اهلا بيكم كلكم

(غلطة مطبعية ترحب بكل زوارها الاعزاء وبتمنى ليكم قضاء وقتت ممتع ومفيد فى مدونتى المتواضعة )

روعة الايمان

روعة الايمان

جوهرة الحياة هى ذكر الله

جوهرة الحياة هى ذكر الله

السبت، 30 أغسطس، 2008

اصحى يا نايم صحى النوم داحنا بقينا فى شهر الصوم





بجد مش عارفة ابدأ منين واقول ايه بس بجد عندى احساس ان رمضان ده لازم يكون مختلف عن كل سنة علشان كل سنة بننشغل بوقت كبير فى الدراسة المرة دى ملناش حجة رمضان جاى فى الاجازة يعنى الوقت ان شاء الله ياريت يكون كله عبادة

عايزن نقلل عدد ساعتنا على النت ولما ندخل على النت نخلى دايما الحاجة اللى هنعملها تكون نيتنا فيها لله بنيتك انت اللى بيها تقدر تخلى العمل صالح ويرضى ربنا فلازم باذن الله نجدد النوايا
مش هطول عليكم بس هذكركم بس بشوية حاجات
الصورة دى فيها شوية اذكار مش هتاخد منك دقيقة بس اتفرج على فضلها سيفها عندك على الكمبيوتر وكبرها وحاول تبصلها كل يوم واقراها
ومتنسوش اذكار الصباح والمساء
حاولوا فى رمضان ياجماعة بوصيكم بلاش مسلسلات بس ممكن اسمحلكم بكارتون بكار ورشيدة وانتم بتفطروا ههههههه
ونحاول ان شاء الله نجاهد نفسنا ونحفظ جوارحنا
اللسان: بلاش غيبة ونميمة ولا سب ولا لعن ولو حد شتمنا هنقول اللهم انى صائم ونزود ذكر الله والتسبيح
البصر :نغض بصرنا ولا نتتبع عورات الاخرين

السمع :حاول ان تحفظ اذنك فلا تسمع اى كلام يغضب الله واكثر من سماع القراءن والاحاديث الدينية

ان شاء الله نقرأ جزء قراءن فى اليوم وجزء فى صلاة التراويح علشان باذن الله نختمه مرتين

نحفظ كل يوم اية واحدة من سورة الفجر

سامعة حد فيكم بيبقول اشمعنى سورة الفجر هقله علشان هى عدد اياتها 29 يعنى ان شاء الله نكون خلصناها على اخر رمضان عارفة ان فى ناس كتير حافظينها بس اللى حافظها يراجعها معانا

صلاة الخمس فروض والافضل ان تكون فى جماعة لمضاعفة الاجر

النوافل لان النافلة فى رمضان تعادل فريضة

ختم الصلاة بقول اية الكرسى والحمد لله والله اكبر وسبحان الله كل منهم 33 مرة ولا اله الا الله




اذكار النوم ومحاولة الالتزام بالادعية( مثل دعاء الاستيقاظ ودعاء الخروج من المنزل ودعاء دخول الخلاء ودعاء ماقبل النوم 0000)


امر بمعروف او نهى عن منكر (لاقت صاحبك بيشتم انهيه –لاقت حد بيسمع اغانى اقله تعالى نسمع قراءن احسن –لاقت واحد نايم ومصلاش اقله تعالى نروح نصلى سوا )

الصدقة (ولا تنسى احب الاعمال الى الله ادومها وان قلت )مش مهم ان تكون الصدقة دى قليلة بس حاول تعملها دايما

(التبسم فى وجه اخيك المسلم –سامح الناس وابدا انت بمصالحة من تتخاصم معهم )

بر الوالدين(متقليش انا صايمة او انا صايم وتعبان ومش قادر اعمل حاجة وافتكروا ان هما كمان صايمين واكبر منكم وساعدوهم واستمتعوا بالثواب )

صلة رحم (وانتم رايحين عزومة خليها بنية انك رايح تصل رحمك وانت بتكلم حد خلى نية صلة الرحم دايما معاك )

لا تنسوا الدعاء عند الافطار ولا تنسونا من صالح دعائكم

اود ان اختم على حديث رسولنا الكريم

قال رسول الله صلى الله عليه وسلم (خاب وخسر خاب وخسر خاب وخسر قيل من يارسول الله قال من ادرك رمضان ولم يغفر له )

ياريت يا جماعة ندخل كل يوم نقول انا عملت كذا وقصرت فى كذا علشان نشجع بعض وليس تفاخر او رياء علشان لو واحد قصر ممكن يلاقى واحد بيشجعه من غير مايشعر نخلى دايما عندنا تنافس فى الاعمال الصالحة

ارجو انى مكنش طولت عليكم

رمضان كريم

وكل سنة وانتم كلكم طيبين

وكل اللى يدخل يحط تعليق ليا عنده فانوس :))

تحياتى

ايمى


السبت، 23 أغسطس، 2008

متعة العطاء

بجد انا مش عارفة هقدر اقول كل اللى حاسة بيه ولا الكلام مش دايما بيكفى للتعبير عن كل حاجة


امبارح الحمد لله رحت الفافلة صحيت الساعة 5 وربع علشان الميعاد ميرحش عليا ونزلت الساعة 7 كنت حاسة انى فى منتهى النشاط


رحت لاقيت الناس لابسة تيشرتات موحدة مكتوبة عليها رسالة من قدام ومن ورا متعة العطاء


كنت فاكراهم اعضاء رسالة نفسهم طلعت الباص فوجئت انهم بيدونى تيشرت البسه انا كمان قلتلهم هو لازم قالولى ده فى مصلحتكم علشان اولا متهوش ثانيا علشان لما سكان القرية بيهجموا بيعاملونا احنا معاملة خاصة من غير ضرب يعنى


ولبست التيشرت وبما انى مكنتش اعرف القافلة دى بتبقى عاملة ازاى رحت بابيض ههههههههههه ومادراك ما الابيض لاقيت الناس بتقلى جاية بابيض قولى على لبسك يارحمن يارحيم وابص الاقى الكل لابس الوان غامقة قلت يلا مش مهم المرة الجاية ابقى اجى بغامق


اصلا لبست التيشرت وهاتك ياضحك عاملين التيشرتات واسعة جدا جاية عليا بحر كنت عايزة حد تانى معايا ههههههههههه


المهم حصل مشكلة وهى ان الاتوبيسات تاهت من بعضها وده كان سبب تاخير كنا قاعدين جوة الباص ومن حظنا برضه التكييفات كانت مش شغالة ومقلكمش بقى على مدى الحر اللى كنا فيه بس سبحان الله فى وسط كل ده بدأوا بقى المنظمين يكلمونا عن ان كل مازادت المشقة زاد الثواب واقلنا حبة اذكار وبدأنا نعدد النوايا بجد قالوا حبة نوايا كانت جميلة جدااااااااا زى مثلا


ادخال سرور على مسلم


فك كربة من كربات الدنيا


فى هناك ايتام فتعتبر كفالة يتيم


فى منهم ارامل ومساعدة الستات الارامل بيكون عند ربنا احسن من الجهاد فى سبيل الله


غير تركيب الاسقف بيبقى حماية لانسان من حر الشمس علشان ربنا يخفف عننا حر يوم القيامة
وبرضه افطار صائم لان الشنط اللى بنوزعها دى هيفطروا منها بعد كدة
وبناء بيت مسلم لاننا كنا بنساعد فى تجهيز العرايس


غير بقى نوايااااااااااااااااااااااا كتير جدا بجد


المهم وصلنا على صلاة الجمعة دخلنا القرية كنا 6 اتوبيسات سياحية كبيرة وورانا عربيات النقل محملة وكنا 350 متطوع بقى اهل القرية بيبصلنا بتعجب وانتم مين وجايين هنا ليه وكدة بقى D:


وبدأنا الشغل كنت انا فى فريق توزيع الشنط على الاسر الفقيرة الجروب بتاعنا وكانت كل اسرة ليها شنطتين بجد الشنطة كانت بتبقى تقيلة جدا وبنمشى بيها فى القرية ونلف على بيوت ناس معينة كان معانا كشف باسماء الناس المحتاجة


وكان فى مشاريع للناس كانت مشاريع خضار


والولاد بجد تعبوا جامد حفروا علشان يدخلوا مواسير المية وعملوا الاسقف كانت اسقف جاهزة


وكانوا بيشيلوا الغسالات ماشاء الله عليهم


وكان فى فوانيس للاطفال وتنظيف للمساجد وتجهيز عرائس يعنى جايبنلهم حاجات فى الجهاز وكدة واسمعوا الزغاريد هههههه عقبالكم كدة ياشباب وعقبالنا :))


بجد تخيلوا ان القرية نادر لما تلاقى فيها مية نظيفة كنا هنموت من العطش فعلا على اخر الرحلة فما بالكم باهل القرية ياما يشربوا مية مش نظيفة ياما يموتوا من العطش
والله ياجماعة احنا فى نعمة عارفين يعنى ايه ان فى ناس عمرها ماشافت اللحمة عمرها ماعملت رز ومكرونة الاكل اللى بالنسبة لنا احنا حاجة عادية عمرهم ماشفوه
عارفين يعنى ايه تكون واحدة مكفوفة وملهاش زوج وهى اللى مسئولة انها تراعى اطفالها
عارفين يعنى ايه زوج فقد عقله وتقاعد وملهوش غير الله ثم مراته اللى مفيش فى ايدها حاجة
والله مآسى انا عمرى ماكنت اتخيل ان الوضع كدة
كان فى واحدة حكتلنا على موقف حصل معاها فى قافلة تانية وكانت قافلة استكشافية انها دخلت لاقت سيدة مسنة مكفوفة لها ابن ولكن زوجة ابنها تمنعه من زياراتها او مساعدته لا يزورها احد ولما سألوها نفسك فى ايه قلتلهم انا مش عايزة حاجة غير ان حد يزورنى وبعد كدة ذكرت انها حوشت فلوس كفنها لكن جارتها ماتت ولم يجدوا لها كفنا فاعطتها كفنها
وهى دلوقتى بتحاول تحوش تانى فلوس كفنها تانى !!!!!!!!!!!!!!!


وخلصنا على الساعة 7 كان كله بيشتغل بكل طاقته كان فعلا كله عايز يشتغل لدرجة ان احنا كان معانا مكفوفين بيساعدونا


ووصلنا قدام الدار زى ماوعدونا فعلا 8 وربع


بس انا روحت البيت على 10 ونصف D: لان انا اصلا بعيد عن مكان الدار نفسها كمان


كنت هلكانة


بس بجد عمرى ماكنت تعبانة بالمنظر ده ومبسوطة بالشكل ده


رجعت البيت قعدت اقول لاخواتى احمدوا ربنا على المية دى


شوية اقلهم احمدوا ربنا على الاكل بجد


ههههههههههههههه عقدتهم :))


واختى الصغيرة قالتلى انا هطلع معاكى القافلة اللى جاية قلتلها ان شاء الله ياحبيبتى


بجد فعلا صحيت من النوم كان جسمى مكسر بس كنت فرحانة جدا قمت مبتسمة كدة


بجد ياجماعة انا بحمد ربنا جدا انى طلعت القافلة دى والحمد لله اتعرفت على ناس جميلة ربنا يكرمهم


تخيلوا كم الثواب اللى هتاخده علشان خاطر حبة تعب صغيرين حتى لو الواحد مقدرش ييجى بس قال لحد والحد ده جه فهو هياخد الثواب زيه لان الدال على الخير كفاعله


الحمد لله على نعمة الاسلام ونعمة الصحة والمال


تحياتى


ايمى

الثلاثاء، 19 أغسطس، 2008

اسمعووووووووووا واعوووووووووووووووا ده مفضلش الا يومين

كان نفسى دايما من زمان انى اشارك فى قافلة سواء كانت خيرية او طبية ففى كلا الاحوال هتقدر تقدم حاجة غيرك محتاجها فعلا
ومن كام يوم كنت نفسى اوى اشارك فى جمعية رسالة باسرع وقت ممكن
وسبحان الله جالى لينك لاقت رسالة فيها تنظيم من جمعية رسالة لاكبر قافلة لمركز قليوب محافظة قليوبية وبسرعة جدااااااااا بصيت فى التفاصيل لاقت الموضوع ميسر جداااا يعنى اتوبيس من امام الدار لا ومش بس كدة داحنا هنرجع فى نفس اليوم وطالما فى نفس اليوم فممكن بابا وماما يوافقوا
رحت قايمة من على الكمبيوتر رحت عاملة لماما ازاى اوعى ترفضى بجد دانا نفسى اوى قالتلى هو ايه ده قلتلها هطلع قافلة يوم الجمعة وقلتلها التفاصيل بس مجاش فى دماغى اقلها انه لمحافظة القليوبية المهم وافقت
شوية لاقتها بتقلى هو انا ينفع اطلع معاكى اهو نرجع سوا قلتلها طبعااااااااااااااا قالتلى هو لفين ؟؟؟؟؟؟
احم احم ماما بتسألنى
قلتلها لمحافظة القليوبية قالتلى ايه ده يايمان طب ازاى لا استئذنى ابوكى قلتلها طب قوليله انتى قالتلى لاا انتى اللى لازم تقوليله
طبعا مقلتلهوش لانه كان عايز ينام
استنينت لحد ماصحى بعد الفجر ورحت قايلاله بابا انا طالعة قافلة تبع رسالة لمحافظة القليوبية طبعا بابا قعد يسأل وانا قاعدت اجاوب والحمد لله حصلت على الموافقة من كلاا الطرفين
طبعا اكيد انا مش هرضى ابدا انى اطلع لوحدى بجد عايزين كلنا نشارك نفسى والله تطلعوا بجد هما محتاجين متطوعين كتير
واللى محتاج تفاصيل
ده نص الرسالة
اولى مفاجآت رساله قبل رمضان ودى قافله تابعه لرساله مصر الجديده احد اكبر واهم الفروع لكن اى حد يحب يشارك فى القافله من اى فرع او غير متطوع اهلا بيه القافله دى من اكبر القوافل لرساله ومحتاجين متطوعين كتير جدا واللى طلع معانا قافله امياى ببنها شاف العدد حوالى 6 اتوبيسات ان شاء الله دى محتاجين عدد اكبر فى انتظاركم كلكم ان شاء الله سواء من فرع مصر الجديده او من اى مكان التفاصيل:قافله توزيع لقريه السد-مركز قليوب-محافظة القليوبية يوم الجمعه 22/8/2008ان شاء الله القافله دى حتشمل:-شنط غذائيه-توصيل مياه-مشاريع صيانة أسقف-تجهيز عرائس- توزيع سراير ومراتب-توزيع بوتاجازات وغسالات وكراسى متحركه-معرض ملابس معرض اطعمه التجمع ان شاء الله الساعه 8ص امام الدار والتحرك حيكون 9ص والرجوع 8م لاشتراك برجاء تسجيل الاسم باداره المتطوعين وفريق الاتصالات بلجنة القوافل
اه صحيح ياجماعة انا اتصلت بادارة المتطوعين فعلاا وسجلت اسمى و ياريت بجد انتم كمان تشاركوا اكيد احنا كلنا محتاجين الشعور ده
وللى عايز يتصل النمرة اهى
26211307
ولما اتصلت قالتلى ان ان شاء الله هيكون فى قافلة تانى يوم السبت علشان اللى مش هيقدر يشارك يوم الجمعة ممكن يشارك السبت
كل سنة وانتم طيبين ورمضان كريم
تحياتى ليكم كلكم
ايمى

الأحد، 10 أغسطس، 2008

بداية حلمى بدأت

امبااااااااااااارح رحت عملت اول انترفيو ليا فى شركة تسويق وتنمية بشرية
بجد هما معظم اللى فى الشركة عارفانى وكنت اتعاملت قبل كدة معاهم فى شغل
ولاقيت المانجر بتتصل بيا قالتلى انا عايزاكى فى شغل ضرورى ياريت تجيلى بكرة الشركة وحددتلى الميعاد
المهم رحت لاقتها بتقول فى ناس كتير لسة هنعمل معاهم انترفيوهات قلتلها طب انا معملتش انترفيو قالتلى اومال انا عايزاكى ليه قلتلها ااااااااااااااااه بقى وجايبنى من غير ماتقوليلى وخدتينى على خوانى وحطيتينى تحت استريس علشان تخدى من الكلام كله لا وكمان جايبالى نعناع علشان انام ومعرفش ارد عليكم هما كانوا اتنين طبعا كل الكلام ده كنت بقوله وانا بضحك هههههههههههههههه
بس هما اكدولى انهم مكنوش يقصدوا فعلا انهم ميبلغنويش وفعلا هما بيقولوا لاى حد وبيبقوا معرفينه انه هيعمل انترفيو بس الحمد لله انا مكنتش خايفة لانى مريت بالاستريس بتاع الانترفيو قبل كدة مرة فى استب وساعتها اتعلمت كتير وعرفت انى فى حاجات غلط ممكن تقلها وانت مش واخد بالك وتضيع منك اى انترفيو
وفعلا عملوا معايا الانترفيو وكانت اسئلة كالمعتادة فى اى انترفيو مع بعض الاسئلة الجديدة
طبعا اللى عرفته برضه ان نجاح اى انترفيو انك تكون على طبيعتك بدون تكلف وتصنع لان اللى قاعد قدامك مش غبى لو فكرت تكدب هيعرف
وكنت فعلا على طبيعتى جداااااااااااا والحمد لله حسيت انى وفقت بفضل ربنا سبحانه وتعالى
وطبعا زى كل انترفيو السؤال المعتاد (مش عايزة تسألينى اى سؤال ؟)
ضحكت وقلتلها اسألك سؤال عارفة انه مبينفعش يترد عليه فى الانترفيو قالتلى ايه هو
قلتلها انا اكسبت ولا لا ؟
قالتلى انتى بجد ممكن يترد عليكى فى نفس الانترفيو قالتلها ها قالتلى انا شايفاكى اكسبت جدا
والتانية قالتلى برضه انتى اكسبت
اصلا كان من ضمن الاسئلة انتى متوقعة نقبلك معانا بنسبة كام ؟
وكانت اجابتى90% ده كدة كمان تواضع ههههههههههههه انا كنت هقلها انتم ممكن ترفضونى ضحكت وقالتلى لعلمك لو كنتى قلتى اقل من 100% انا كنت زعلت

الحمد لله كان انترفيو كويس وهى كانت حد جامد جدا بجد ماشاء الله عليها
بالرغم هذا الانترفيو الا ان لسة فى انترفيو كمان هيتم مع صاحب الشركة نفسه وده بقى مش حد جامد بس ده حد واصل يعنى من خلال صوتك ممكن يحللك شخصيتك حتى لو انت مش قدامه بجد ماشاء الله عليه فربناااااااااااااااا يستر
ادعولى كتييييييييييييييير

ملحوظة
بالرغم ان فعلا ده بداية حلمى انى اوصل لمانجر اتش ار او ساليز الا انى فعلا حاسة انى لسة محتاجة كتير اوى حاسة انى ناقصنى كتير علشان اكون جديرة بالمكان ده نفسى ابقى على قدر عالى من الثقافة والتحليل ادعولى بقى ربنا يوفقنى وانى احقق احلامى

الجمعة، 1 أغسطس، 2008

اعمل الخير وارميه فى البحر


قررت اسرتنا اسرة smart vet


انها تعمل حاجة جديدة وفى نفس الوقت مفيدة


قررت اسرة سمارت فيت بالتعاون مع جمعية رسالة للاعمال الخيرية انها تبدأ بعمل حملة لاعادة تصنيع الورق


استنووووووووووا بس متستعجلوش واسمعوا للاخر


طبعا كلنا عايزين نعمل حاجات خير كتير فى حياتنا وساعات كتير مبنعرفش نعمل ايه طب ماهى الفرصة جت وفى نفس الوقت فكرتها سهلة وغير مكلفة ولا من الناحية المادية ولا حتى هنبذل جهد


بدأت جمعية رساله مشروع اعادة التصنيع فى 31/1/2006 الذى يهدف الى زيادة الوعى بأهمية اعادة التصنيع .

يفتح هذا المشروع باب جديد للتبرع وهو التبرع بالهالك من الورق والكتب .. ويقوم المتطوعين بعملية الفرز لاستخراج الصالح من الكتب واعادة بيعها باسعار رمزيه فى معارض الكتب المستعملة التى يتم تنظيمها ، او وضعها فى المكتبة الدائمة لرساله ليستفيد بها المتطوعين . اما الهالك من الورق فيتم بيعه لمصانع اعادة التصنيع . ليستخدم هذا الهالك فى صناعة منتجات جديدة . يساعد العائد من هذا النشاط فى تمويل الانشطة المختلفة للجمعية مثل كفالة الايتام مساعدة الاسر الفقيرة ، تنمية خدمات ذوى الاحتياجات الخاصة ... الخ وعلى الرغم من بساطة فكرة المشروع ، الى انه يساعد فى تحقيق ثلاث أهداف ..


• الخيرى : يساعد العائد فى تمويل الانشطة الخيرية للجمعية .


• البيئى : يساعد فى التخلص من هالك الورق بطريقة بيئية سليمة بدلا من حلرقه او دفنه مما يؤدى الى زيادة التلوث .


الاقتصادى : تساعد فى تقليل الواردات من المواد الخام اللازمة لصناعة الورق .


ويمكن تلخيص مهمة مشروع اعادة التصنيع فى ..


1_ Reuse : يعاد استخدام الصالح من الورق والكتب الدراسية من خلال برامج دروس التقوية ومحو الامية فى الجمعية . بالاضافة الى اعادة بيع الكتب القيمة المستعملة باسعار رمزية .


2_ Recycle :يباع الهالك من الورق والكتب لمصانع اعادة تصنيع الورق .


3 _ Reduce : بتحقيق الخطوتين السابقتين ، سوف نقوم بتقليل المادة الخام والطاقة المستخدمة لانتاج الورق من مادة خام أولية ، بالاضافة الى التلوث الناتج سواء من عملية الانتاج أو الناتج من سوء التخلص من الورق الهالك بالحرق .


4_ Resourse : فى كل مرة تساهم فى هذا المشروع بورقك وكتبك ، يساعد الدخل الناتج فى تمويل الانشطة الخيرية للجمعية .


طيب احنا كدة اكلمنا كتير اوى وممكن ناس منكم دلوقتى بيقولوا اهو كلام


طب مابدل مانقول كدة ماتيجوا نتفرج على الانجازات اللى تمت بالفعل من خلال المشروع ده


وانجازات المشروع حتى الآن ..


تم وضع نقاط لتجميع الورق فى 75 مدرسة .

• تم التعاون مع 46 شركة لتطبيق المشروع حيث يتم المرور أسبوعيا لجمع الهالك من الورق .

• قام الراديو الالمانى بعمل حوار مع المتطوعين للنشاط لتمثيل مصر فى اطار فعاليات المؤتمر البيئى الدولى الذى انعقد فى اندونيسيا .


والله بجد هبقى سعيدة جدا لو كل واحد فيكم شاركانا ومقلش انا مالى هو انا يعنى اللى هغير حاجة والكلام السلبى كتيييييييير وياما بنسمعه


ابدأ بنفسك حتى لو حاسس انها حاجة قليلة فهى ممكن تساعد ناس غيرك كتير محتاجين


يعنى كلنا عندنا ورق وياما بنرميه ياما بنبيعه علشان عايزين نخلص منه طيب مادينا هنخلص منه وفى نفس الوقت هتستفيد انك تاخد الثواب


الحملة باذن لله هتبدأ فى الكلية برعاية أسرتناا فى أول الدراسة باذن الله .. ياريت كلنا نقدر نجمع أكبر كم من الورق نقدر نتبرع بيه .. , واللى عايز يشارك فى حملتنا دلوقتى .. أو .. يقدر يتعاون معانا فى انه يقدر يوفر كمة كبيرة من الورق منه او من اصحابه او من جيرانه ..


يقلى عن طريق كومنت او رسالة الكترونية


وحتى لو مش هتشاركونا بجد نفسى تدعولنا من قلبكم ان الحملة دى تنجح


سمارتووووووووووية للابد


بحبك اوى ياسمارت


smart vet