اهلا بيكم كلكم

(غلطة مطبعية ترحب بكل زوارها الاعزاء وبتمنى ليكم قضاء وقتت ممتع ومفيد فى مدونتى المتواضعة )

روعة الايمان

روعة الايمان

جوهرة الحياة هى ذكر الله

جوهرة الحياة هى ذكر الله

الجمعة، 27 فبراير، 2009

اسمى مكتوب !!!!!!

ولا بيااااااااااااااااا ولا عليااااااااااااااااااااا دخلت مدونة رومنسى بعد غياب بسبب الامتحانات ولاقيت اجاباته على اسئلة قلت حلوووووو اقرا بقى لحد ما وصلت تهدى التاج لمين؟؟؟؟؟؟؟؟؟


تا تا تا طرخ طرخ لا مش بضرب حد ده اثر الصدمة لما لاقيت اسمى مكتوب !!!!!


حتى عادل امام جه يقلى اسمى مكتوب؟؟؟؟ قلتله لااااااااااا اقلى طويب :D

طبعا انا فى سرى بحقد عليه لان اسمه مش مكتوب


المهم بقى انه فعلا تاج دسم (محدش يجوووع دى مش وجبة يا جدعان ده تاج يعنى بلاش طمع )



يلا بقى يا ايمى وبلاش لوك لوك كتيييييييييييير وخشى فى المفيد

اوك يلا

....

...

..

.

لو كان ينفع تختار عصر تعيش فيه هيبقي انهي؟ ومين الحاكم؟


بجد طول عمرى كنت بتمنى اكون موجودة ايام الرسول صلى الله عليه وسلم والصحابة رضى الله عنهم وكان نفسى اوى يكون الحاكم عمر بن الخطاب رضى الله عنه

اول أولويه في حياتك؟
اعمل اى حاجة فعلا تحسسنى انى قريبة من ربنا واحس انه دايما راضى عنى

أكتر حاجه بتحبها في رمضان؟
اللمة على الفطار والسحور واحساس غريب بيجيلى وقت اذان المغرب بحس ان الدنيا فيها سكينة غريبة وان كل المسلمين مجمعين بياكلوا فى نفس الوقت

على فكرة انا بشوف الشوارع وقت المغرب لانى ساعات كتير مكنتش بلحق اروح على الفطار
أوصف أجمل فطار ممكن تفطره؟
جبنه فيتا ومعاه لانشون وبيض وشاااااااااى بلبن ده اساسى

مين أكتر اعلامي بتحبه؟
تامر امين اللى بيقدم فى البيت بيتك

لو ممكن شغلانه تانيه تختار ايه؟
لما اشتغل الاول الاولانية ابقى احدد التانية
:P


تانى بلد تحب تعيش فيه بعد مصر؟
اعيش اعيش يبقى محبش بلد تانية غير مصر ووالله بجد مش شعارات بس انا بحب مصر جدا وبحب الناس اللى فيها بغض النظر عن اللى بيحصل دلوقتى يعنى

لكن لو زيارة لبلد تانية نفسى اروح الهند ولبنان


اوصف ترتيبات أجمل فرح ممكن تحضره؟
مش مهم شكل الفرح المهم ان اللى بحبه هيكون معايا


صحيت من النوم لا موبايل ولا كمبيوتر ولا كاميرا ديجيتال ورجعنا لعصر الاحصنه والحمام الزاجل؟
هههههههههههههههههههههههههه يااااه طب والله احساس جميل كدة وساعات كتير بتمناه
بس لو حصل بجد اعتقد انى هكون زهقانة وهحس بالملل واقعد اغنى ظلموووووه وخدوا منه
موباااااااايلوووه


السعاده هي ... ؟

رضا ربنا عنى
اكون دايما مع الناس اللى بحبهم ويحبونى
اساعد حد محتاجنى
انام وانا ضميرى مرتاح ولا اذيت حتى ولا جرحت حد


عندك أمل؟ وأسبابك؟

عندى طبعاااا امل كبير كمان
الاسباب

ان ربنا هو ربنا

لما تحب تهرب من كل حاجه بتروح فين؟
مش مهم فين المهم اكون لوحدى وياسلام لو حتة ظلمة علشان افكر كويس


امتي أخر مره أخدت فيها نفس وقلت ياااااه أنا كبرت؟

هههههههههههههههههههههههههه عمرى طبعا ما قلت كدة كمان 20 سنة بقى اقول كدة

بتشرب سجاير ولا لا؟ وايه رأيك في الستات والرجاله اللي بيشربوا؟

لا طبعا انا بشرب شيشة علطول ههههههههههههههههههه
بلاش هزار نكلم جد شوية
لا طبعا اكيد مبشربشى
ورأيى فى الرجالة اللى بيشربوا انه حد ضعيف ساب حتة سيجارة تتحكم فيه
اما الستات فببصلهم باشمئزاز وبصراحة مبحسش انهم ستات اصلا

بتعرف ايدك الشمال ازاي؟
اللى هى بتبقى ناحية رجلى الشمال


أكتر آله موسيقيه بتحبها؟
بصراحة مليش فى الالات الموسيقية بس انا بحب عزف البيانو والكمان


ليه الذوق والنخوه اتعدموا؟

هما متعدموش بس بقوا نادرين جدااااااااااا ممكن لانهم لاقوا ان الذوق مينفعشى مع العالم دى يا راجل هههههههههه
وقرروا انهم يوروهم العين الحمرا او
البرتقالى

ايه الحاجات اللي لو حصلت هتبقي سعيد؟
احفظ القراءن كله واعمل حج
اكون اسرة مع شخص بحبه وبيحبنى ونكون متفاهمين جدااا
ابقى حد ناجح فى كل حاجة فى حياتى حتى فى علاقاتى مع الناس


تحب أرض زراعيه ولا اجنس عربيات ولا كام عماره ولا فلوس في البنك؟

امممممممممممممممم
انا اخد الفلوس اللى فى البنك واشترى بيهم ارض زراعية واجنس عربيات وكام عمارة هههههههههههههه

هى غلاسة بقى :P


تحب البحر ولا النيل؟
البحر

مركب ولا طياره؟
مركب

شخص مجنون ولا عاقل؟

مجنووووووووووون بس مش منخوليا يعنى


تقرا كتاب ولا تتفرج علي فيلم؟
اقعد على النت : P

خلاص متزعلوش هجاوب
على حسب موودى بس فى الغالب هيكون كتاب وخاصة لو كتاب بحبه


تهدى التاج لمين؟

اول 5 هيحطوا تعليقات هههههههههههههههه وهتبقى اول مرة الناس تهرب من اول تعليقات


******************************************

متزعلوش منى يا جماعة لو كنت اتاخرت عليكم فى الردود

واسفة على التأخير

*******************************

تحياتى
ايمى

الاثنين، 16 فبراير، 2009

فى مثل هذا اليوم(ملحووووووووووووظة)











منذ 19 سنة فى يوم مثل هذا تماما انه اليوم السابع عشر من فبراير انجبت امى فتاة



(((تمتاز برقتها وعذوبتها وفصاحة لسانها انها حقا نسمة هادئة لا تسمعون لها صوتاااا فهى لا تعرف معنى للماضة ولاتدخل كلمة الشعننة قاموس حياتها )))








طبعا طبعا عرفتونى من غير ما اقول اسمى












ايه .ايه بتقولوا ايييييييه ؟؟؟؟؟؟








انا كدابة !!!!!!!!!!!!!!!!











طب بالله عليكم دققوا شوية كدة بين الصفات دى واللى انا كاتبااااه عن نفسى فى المدونة هتلاقوا بالظبط تيبكااااااااال








طبعا المناسبة دى سعيدة جدااااااا بالنسبة لكم لانه يوم ميلاد النسمة (وش وديع خالص )









طب بزمتكم كنتم هتلاقوااااا حد يغلس عليكم كدة لو مكنتش جيت الدنيااااااا ؟؟؟؟؟؟؟؟




كنتم هتلاقواااااااااا حد يكتب بوستات تحرق الدم زى بوستااااااااااااتى اللى زى العسل دى ؟؟!!!!!








يوووووووووه سيبكم بقى من كل اللى فوق ده انا بجد سعيدة جداااا النهاردة مش لانه عيد ميلادى لكن لان ده اول عيد ميلاد ليا يعدى عليا وانا معاكم




نفسى السنة دى تكون مختلفة عن اللى قبلها والجاية تكون احسن منها













ودلوقتتتتتتتتتتتتتتتتتتتتتتتتى بعد الصمت الرهيييييييييب الذى ساد على القاعة الفخمة دى اللى عزماكم فيهااااااااااا










جه وقت الاكل (واااااااااااااااااااااااااااااااااااو)وعلشان احس ان عيد ميلادى مختلف السنة دى قبل ما ناكل التورتة نغمض عنينا ونتمنى امنية وندعى ربنا يحققهالنااااااا ان شاء الله

































وفعلااااااااااااااااااااااا اكبر هدية ليا انكم معاايا :)




**************************************************************************




خبر هااااااااااااااااااااااااااااااااااااااااام



انااااااااااااااااااااااااااااااااااااااااااااااااااااااااااااااا نجحت وجبت جيد جداااااااااااااا









اسمع زغرودة حلوة بقى




لولولولولولولولولى






وعقبالكم كلكم يااااااااااااااااااااااااارب وادى كمان الحاجة الساقعة









الملحوظة المهمة جدااااااااااا انى مقاطعة المنتجات اليهودية




بس انا قلت احنسكم اجبلكم صور بس لكن محدش يشرب




وقلت بلاش اكتبلكم انها يهودية لحسن تغيروا رأيكم




وتقولوا البت دى مش نسمة وده مش فى مصلحتى


علشان بس فى ناس علقت كتير على الموضوع وانا فرحت جداااااااا بصراحة انكم مقاطعين




وعلشان كدة قلت اجبلكم شوية عصاير على ايس كريم





تحيااااااااااااااااااااااااااااااتى



النسمة الرقيقة الوديعة ايمى (وش بيكدب )

السبت، 7 فبراير، 2009

رحلة بلا عودة






تمر بنا الحياة ونحن نسير ونسير ولكن لابد لنا من التوقف لبضع لحظات لنرى ما يحدث حولنا واين نحن مما يحدث



انا هكلم لانى فعلا حاسة انى محتاجة اكلم



من ساعة ماخدت الاجازة واخبار الوفيات نازلة ترف عليا لحد بجد ما استوقفنى موت اخت صحبتى عندها تقريبا 24 سنة بجد كانت طيبة جدا ماتت فجأة رحمك الله يا رشا واسكنك فسيح جناته

وكمان وفاة محمد (الفارس الملثم )رحمك الله يا محمد وجعلك مع الابرار والصالحين



ياترى فكرت انك ممكن تكون مكانهم فى اى لحظة ممكن وانت قاعد بتقرأ البوست ده دلوقتى



ياترى حاسس انك لو مت هتكون فعلا عملت اللى عليك ولا كنت بعيد اوى عن ربنا

ياترى استغفرت على الذنوب اللى ارتكبتها ولو سبتها تعدى عليك وكأن شىء لم يحدث او امر تعودت عليه

ياترى سبت حق من حقوق الله ولا كنت طائع لله عز وجل

اكيد كلنا بنخطىء واكيد كلنا مقصرين بس والله لازم نفوق ونبص لنفسنا كويس

ياترى لو انت واقف بين ايد ربنا دلوقتى ايه اللى مش هتقدر تقوله ؟؟؟؟

شوف ايه اللى ممكن يخليك خجلان لوانت بين ايد ربنا والرسول شايفك حاول تبعد عن الحاجة دى واستغفر وتب الى الله فما يوجد احن من الله علينا

ياترى دايما حاسس انك قريب اوى من ربنا يعنى حاسس ان نفسك مطمئنة وانك متوكل على الله فى كل امورك ولا دايما حاسس انك مكروب وزهقان ومش حاسس بطعم السعادة
السعادة فى القرب من الله عز وجل استشعر حلاوة الايمان حين يكون الله راض عنك

انا عارفة ان الكلام ده كلنا عارفينه بس احنا دايما محتاجين تذكرة متسبشى نفسك تتعمق فى الذنوب علشان ميبقاش على قلبك غمامة سودا من الصعب ازالتها


ادعى الله دائما ان يعينك على طاعته


حاول ان يكون لك دائما صحبة صالحة تعينك على طاعته


احفظ لسانك وعينينك وجوارحك من كل مايغضب الله ورسوله ولا تستهن بالصغائر


ربنا يهدينا جميعا الى مايحبه ويرضاه


اللهم انى استغفرك من كل ذنب اقترفته واتوب اليك


الأحد، 1 فبراير، 2009

اذاعة خارجية

عدنااااااااااااااااااا
بعد ان انتقلنا الى اذاعة خارجية من قلب لجان كلية الطب البيطرى جامعة القاهرة سوف ننقل لكم الآن ما حدث هناك
حيث سمعنا بعض الاشخاص ومن ضمنهم آنسة تدعى ايمى بيبى انها تقول جملة غريبة (دفعتنا دى دفعة نحس )
وعندما سمعنا هذه الجملة توقفت الكاميرات وقررنا ان نقوم بعمل حديث صحفى مع المدعوة ايمى
فكان الحوار كالتالى
نحن من اذاعة بيبهات دوت كوم فهل لنا القيام بحوار معكى ؟
هى :طبعا على الرحب والسعة
احنا :سمعناك منذ قليل وانت تقولين جملة غريبة (دفعتنا دى دفعة نحس!!!! )
هى :اه فعلنا قلتها
احنا :طب ازاى تقولى كدة على دفعتك اللى انتى واحدة منهم !!!!
هى :علشان هى دى الحقيقة
احنا :ممكن توضحلنا ازاى ؟!
هى :اوك لورجعنا بشريط ذكرياتنا لورا لحد مانوصل لاولى اعدادى هنلاقيهم طبقوا علينا منهج اضافى وسموه ملحق دراسات علشان نزود ثقافتنا الجغرافية والتاريخية (مش لاقيين حاجة يعملوها )
وبعد كدة مرحلة تانية وتالتة اعدادى نلاقي مواد كتير ظهرت على راسهم التيمز
احنا : ايه هو التيمز ده
هى : اسئلة تفكير وتنشيط للذهن
والله فعلا اتذكر ان بعض المدرسين كان بيعجزوا قدام حل بعض الاشياء فيها ومع ذلك منكرشى انى كنت بستمتع جدا بحل الحاجات دى لان انا اصلا بحب الحاجات اللى مش مباشرة
تانى مادة كانت التكنولوجيا كنا بنقعد نصمم صناديق ومكتبات وكرسى وحاجات كتير جدا كنت بحس انى بطلع شحنة جوايا لانى بحب التصميم والرسم وكنت بفرح جدا لما الجروب بتاعنا مثلا يطلع حاجة حلوة ياخد عليها درجات كويسة
ثم نترك مرحلة الاعدادية ونذهب الى الثانوية العامة بعبع القارات لنجد نظام امتحانات غريب
يعنى مثلا فى العربى يكون موضوع تعبير كبير وواحد صغير والادب والنصوص والحاجات دى كانت اختيارى غبى لدرجة اننا كنا محتارين نختار مين فيهم هما الاربعة عجبنا
وبعد كدة عرفنا انهم لما جم يصححوا المدرسين ملتزموش بنموذج الاجابة وبقوا يمشوا كذا اجابة لان اصلا الاختيارات يعتبر كانت كلها تنفع
ونسيب مرحلة الثانوية بس قبل مانسيبها لازم ولا بد التنسيق يعلى علشان كل واحد ميدخلش اللى هو عايزه يدخل اللى ربنا كاتبهوله بس
وهييييييييه دخلنا الكلية قلنا بقى خلاص مش هيقدروا يطبقوا علينا حاجة تانى
لكن النحس ورانا ورانا كل رؤوساء الاقسام اتغيروا بلا استثناء
يعنى انا الترم ده امتحنت 8 مواد نشيل منهم واحدة علشان دى المادة الاختيارية يتبقى 7 مواد بسبع اشخاص جداد بسبع انظمة امتحانات جديدة هههههههههه
جابولنا الامتحانات معظمها مكنش مشكلتها فى صعوبتها قد ما مشكلتها انك عارف الامتحان ومش لاحق تكتب حاجة بس على مين حطينا فى ايدينا عجلات علشان نسابق الوقت واللى كان بيشيل العجلات من ايده كان بيضيع منه اسئلة
احنا : يااااااه دانتم فعلا دفعة نحس
هى :مع احترامى ليكم ولاذاعتكم الا انى كنت بقول نحس دى على سبيل الهزار ....طبعا طبعا احنا دفعتنا مش نحس بس هى متميزة وعبقرية علشان كدة هى كبش الفدا للدفعات الباقية D:
احنا :اعزائى المشاهدين بعد ان شاهدتم معنا عناء دفعة ايمى عليكم ان تدعوا لها من اعماق قلوبكم والا قطعنا عنكم الارسال
**************************************
بجد والله سيبكم من الحوار اللى فوق ده اصلا المحطة دى قفلت
انتم بجد وحشتونى جدااا ولعلمكم بالرغم ان الامتحانات كان نظامها غريب اوى والله والناس كانت بتطلع متضايقة الا انى حاسة ان الحمد لله حليت كويس طبعا بفضل ربنا سبحانه وتعالى ثم بفضل دعواتكم
واللى مدعاش هنقطع عنه الارسال :P
طبعا انا فى خطتى الخمساية الثلثية انى ارد على كومنتات البوستات اللى مردتش عليها وازور مدوانتكم اللى فاتنى فيها مواضيع كتير (وش حزين )اتمنى يخلصوا قبل ما الترم التانى يبدأ
تحياااااااااتى
ايمى