اهلا بيكم كلكم

(غلطة مطبعية ترحب بكل زوارها الاعزاء وبتمنى ليكم قضاء وقتت ممتع ومفيد فى مدونتى المتواضعة )

روعة الايمان

روعة الايمان

جوهرة الحياة هى ذكر الله

جوهرة الحياة هى ذكر الله

الأحد، 14 فبراير، 2010

انظر بقلبك



عندما تشعر بأن الكون ثابت من حولك لا يتغير ......عندما تشعر ان الاشخاص كما هى لا تتغير .....وعندما ترى ظواهر الاشياء فقط

فانت اذا تحتاج الى لحظة تأمل

فالتأمل هو مصدر الطاقة الروحية ......وانعاش العقل...... وراحة القلب .....والاحساس بالسكينة والهدوء

فعندما تتأمل الاشياء من حولك يمكنك ان تشعر بأن الجماد يخاطبك... وان الحيوان يرسل لك رسالة عبر عينيه... وأن الورد يداعب خدودك ......وان الكون من حولك يتغير كل يوم عما قبله

قال الفيسلوف هنرى دافيد (ما اتفه ان يجلس ليكتب من لم يقف ليعيش )

كم من المرات خاض احدنا التجارب وعاش فيها ولم يستفد منها شيئا وذلك لانه لم يتوقف عندها ليتأمل تفاصيلها واسبابها ويحدد مدى الاستفادة من هذه التجارب

احيانا كثيرة يحكم البعض منا على ظواهر الاشياء ولا يحاول ان يتامل ويتعمق ليصل الى باطنها

كم مرة حكمت على شخص بأنه سىء وانك سوف تبعد عنه ثم اكتشفت بعد ذلك انه عكس ما اعتقدت تماما وكم من مرة حدث العكس واغراك مظهر انسان واعتقدت ان هذا هو من يجب عليك صحبته لرفعة اخلاقه ثم ندمت على اليوم الذى عرفته فيه

لا تحكم على الاشياء او الاشخاص بظواهرها ولكن عليك ان تصل الى جوهرها الحقيقى

(ان الاصداف تحمل بداخلها اللآلىء فمن ينظر الى الصدفة وكأنها شيئا صلب بلا قيمة فلن يستطيع ان يصل الى اللؤلؤة التى تستقر بداخلها )


فكلنا مع زحمة الحياة وعمليتها وروتينها الممل وحركتها السريعة فقدنا احساسنا بالحياة واصبحنا نحلم بدقيقة نستريح فيها من هذه الضغوط ونريح فيها اعصابنا لكى نشعر بالهدوء الذى بدأنا نفقده تدريجيا

كم مرة جلست ورفعت عيناك الى السماء لتنظر ما اروعها وكيف رفعت بغير عمد .....كم مرة نظرت الى حيوان وتأملت تحركاته ...كم مرة نظرت الى الطيور وتمنيت لو انك تطير مثلها ....كم مرة نظرت الى نملة ورأيت كم هى نشيطة مخلصة فى عملها وتمنيت ان تكون فى مثل نشاطها

اذا لم تفعل ذلك فانك تحتاج اذا الى لحظة تأمل
لذلك فعليك ان تسترخى تماما ثم تأخد نفس عميق (مش النفس اللى فى دماغكم طبعا D:)
وتتأمل كل شىء حولك .......وعندما تجد ما يحيرك ضع علامة استفهام ؟؟؟.......ثم تعمق فى التفكير فى هذه الالغاز التى كونتها بنفسك ........وان لم تجد تفسيرا فاسئل واستفسر عن هذا .........وان لم تجد الحل فى اى من الكتب فاعلم ان للخالق اشياء مازالت تحير المخلوق .

فهى دعوة صغيرة الى التأمل

تحياتى

ايمى

الاثنين، 8 فبراير، 2010

فضفضة مع النفس


لما تكون متعود على حاجة من صغرك وعارف ان هى دى الصح ولما تكبر تلاقى الناس معظمهم بيعملوا عكسها ومع الوقت تبدأ انت كمان تعمل الحاجة دى زيهم بس مع احساس ان فى حاجة غلط لان عقيدتك وتفكيرك بدأت تتناقض مع تصرفاتك
ويبدأ الانسان يحتار وتحصل فجوة مابين عقله وعاطفته _اللى خايفة على زعل الناس وبدأت تفكر تانى فى كلامهم _
ولما يختار يسمع كلام عقله لانه الصح يلاقى ناس كتير بيلوموه انه ازاى ميعملشى الحاجة دى ويتهموه انه شخص معقد او غريب الاطوار
وفى اللى يحسسه انه شخص مثالى عن اللزوم مع انه انسان طبيعى بيعمل حاجة عارف ان هى صح
************************************************************
ساعات كتير الانسان بيتمنى لو مكنشى قابل ناس معينين مش علشان هما وحشين ولا علشان هو بيكرهم بالعكس علشان هو حبهم اووووووووى من كل قلبه وكان مخلص فى احساسه ده ........بس للاسف جه الوقت اللى اكتب فيه انه يبعد عنهم لظروف معينة
وتلاقى حاجة معلمة اوى فى قلبك صعب انك تشيلها او تنساها وان كنت بتحاول تتنساها وتعيش عادى لان الحياة لاتقف عند اشخاص معيننين

**************************************************************
عارف لما تكون قاعد وشايف اللى حواليك وهما بيضحكوا على بعض ويكلموا على بعض ويكدبوا على بعض بتحس انك مش قادر تصدق حد رغم انك عندك حدس قوى اوى للتمييز مابين الكويس والوحش بس حتى الناس بقت تعرف تمثل اووووووى انها كويسة
لدرجة انك بدأت تشك فى حدسك انت كمان

ونفس الاحساس ده بيجى لما حد تحصله مواقف وحشة كتير مع الناس بيبقى خايف يعرف الناس بعد كدة لانه اتشكل عنده احساس ان دايما النهاية هتكون خيانة
وكذلك لما حد بيفشل فى كذا تجربة عاطفية بيبقى خايف يحب تانى او يسلم قلبه لحد تانى
****************************************************************
اصعب احساس على الانسان انه يكون محتاج يفضفض اووووى ويكلم.. بس فى نفس الوقت مش قادر يكلم مع حد لانه متعودشى يفضفض مع حد غير نفسه واحيانا لخوفه من الناس او لخوف ان الناس دى متكنشى كتومة بالقدر اللى هو محتاجه
**************************************************************
عارفة انه بوست غريب حتى اسلوبه كمان غريب تحسوا حد مجنون كدة اللى كتبه وخاصة بعد غياب المدة دى كلها ربنا يكون فى عونكم بقى نياهاهاهاهاها
بجد احب اشكر جدااااااااا الناس اللى سئلت عليا فترة انقطاعى واحب اشكر اللى مسئلوش برضه عاتى جدااااا اكيد مشغولين
واتمنى متكونوش نسيتونى
طبعا محدش يقدر انا عارفة p:
***********
تحياتى
ايمى

الجمعة، 25 سبتمبر، 2009

عندما يحدث يتحول


طبعا كلنا دخلنا فى مناقشات ومحاورات قبل كدة كتييييييير بس اكيد اكيد مش كلنا طلعنا منها مستفدين

بس

فى اللى استفاد انه دمه اتحرق واتعصب ......وفى اللى عرف ان الناس كلها مبتفهمشى وهو الوحيد اللى بيفهم

سبحان الله له ف

ى خلقه شئوون

مفروض اللى اعرفه عن كلمة نقاش انه حوار بيتفتح ما بين شخصين او اكتربيحاولوا يوصلوا فيه فى الاخر لفكرة او حل منطقى

لكن ده يحصل لو احنا اصلا عندنا ثقافة احترام الرأى الاخر وعارفين يعنى ايه نقاش

لكن المعظم للاسف معندهوش الثقافة دى

ويااما بيتعصب لرأيه .....يااما بيكابر يعترف ان رأى اللى بيناقشه هو الصح


ده لو رسى على كدة بس وملقتشى نفسك متعور او محدوف عليك حاجة

فى مناقشات بتبقى مهازل وبتقلب خناقات فى الآخر

وترجع تقول ياريتنى ماكنت اتناقشت من اصله

بس انت اكيد ليك دور فى النقاش ده و ممكن تدير النقاش بمنتهى النجاح وممكن تكون سبب فى فشله

وعلشان تنجح

حاول تكون هادى ......تسمع اكتر ما تكلم........ وبعدين اعرض رأيك ووجهة نظرك

طبعا اللى قدامك هيدافع عن رأيه فى الاول

لاقيته من النوع اللى بيتمسك برأيه وبيكابر وهو عارف انه غلط انسحب من النقاش لانه ساعتها هيتحول لجدال لا يجدى نفعا

يقول الإمام علي بن أبي طالب : " ما جادلت جاهلا إلا وغلبني وما جادلت عالما ًإلا غلبته"

لكن لو لاقيت اللى قدامك بدأ يسمعك ويأخد منك كمل معاه النقاش للاخرر حتى لو مش مقتنع برأيك بس على الاقل احترم النقاش ده وكان محترم فى اسلوبه ومنقاشته

يعنى اللى عايزة اقوله اننا لازم نحترم رأى الاخر حتى لو مش مقتنعين بيه ....لان مفيش رأى صواب 100% كل رأى يحتمل الصواب والخطأ وهنا يأتى دور عقلك فى موازنة الامور والسلبيات والايجابيات وتشوف الرأى ده هو اقرب للصواب ولا للخطأ

{فبشر عباد الذين يستمعون القول فيتبعون أحسنه أولئك الذين هداهم الله وأولئك هم أولو الألباب}
صدق الله العظيم [صورة الزمر: 17،18]

كن حذرا ولا تجعل نقاشك يتحول الى جحيم


تحياتى

ايمى

الثلاثاء، 22 سبتمبر، 2009

عذرا..عفوا ...عدنا ...اى حاجة بحرف العين

كل سنة وانتم كلكم طيبين ولوانها متاخرة اوووووووى انا عارفة.......... بس الحمد لله انى لحقت اقلها قبل ماالعيد يخلص

وعلشان احنا فى عيد ومفضلشى منه غير ساعات قليلة وعلشان تسامحونى... فاللى عايز عيدية يلحق يطلبها بسرعة بسرعة

بجد سورى كمان مرة للتأخير فى العيد والغيبة فى رمضان

وادى العيدية اهى

واللى عايز عدية غير دى يلحق يطلبها مش هكررها تانى..... اللى يتاخر ذنبه على جنبه

وده كحك العيد



تحياتى

ايمى
.

الاثنين، 17 أغسطس، 2009

فاصل ونواصل

كل سنة وانتم طيبين ورمضان كريم عليكم كلكم
هاخد فـــــــــــــاصل من هنا ونواصــــــــــــل بعد العيد
علشان ارجع اكل الكحك معاكم
واخد العدية منكم
هتوحشونى اوى
وياريت اللى يفتكرنى يدعيلى من قلبه
تحياتى
ايمى

الخميس، 13 أغسطس، 2009

لحظاااااات


يتأرجح الانسان دائما بين لحظات تحمل الكثير من التناقضات فحينا يشعر بحزن عميق وحينا اخر يشعر بسعادة تغمره حتى انه احيانا يصل الى درجة يشعر فيها انه طائر من السعادة ويشعر ان الابتسامة اصبحت جزء من وجهه لا تفارقه

وبالرغم من هذا لا يتذكر الانسان دائما الا كل ماهو حزين وينسى او يتناسى لحظات السعادة ويعتبرها قليلة فى عمره
ونجد البعض يردد (حياتى كلها حزن وغم )(انا مش عايزة اعيش )(ياااااه الناس بقت وحشة اوى )(الدنيا غدارة )(مبقاش فى صحاب )
بالرغم ان لحظات السعادة اكثر بكثير ولكننا دوما لا نستطيع ان ننسى احزاننا ونجعلها دائما تترك بصمة فى قلوبنا
لماذا لا نتغلب على احزاننا دوما بتذكر لحظات سعادتنا

دعونا نسترجع سويا كم شعر كلا منا بلحظات سعادة

الم تبكى يوما من خشوعك وانت بين يدى الله ثم تشعر بعدها بانك قمة فى السعادة .

الم تساعد يوما شخص ما احتاج اليك ثم شكرك وكنت سعيدا بقضاء حاجته ووضعت رأسك على وسادتك وانت تشعر بكامل سعادتك .

الم تجلس يوما مع اسرتك تضحكون وتتجادلون ثم شعرت كم انت سعيد وسطهم وحمدت الله بأن رزقك خير انيس لك .

الم تجلس يوما الى اصدقاءك لتتسامروا وتضحكون وتحثون بعضكم البعض على طاعة الله

الم ترى المناظر البديعة التى خلقها الله لنا بجلوسك على البحر او بمرورك من على شاطىء النيل او بالنظر الى السماء او القمر ليلا .

الم تشعر بان الله رزقك حبيب حبيبة او زوجة زوج تجدهم دائما الى جانبك يلطفون عليك متاعب الحياة ومشقتها .

الم تحقق يوما ما حلم لك او شعرت بانك تقترب من احلامك يوما بعد يوم

الم ترى ابتسامة طفل جعلتك اسعد شخص ثم تلعب معه وتجد نفسك قد نسيت الحزن الذى بداخلك وشعرت انك طفل مثله .

الم ترى يوما ما نتيجتك مكتوب بها ناجح او تقدير مرتفع وفرحت فرحا شديدا .

الم تكن سعيد عندما انجزت عملا تحبه وحققته بنجاح كامل .

الم تكن سعيدا حينما شعرت بصديق لك يساندك وقت حاجتك اليه .

الم تشعر بكل هذه الاحاسيس يوما ما ومنها ما يتكرر يوميا


عليك دائما ان تتذكر كم من مرات وهبك الله النعم التى تجعلك دائما سعيد وعليك ان تجعلها تترك بصمتها فى قلبك وتجعل الحزن ماهو الا حادث عابر تتعظ منه او تزداد قوة وحكمة
وعليك ان تكن موقنا بان الله يأتى دائما بكل ماهو خير لك .

تحياتى

ايمى

السبت، 8 أغسطس، 2009

حيث اجتمعنا

المفروض انى كنت محضرة بوست تانى بس بصراحة مقدرشى افوت لقاء النهاردة من غير مااصدعلكم دماغكم كالعادة




النهاردة حيث اجتمعنا فى الازهر بارك فى لقاء للمدونين




بجد كااااان يوم ممتع جداااااا وبصراحة اتعرفت على ناس كتير محالفنيش الحظ انى اتعرف عليهم قبل كدة او ادخل مدونتهم بس فعلا ناس راقية ومحترمة اوى وياريتنى كنت عرفتهم من زمان




رحت فى الميعاد لاقيت :




ستيتة بجد حد راقى اوى وهادى جدا وعقلية جميلة وبتقدر تفكير الشباب اوى وكفاية انها ادتنا فرصة جميلة للقاء ده




وفاتيما حسيت فيها بحنان جميل اوى وبجد حد عواطفه رقيقة وانا اعتبرتها اختى الكبيرة لو هى تسمح يعنى واهم حاجة انها جبتلنا بسكويت ههههههههههههه




وكان موجود مصطفى صاحب مدونة مش عارف حد طيب وتلقائى وفضل معانا للاخر




ومحمد غالية حد محترم اوى وصاحب فكر يحترم وكفاية دعوته الدائمة للسعادة والتفاؤل ربنا يكرمه وكان معاه اخته كمان




وبعددين بقية الناس بدأت تيجى




هند صاحبة مدونة دموع الملائكة بالفرنساوى ههههههههه


ورنيم صاحبة مدونة المبتسمة دائما اللى خلتنى اكتبلها اوتجراف ومتقدرشى تنكر p:


واختهم الكبيرة كانت معاهم




وجه عموو فشكوووووووول صاحب الاراء المختلفة دائما تحت شعار نحن نختلف عن الاخرين :)


ربنا يخليك ياعمو فشكول ويديك طولة العمر




ومسدس صغير بس هو طلع مسدس طويل p:


واينوووو صاحبة مدونة رقة الاحساس اللى دايما اقلها اسم على مسمى




وجت كيكى وفتاة حالمة وكان معاهم شنطة ومش هسيح واقول فيها اكل وكدة ولا هقول اى حاجة D:


وجه احمد ابو العلاااااااا وياسر صاحب مدونة ومضات




وبعدين بقى دخلنا قعدنا جوة فى مكان كان ضلة وجميل بغض النظر عن الناس اللى اتحرقت من الشمس هما عارفين نفسهم




وشوية جوم




ميمايا وعادل ورامز عباس وخالد فودة وهانى صاحب مدونة نط فى الكوز وبدراوى




وبعدين جه مصطفى حسان اقلنا شعر من كتابه الجديد




وانفض اللقاء الساعة 3 تقريبا ودعوة للانصراف




كل الناس مشيت تقريبا وفضل انا واخت محمد ومحمد ومصطفى وابووووووووعلى اتصل وقال انه جاى




بجد كان نفسى اشوفه جداااا لانه شخص انا بحترم فكره جدا ودعوته للتغيير وقعدنا نتكلم تقريبا لحد 6 ونص


وميرسى يا ابو على على التوصيلة دى كلك جدعنة وذوق طول عمرك




وكريم مش زى ناس صحابنا اكيد عارفهم ياابو على وهما عارفين نفسهم p:




كان نفسى اشوف ناس كتير المفروض انها كانت جاية بس قدر الله وماشاء فعل


يارب اليوم ده يتكرر تانى


كنت سعيدة جدا بلقائكم


ومع تحياتى
مراسلتكم من وراء شاشة الكمبيوتر

ايمى

الاثنين، 20 يوليو، 2009

بنتى ضنااايااااا

بنتى ضنايا كملت اول سنة ليها

وطبعا انتم عارفين ان البكرى دايما ليه معزة خاصة فلازم اعمل احتفال يليق بمقام بنتى

كل سنة وانتى طيبة يا حبيبتى

كل سنة وانتى طيبة يا مدونتى

محدش يستغرب انى بقلها بنتى لانها اتولدت قصاد عينى وعلى ايدى وفضلت تكبر معايا لحظة بلحظة وكنت بزوقها بايدى

بزمتكم تبقى بنتى ولا مش بنتى ؟؟!!
.
.

مش عارفة اقول ايه بجد والله بس كانت من اروع التجارب بالنسبة لى فعلا لاقيت ناس بتحبنى بجد وعرفت ناس بقوا خلاص متمركزين فى الناحية الشمال عندى (قلبى يعنى للى ثقافته عنجليزىD: )

بشكر سفروتة شكر خاص لانها كانت سبب فى دخولى عالم التدوين طبعا هتدعوا عليها انا عارفة ههههههههههههههه
اوعوا اوعوا حد يدعى على سفروتى هى اه كانت سبب فى ان واحدة غلسة ومصدعالكم دماغكم دايما تدخل عالم التدوين بس مهما يكن برضه سفروتة دى بنتى يعنى اخت مدونتى p:
.
.

بشكر كل واحد فيكم كان بيعتبرنى زى اخته او بنته بجد .......بشكر كل حد فيكم رفع من روحى المعدنية فى وقت كنت محتاجة فيه كلمة طيبة وابتسامة من القلب .....بشكر كل حد فيكم ادانى نصيحة بجد وكان نقده بناء وغير جوايا حاجة

بشكر كل واحد فيكم كان قلمه بيدعوا للحق ومبيخافشى من حاجة مهما كانت ........بشكر كل واحد كتب فى مدونته حاجة لمستنى او زودتلى معلوماتى

بجد والله بحبكم اوووووووووووى ومهما قلت مش هعرف اعبر
.
.

وفى ناس كتير غابت عن التدوين بس بجد مينفعشى انساهم وهفضل فاكراهم واتمنى لحظة رجوعهم تانى

واخيرا بعتذر عن اى حاجة عملتها ممكن تكون ضايقت حد فيكم وبعتذر عن عدم متابعتى لمدوناتكم الفترة الاخيرة
بس انا عارفة انكم شايلينلى معزة كبيرة او حتى خروف وهتسامحونى D:
************

يلا ده مش وقت الكلام ده وقت الطعام كلوا
نونو نونو علشان بنتى متتخضش ههههههههههه






كل سنة وكلكم طيبين وبخير وسعادة وحب
.
.
تحياتى
ايمى

الجمعة، 10 يوليو، 2009

مهازل مرئية

بسم الله الرحمن الرحيم
((ان الله لا يغير ما بقوم حتى يغيروا ما بانفسهم ))
كلنا عارفين كويس ان فى مهازل كتير اوى بتحصل فى حياتنا.......ناس بتبيع ضميرها ,ناس بتقبل رشاوى واللى يقلك اكرامية غير الكوسة وساعات بسلة علشان اللى مبيحبوش الكوسة وكدة يعنى :)

مش عارفة اقول ايه بس لما الوضع ده يبقى عينى عينك كدة وكلنا شايفينه وساكتين يبقى اكيد احنا كمان غلطانين

انا عارفة ان اللى بقوله ممكن ميكنشى مقنع بالنسبة لكتير منكم بس اللى بيخلينى اكلم ان نادر اوى لما اشوف حد بيحاول يغير الاوضاع لكن معظمنا بيتكيف مع الاوضاع وبنشوف الغلط ونقول عدى عدى... هو ده اول واحد يغلط يعنى فى غيره غلطوا قبل كدة كتير
ومش بس كدة ده المضحك كمان دلوقتى ان اللى يمشى صح يبقى حاجة من اتنين ياما شخص مثالى نادر مينفعشى يعيش فى وسطينا
ياما مجنون وبيتكلم فى حاجات خرافية

كل واحد فينا بيشوف مهازل كتير فى مهنته او فى مجال شغله عموما
حبيت اتكلم من منظور بيطرى شوية (الحنين بقى والانتماء انتم عارفين ههههههههههه)
لما الطبيب البيطرى اللى مفروض مسئول عن حماية الحيوان والمحافظة على صحة الانسان يتقاضى رشوة مقابل انه يسمح بدبح حيوان غير صالح للدبح
لما الطبيب البيطرى يبقى واقف مهزوز وخايف قدام الجزار لحسن يرفع عليه سكينة
لما نلاقى ان فى امراض بتدخلنا عن طريق اللحوم او المنتجات او الحيوانا ت والطيور المستوردة يبقى راحت فين الرقابة

يبقى راح فين ضميرنا :(

ده طبعا مبيحصلشى فى مجال الطب البيطرى لوحده لا بيحصل فى مجالات كتير

لما تلاقى عمارات بتتبنى وتانى اسبوع بتتهد علشان الغش فى مواد البناء وتوفير التكلفة

لما نلاقى الطبيب بيعمل عمليات مفهاش اى نسبة شفاء او الحالة مش محتاجها لمجرد انه ياخد فلوس

وغير ها كتير ................

كل اللى احنا وصلناله ده احنا السبب فيه لاننا بعنا ضميرنا ومفكرناش فى اخرتنا يوم ما نقابل رب اسمه الكريم

نعيب زماننا والعيب فينا......... وما لزماننا عيب سوانا

انا عارفة ان الكلام ده انتم حافظينه صم بس انا اتعودت انى اقول اللى مضايقنى وانا معاكم ومستنية اسمع رأيكم واتمنى انكم تجاوبوا على الاسئلة دى وبصراحة
*هل انت ممن يسعون للتغيير ام ممن يتكيفون مع الاوضاع ؟؟؟؟؟؟؟وياريت لو فى موقف حصلك تذكره
*ايه الحلول المنطقية للتغيير او الحد من اللى احنا فيه دلوقتى من وجهة نظرك ؟؟؟؟؟؟؟
*هل انت ممن ينظرون الى من يريدوا تغيير الاوضاع على انهم اشخاص مثاليين او مجانين ؟؟؟؟؟؟؟؟

*******************************************************************
ملحوظة
انا نجحت يا جدعااااااااااااااااااااااااان يلا بقى عايزة اسمع زغرودة حلووووووووة اوى

لولولولولولولولولولى

ومش مصدقة انى هدخل رابعة خلاص عجزت بدرى بدرى وراح زمن الشباب
عقبال امتحان التدريب علشان ابقى خلصت من السنة بتدريبها
يلا اديكم على حلاوة نجاحى
نياهاهاها
تحياتى
ايمى