه طب مين رايح ؟؟؟؟قلتلها علمى علمك هنروح ونخوض التجربة :D

وفعلااااااااا رحنا تهنا على وصف الانسة كيااااااااااارا مطلعشى فى حاجة اسمها شيراتون الجزيرة اصلا ههههههههه ماعلينا وطبعا بما اننا فى مصر فاللى بيسأل بيتوه اكتر

بس بعد عذاب عرفنا نوصل للمكان المطلوب دخلنا كنا من اوائل الناس اللى وصلوا رحنا طبعا منعرفشى حد فضلنا قاعدين نرغى انا وسفروتى بجد البنت دى بتستحملنى كتير ربنا يخليكى ليا يارب

شوية اتعرفنا على eno صاحبة مدونة رقة الاحساس بجد حد هادى جداااااا ووشها من النوع اللى ترتاحله اول ماتشوفه فعلا اسم مدونتها على مسمى

بدأت الحفلة واقعدوا يكلموا حول اصدار كتاب انا انثى واحنا منعرفشى حد برضه لاقيت اينو بتقلى تعالى ندور على كيااااااااااااارا قلتلها يلا كل لما نشوف حد نسألها انتى كياارا متطلعشى هيا ونتعرف على ناس اكتر

وبالصدفة وانا بدور على كيارا

اتعرفت على البنت الشقية صاحبة مدونة حواديت بنات محتارة وحسن حنفى

شوية رجعنا تانى قعدنا على الكرسى وكان فى واحد شكله شبه صورة محمد غالية

المهم فعلااااااا طلع هو بجد حد محترم اوى وهادى جدا لسة بقله انا ايمى بيبى

لاقيييت واحدة بتقول لواحدة الحقى ايمى بيبى اللى كنتى بتدورى عليها

طلعت مييين بقى طلعت اوريجينال هارت بجد والله فرحت جدااااااا لما شفتها لانى كان نفسى اشوفها من زمااااااان وبجد والله اكتشفت ان فى تشابه غريب جدااا مابينا وفعلا ولا كأننا نعرف بعض من زمان وطلعنا ساكنين قريب من بعض جداااااا وطلعنا كمان من بلد واحدة

شوية جه مجنووون اتعرف علينا بجد هو حد عااااقل جدا وكان بيتناقش بجدية وبكل احترام ومتحمس جدااااا للرجالة بس على مين البنات تغلب برضه :P

ولاقيت واحد بيقلى انا اللى كتبتلك انك قد ابنى الوسطااانى!!!! اوووووه انت ازهرى ايون انا ازهرى: زى ماهو فعلا على التدوين بيحب الضحك والهزار

وشفت كواراث وبطوط حبوب

الكااااااااااااااارثة بقى انى عرفت ان كياااااارا جت ومشيت قبل مااعرف انها هى وكذلك كيكى

بس لحظنا الجميل قابلنا كيكى فى محطة المترووووووو فعلاااااا بتحب الضحك والهزار جدا وفريندلى اووى

وعرفنا منها ان شفقة هانم ودكتور عمرو فاروق كانوا فى اللقاء واحنا منعرفش

بس بجد كان يوم جميل جدااا وكانت تجربة جديدة بالنسبة لى

وياااااريت بعد كدة فى لقاءات المدونين نمسك يفت عليها اسماءنا ومدونتنا بدل ما احنا فاتنا التعرف على ناس كان نفسنا نشوفهم فعلااااا :(

والى لقاااااااااااء اخر علشان انا هموت من التعب

تحياتى

ايمى

اسمى مكتوب !!!!!!

ولا بيااااااااااااااااا ولا عليااااااااااااااااااااا دخلت مدونة رومنسى بعد غياب بسبب الامتحانات ولاقيت اجاباته على اسئلة قلت حلوووووو اقرا بقى لحد ما وصلت تهدى التاج لمين؟؟؟؟؟؟؟؟؟

تا تا تا طرخ طرخ لا مش بضرب حد ده اثر الصدمة لما لاقيت اسمى مكتوب !!!!!

حتى عادل امام جه يقلى اسمى مكتوب؟؟؟؟ قلتله لااااااااااا اقلى طويب :D

طبعا انا فى سرى بحقد عليه لان اسمه مش مكتوب

المهم بقى انه فعلا تاج دسم (محدش يجوووع دى مش وجبة يا جدعان ده تاج يعنى بلاش طمع )

يلا بقى يا ايمى وبلاش لوك لوك كتيييييييييييير وخشى فى المفيد

اوك يلا

....

...

..

.

لو كان ينفع تختار عصر تعيش فيه هيبقي انهي؟ ومين الحاكم؟

بجد طول عمرى كنت بتمنى اكون موجودة ايام الرسول صلى الله عليه وسلم والصحابة رضى الله عنهم وكان نفسى اوى يكون الحاكم عمر بن الخطاب رضى الله عنه

اول أولويه في حياتك؟
اعمل اى حاجة فعلا تحسسنى انى قريبة من ربنا واحس انه دايما راضى عنى

أكتر حاجه بتحبها في رمضان؟
اللمة على الفطار والسحور واحساس غريب بيجيلى وقت اذان المغرب بحس ان الدنيا فيها سكينة غريبة وان كل المسلمين مجمعين بياكلوا فى نفس الوقت

على فكرة انا بشوف الشوارع وقت المغرب لانى ساعات كتير مكنتش بلحق اروح على الفطار

أوصف أجمل فطار ممكن تفطره؟
جبنه فيتا ومعاه لانشون وبيض وشاااااااااى بلبن ده اساسى

مين أكتر اعلامي بتحبه؟
تامر امين اللى بيقدم فى البيت بيتك

لو ممكن شغلانه تانيه تختار ايه؟
لما اشتغل الاول الاولانية ابقى احدد التانية :P

تانى بلد تحب تعيش فيه بعد مصر؟
اعيش اعيش يبقى محبش بلد تانية غير مصر ووالله بجد مش شعارات بس انا بحب مصر جدا وبحب الناس اللى فيها بغض النظر عن اللى بيحصل دلوقتى يعنى

لكن لو زيارة لبلد تانية نفسى اروح الهند ولبنان

اوصف ترتيبات أجمل فرح ممكن تحضره؟
مش مهم شكل الفرح المهم ان اللى بحبه هيكون معايا

صحيت من النوم لا موبايل ولا كمبيوتر ولا كاميرا ديجيتال ورجعنا لعصر الاحصنه والحمام الزاجل؟
هههههههههههههههههههههههههه يااااه طب والله احساس جميل كدة وساعات كتير بتمناه
بس لو حصل بجد اعتقد انى هكون زهقانة وهحس بالملل واقعد اغنى ظلموووووه وخدوا منه موباااااااايلوووه

السعاده هي ... ؟

رضا ربنا عنى
اكون دايما مع الناس اللى بحبهم ويحبونى
اساعد حد محتاجنى
انام وانا ضميرى مرتاح ولا اذيت حتى ولا جرحت حد

عندك أمل؟ وأسبابك؟

عندى طبعاااا امل كبير كمان

الاسباب

ان ربنا هو ربنا

لما تحب تهرب من كل حاجه بتروح فين؟
مش مهم فين المهم اكون لوحدى وياسلام لو حتة ظلمة علشان افكر كويس

امتي أخر مره أخدت فيها نفس وقلت ياااااه أنا كبرت؟

هههههههههههههههههههههههههه عمرى طبعا ما قلت كدة كمان 20 سنة بقى اقول كدة

بتشرب سجاير ولا لا؟ وايه رأيك في الستات والرجاله اللي بيشربوا؟

لا طبعا انا بشرب شيشة علطول ههههههههههههههههههه
بلاش هزار نكلم جد شوية
لا طبعا اكيد مبشربشى
ورأيى فى الرجالة اللى بيشربوا انه حد ضعيف ساب حتة سيجارة تتحكم فيه
اما الستات فببصلهم باشمئزاز وبصراحة مبحسش انهم ستات اصلا

بتعرف ايدك الشمال ازاي؟

اللى هى بتبقى ناحية رجلى الشمال

أكتر آله موسيقيه بتحبها؟
بصراحة مليش فى الالات الموسيقية بس انا بحب عزف البيانو والكمان

ليه الذوق والنخوه اتعدموا؟

هما متعدموش بس بقوا نادرين جدااااااااااا ممكن لانهم لاقوا ان الذوق مينفعشى مع العالم دى يا راجل هههههههههه
وقرروا انهم يوروهم العين الحمرا اوالبرتقالى

ايه الحاجات اللي لو حصلت هتبقي سعيد؟
احفظ القراءن كله واعمل حج
اكون اسرة مع شخص بحبه وبيحبنى ونكون متفاهمين جدااا
ابقى حد ناجح فى كل حاجة فى حياتى حتى فى علاقاتى مع الناس

تحب أرض زراعيه ولا اجنس عربيات ولا كام عماره ولا فلوس في البنك؟

امممممممممممممممم
انا اخد الفلوس اللى فى البنك واشترى بيهم ارض زراعية واجنس عربيات وكام عمارة هههههههههههههه

هى غلاسة بقى :P

تحب البحر ولا النيل؟
البحر

مركب ولا طياره؟
مركب

شخص مجنون ولا عاقل؟

مجنووووووووووون بس مش منخوليا يعنى

تقرا كتاب ولا تتفرج علي فيلم؟
اقعد على النت : P

خلاص متزعلوش هجاوب
على حسب موودى بس فى الغالب هيكون كتاب وخاصة لو كتاب بحبه

تهدى التاج لمين؟

اول 5 هيحطوا تعليقات هههههههههههههههه وهتبقى اول مرة الناس تهرب من اول تعليقات

******************************************

متزعلوش منى يا جماعة لو كنت اتاخرت عليكم فى الردود

واسفة على التأخير

*******************************

تحياتى

ايمى