اهلا بيكم كلكم

(غلطة مطبعية ترحب بكل زوارها الاعزاء وبتمنى ليكم قضاء وقتت ممتع ومفيد فى مدونتى المتواضعة )

روعة الايمان

روعة الايمان

جوهرة الحياة هى ذكر الله

جوهرة الحياة هى ذكر الله

الجمعة، 18 يوليو 2008

ح(حلم)---ل(لازم)---ى(يتحقق)

بسم الله الرحمن الرحيم

وانا صغيرة كنت دايما بحلم

كنت بحب الرسم جدا وبعرف ارسم لدرجة كنت بجيب الدرجات النهائية وادخل مسابقات

فحلمت اكون رسامة كبيرة

ساعات كتير واحنا صغيرين مبنشفش الامور واضحة ودايما شايفين الحاجة اللى قدامنا بس مش اللى وراها

فكنت بحلم اول مادخل الكلية ارشح نفسى فى انتخابات الاتحاد لحد مااوصل لامينة اتحاد واعمل كل االى الطلبة تعوزه

حلمت اكون مشهورة فى اى مجال هكون فيه

حلمت اكتشف حاجة فى مجال الذرة

ولسة بحلم

بس طلعت احلامى فيها غلطات مطبعية

مبقتش رسامة لانى منمتش الموهبة لانى كنت صغيرة ومحدش اهتم بموهبتى فاختفت وادفنت تحت التراب الناتج من مشاغل الحياة (وبالمناسبة دى اهدى لموهبتى اغنية ايها الراقدون تحت التراب )

منكرش انى حققت حلمى اه ودخلت اتحاد الكلية بس للاسف اكتشفت ان تحقيقى للحلم ده بالذات كان اكبر غلطة مطبعية لانى ملقتهوش فى خدمة لطلبة ولا حاجة انا لقيت الموضوع كله اصلا غلط

لاقيت ناس بترشح نفسها وناس بتنتخبها ومع ذلك مبتنجحش

لاقيت ناس اترشحت ومحدش انتخبها ومع ذلك نجحت

لاقيت ضغوط من ناس علشان ننتخب حد معين

ولما طنشت كل ده وعرضت مطالب الطلبة قوبلت بالرفض لعدم امكانية تنفيذها رغم ان فى منها حاجات فعلا اتحققت دلوقتى طب ليه مش من الاول( له فى خلقه شئون )

وعرفت انى وانا صغيرة كنت شايفة اتحاد الكلية زى ماكانوا بيعرضوه فى الاعلام مش زى الحقيقة المؤلمة

بس طول مانا ماشية فى حياتى كنت بتاكد دايما ان كل واحد مننا لو حط فى دماغه حلم معين فهو اكيد هيحققه

كل واحد فينا جواه طاقة كامنة مش كلنا بنعرف نطلعها ونستغلها وده ليه عوامل كتير اوى حوالينا مش كلها بايدينا

لو بصينا لبيل جيتس هنلاقى من وهو صغير بيقول انا هبقى اغنى واحد فى العالم وهبقى صاحب اكبر شركة عالمية

وبالفعل قدر يحقق حلمه وبقى صاحب شركات الميكروسوفت وبقى اغنى واحد فى العالم

انا عايزة بس اقول ان لو كل واحد بص لاعماق نفسه هيلاقى كتير جدا ممكن يقدر يحقق حاجات عمره ماكان يتوقع انه اصلا بيعرف يعملها

وكلامى ده كله بناء عن تجارب شخصية

المهم اننا نحلم بدون اى قيود

يلااااااااااااااا عايزة اسمع احلامكم

وبصوت عالى علشان الكل يسمع

مستنياكم

هناك 26 تعليقًا:

نعكشة يقول...

مممممممممممممممممممممممممممم

بحلم بحلم بحلم


قبل ما اقولك انا بحلم بإية

فيه حاجة كدة
في نظام التخطيط للحياة
انك تحددي الحلم ( الهدف الأسمي)
و تحددي شوية احلام صغيرة تهدف الحلم دة ( الهدف القريب)

فلو نجحتي ف يالاهداف القريبة
هتحققي الهدف الكبير
بمعني

انا هدفي بقة ( حلمي هحلم بقة بكيفي)

اني اعمل مستشفي كبيرة الغني فيها زي الفقير
علي اعلي مستوي
و كل الادوات الطبية و المكينات الطبية
تتصنع في مصانع مصرية او عربية او اسلامية المهم احنا اللي نصنعها

و هشغل ناس من اعلي الجهات

دة الحلم الاسمي

الاهداف الصغيرة القريبة لتحقيقي حلمي

اني مثلا لحد دلوقتي اخلص من كليتي بتقديرات كويسة
اخد دورات تدريبة
بعد ما اخلص منا لكلية
اخد ماجستير و دكتوراة
ألاقي حد عندة فلوس و نعمل مستشفي محندقة
بنفس النظام الغني زي الفقير
و نتتطور
حتي نصنع مصانع
و بالتالي وصلنا للهدف الاسمي
برغم صعوبة هذا الحلم
إلا انه مازال يراودني

دمتي سالمة

سلامٌ عليكي

طلب صغنطط لو بصيتي تحت التعليقات هتلاقي فيه ( تأكيد الكلمة) منكن تشيلية؟؟؟؟

مرسيخ

سفروتة يقول...

انا وانا صغيرة كنت بحلم احلام كتير اوووووووووووووووووووووووووووووووي

بس بعد كده ابتدت ملامح الصورة تتضح امامي وخلاص كونت الحلم اللي بتمني من ربنا انه يتحقق

نفسي اعمل اكبر مركز لابحاث الجينات في العالم

صحيح الحلم ده محتاج مجهود جبااااااااااااااااااااااااااااااار

ومطلوب مني حاجات كتير قووووووووووي ...عشان يتنفذ

والحمد لله وجدت صديقة اخري من ايام الثانوية العامة بتحلم بنفس الحلم ...واتفقنا اننا نعين بعض

تعرفي يا ايمي من كتر ما انا متمسكة بالحلم ده ...انا عاملة خطة الماجيستير بتاعتي من دلوقتي

وكاتبة عليها خطة ممكن تكون وهمية من انسانة متفائلة

نفسي كل المواد اللي بنستوردها من برة عشان ابحاث البيوتكنولوجي تتصنع في المركز ده اللي بحلم بيه

عشان منجيبش حاجة من برة...وعشان تبقي الحاجة دي متوفرة عندنا باستمرار ومنستناش دورنا...زي ما بنستني ست شهور علي ما تيجي المواد دي

المهم

انا حاليا حطيت قدامي النقط اللي هتساعد في تحقيق الحلم ده واول نقطة هتكون الاسبوع الجاي ان شاء الله

ويااااااااااااااااااااااااااااااااااااااااااااااااااارب الحلم ده يتحقق


رغيت كتير انا...بس انتي عارفاني رغاية

:))

سفروتك الصغيرة

EMMY BABY يقول...

كلامك مظبوط جدا يانعكشة

فعلا لازم يكون فى هدف اسمى
ويكون فى احلام كتير جانبيه


بس سواء هو حلم كبير او هو صغير فاحنا برضه فى ايدينا نحققه

وبجد حلمك جميل جدا لو قدرتى تحققيه هتبقى حققت الكلام اللى بقول عليه

وانا واثقة انك ان شاء الله هتقدرى تحقيقه


انا برضه عندى احلام كتيييييييييييير بس مرضتش اذكرها لحسن تزهقوا

ربنا يكرمك وتحققى اللى بتتمنيه

وتحلمى اكتر واكتر

وبجد اتمنى انك تكونى من اصدقاء المدونة

وبالنسبة لطلبك فمن عنيا هعمله حاضر

تحياتى

ايمى

EMMY BABY يقول...

سفروووووتى الصغيرة

يارب تحققى حلمك

هتريحى كل الباحثين

وانا واثقة برضه انك هتقدرى طول مانتى عارفة انه محتاج مجهود جبار ومع ذلك بتسعى فيه من دلوقتى

فده اكبر دليل ان احلامك مش احلام يقظة

بالعكس انتى عارفة كويس ازاى تقدرى تحققيه

بجد اتمنالك كل خير وتحققى احلامك كلها

وتسيبى بصمة فى علم الجينات

ربنا يكرمك يابنت انتى على رايك

تحياتى ياسفروتى العزيزة

ايمى

oRiGiNaL HeArT يقول...

تقريبا حياتنا كلها غلطات مطبعية على شاكلة غلطتك
انا بردو كنت بحلم انى اكون رسامة كبيرة كنت برسم حاجات حلوة اوى وادخل مسابقات بس فى المدرسة بس يعنى ولا كانى كنت بعمل حاجاة ومع مرور الوقت بدات اهتم بالدراسة اكتر ونسيت الرسم خالص
حتى دلوقت مبعرفش ارسم وردة رغم انى عندى رسومات من ابتدائى واعداى جميلة جدااا
وكنت عاوزة ادرس موسيقى وكنت بحبها اوىى
بس لما عرفت انها حراام قلت بلااااش منها
دة بالنسبة للجانب الفنى
بالنسبة للجانب الدراسى
كان املى انى ابقى دكتورة
كان نفسى اوى ادرس طب من اول مادخلت حضانه وانا حلمت انى البس البالطو الابيض فى يوم من الايام
وكنت طول عمرى شاطرة وكنت بطلع الاولى ويتعملى حفلات تكريم يعنى كنت ابشر بالخير
لغاية ماجت الثانوية العااااامة -منها لله - جيت ادخل علمى قالولى شايفة مين عملت اييه وفضلت تاكل فى نفسها وفى الاخر فرقت معاها على درجة ومطالتش ابيض ولا اسود
وووو
وامثلة كتيير
جالى احبط
دخلت ادبى وانا بكرهه
واول لما دخلت ادبى حسيت انى مينفعش احلم تانى
خلاص بقى انا مبحققش حاجة يبقى موجعش دماغى من الاول
تقريبا -او اكيد يعنى -ضعف ارادة :(
اسفة جداا على الرغى
:)

Tamer Alhosiny يقول...

عزيزتي ايمان

اولا احيكي علي اول غلطه بجد غلطه كبيره قوي وجميله وفيها فكره

ثانيا
كنت في الطفوله بحلم اني ابقا قبطان بحري
زي جدي واتعلم العزف علي الجيتار
وافضل اعزف كل يوم وقت الغروب علي ظهر المركب وحواليه الطيور

وفي مركله متقدمه بدات احلم اني ابقا مهندس
وبدات في نحقيق الحلم ده
لكن بعد كده تخلت عن الحلم ده لانه مكنش نابع من جوايا
وكان حلم والدي اني ابقا مهندس

وجت الفتره الاهم فبي حياتي الاي مش بقيت احلم فيها
لان كلمة الحلم في حياتي تحولت لكلمة هدف
وبقيت احط اهداف
واصنف الاهداف
اهداف قصيرة الاجل واهداف طويلة الاجل
طبعا ده نتيجة دخول علم البرمجه اللغويه العصبيه في حياتي
وتغييرها للشكل الاي كنت اتمناله

اما عن هدفي القريب الاجل
اني اتجوز :)
اما حلمي البعيد الاجل اني ابقا صاحب اكبر مركز للتنميه البشريه
في الشرق الاوسط
ده طبعا حلم قابل للتعديل
يعني لو جاتلي فرصه اني ابقا رئيس الجمهوريه في النص مش هرفض طبعا
وده اسمه مرونة الاهداف
هههههههههه

تحياتي
انسان عاشق حر
تامر الحسيني سابقا

Cold air يقول...

السلام عليكم

أولا أحب أمسي في الزيارة الأولي لي علي غلطة مطبعية
اسلوبك في الكتابة لذيذ و شيق و أكيد لو كنت دخلت عالم الفن كنت هتبدعي فيه بس احنا لسه فيها ارسمي انت بس و ورينا و اعتبري غلطة مطبعية معرضك الدائم و احنا زواره الدائمين برده
اما بقي حكاية بحلم بإيه دي
فمش هتنفع في تعليق و لا اتنين دي عايز بوست لواحده لكن مش هزعلك و هقول علي حلم صغنون قد كده
نفسي أعيش في هدوء وده أحسن جو الواحد يقدر يحلم فيه و يحقق أحلامه

مع تحياتي

EMMY BABY يقول...

اورجانيل هارت

احساسك بيعجبنى

انا من رأيى ان مش علشان حلم او حلمين ضاعوا يجيلك احباط صدقينى لو فكرتى كويس هتلاقى احلام كتير غيرها اتحققت

طول مانتى داخليا مقتنعة انك مينفعشى تحلمى تانى لان اى حلم بيبوظ

فده هيكون سبب فى عدم تحقيقه لانك بتبعتى لمخك رسايل نيجاتيف

حاولى تبعتى رسايل بوستيف لمخك يعنى انا هحلم وهقدر ولازم احققه

ةصدقينى مش هتندمى

تحياتى ليكى واتمنى انك تحققى حلمك اللى الجاى

وحياتك تكون احسن من اللى فات

EMMY BABY يقول...

ياسلام عليك ياتامر وعلى احلامك

بجد فيرى نايس واحلاهم العزف على الجيتار وقت الغروب روعة انا بحب منظر الغروب جدا ولما بشوفه بحس انى مش عايزة اتحرك لحد مالشمس تختفى خالص

اما حكاية دخولك فى مجال البرمجة اللغوية العصبية فهو بجد مجال الناس مفتقداها يعنى لو اقتنع بيه هيحققه من خلاله حاجات كتير

بس هما بس معلق معاهم انا مش قصير قزعة انا طويل واهبل هههههههههه

اما بالنسبة لهدفك قريب الاجل ربنا يرزقك ببنت الحلال اقولوا امين بزمة علشان يبقى خلصنا من واحد

وهدفك طويل الاجل والقابل للتعديل فانا واثقة انك ان شاء الله هتبذل قصارى جهدك فى تحقيقه

تمنياتى لك بالنجاح والتوفيق

وتعالى هنا قلنا بقى لو مسكت رئيس جمهورية هتعمل ايه ؟؟؟؟؟؟؟؟؟

رغاية انا معلش بس لازم وحتما ولابد


وميرسى جدا لمرورك

تحياتى

EMMY BABY يقول...

COLD AIR

وعليكم السلام ورحمة الله وبركاته

وربنا يكرمك على الكلام الحلو ده

انا لسة بعرف ارسم بس انا كان نفسى الموهبة تكبر عندى مش تفضل كدةمحلك سر بصوا وشوفوا رسوماتى انما ايه فى السرررررر هههههههه

كنت ارغى براحتك وانا اروح اجيبلك ورق تانى متخفش

بس فعلا اهم حاجة الاحساس بالهدوء اللى بيدينا بالقدرة على الاسترخاء بجميع انواعه

ولما نشعر بالاسترخاء بيساعد على التأمل فبنقدر نفكر صح

تحياتى لك على هذا الحلم الصغنون

ايمى

عمرو وجيه يقول...

بوست بيناقش موضوع مهم جدا


لى عودا معلش يا إبمى أصل النت فاصل


هتلكم عنه لان كان شاغلنى قوى الفترة اللى فاتت

EMMY BABY يقول...

دونت ورى ياعمرو

نحن فى انتظار قدومك وتشريفنا بالمناقشة

تحياتى

Unknown يقول...

احلى حاجه الحلم بس الاحلى من الحلم انه يتحقق والاحلى انك تسعى فى تحقيق الحلم دا او الهدف دا وتحطيه قدام عينك ف كل وقت


يعنى انا مثلا بحلم اكون مهندس كمبيوتر
مثلا يعنى

يبقا لازم اهم بالكمبيوتر ويكون ليه الاولوية ف حياتى

وابقى وانا بذاكر حاطط يوم النتيجه قدام عينى لما اجيب درجه تدخلنى هندسه واحط قدام عينى الفرحه بتاعت النجاح

وغير كدا ابقى ماشى ف الشارع وكأنى مهندس كمبيوتر انا بقول مثلا ها

ارجو تقبل مرورى ومدونتك جميله بجد
ارجو التواصل بيننا

ومتحريمناش من تعليقاتك
حستناكى على مدونتى المتواضعه

Tamer Alhosiny يقول...

عزيزتي ايمان
تحياتي علي تعليقك الجميل ده
ومرسي قوي علي الدعوه الجميله
ليه علشان تخلصوا
ههههههههههههههههه

وعلي امنياتك الصادقه بتحقيق احلامي

اما بالنسبه للسؤال الاي دبستيني فيه
فده ممكن يكون اسهل سؤال في التاريخ
لان الاجابه سهله جدا

اول ما همسك الحكم اول شيء هعمله اني همهد لابني انه يبقا بعدي فيه
علشان الاسره تمتد
هههههههههههههههههههههههههه

لو عايزه اجابه بجد اوعدك هفكر شويه وهرد علي السؤال ده في بوست عندي في مدونتي

تحياتي ليكي
انسان عاشق حر
تامر الحسيني سابقا

blue-wave يقول...

مبدأيا اننتى عندك حق
الحلم لوحدة مش كفايه
لازم تحاول انك تحقق الحلم دا
انا كان حلمى انى اقدر اعبر عن اللى جوايا
وبحلم اعمل ملجأ ايتام وانا اكون المتكفل بيه
بس كفايه كدا:)))

EMMY BABY يقول...

المبرمج المحترف

شرفت المدونة

ماشاء الله عليك بالرغم ان سنك صغير الا ان احلامك واهتمامتك ممكن تتعدى سنك وده اللى مخلينى متفائللك خييييييييييير كتير جدا ان شاء الله

وخلى بالك كويس من الدراسة فى الفترة دى لان على اساسها بيكون مصيرك وتحديد اتجاهك بس مش دايما على فكرة

واحلى حاجة فيك انك بتبعت لمخك رسايل بوستيف
تحياتى

ايمى

EMMY BABY يقول...

ههههههههههه

من اولها ياتامر كدة ايه الديمقراطية دى كلها

ومنتظرين اجابتك الحقيقية ان شاء الله فى القريب العاجل

نورت المدونة

تحياتى

EMMY BABY يقول...

دكتور عمرو

شرفتنى بهذا المرور السريع

وهذا الحلم الروحانى الجميل ياااااااااريت بجد تحققه وتبقى تعزمنا كلنا فى الافتتاح

تحياتى

Ahmed Al-Sabbagh يقول...

والله رغم انها تدوينة لطيفة جدا لكن حسيت انى محتاج اعيط
يمكن عشان الكلام ده بيمسنى اوى او نفس اللى عايز اقولة ؟

احمد

NOONA بنت الإسلام يقول...

مدونتك رائعه يا ايمان

انا لييًا هدف واحد في حياتي ونفسي احققه وهو : إني انول رضا الله عز وجل ويبقي فعلا ربنا راضي عني وبيحبني

والهدف ده له عدة وسائل باحاول اتبعها وهي: بر الوالدين واني انجح في الكلية بالرغم اني بقيت اعدي بالعافية واني ادعوا الي الله وانشر الاسلام فلئن يهدي الله بك رجلا خيراً من الدنيا ومافيها ومن احدي الوسائل اني ارتبط فعلا بزوج صالح وانجب صلاح الدين ونثيبة والصحابيات الجليلة
انا ماليش اوي في الشغل ولا الحاجات ديت بصراحة
ان تدخلني ربي الجنة هذا اقصي ما اتمني
جزاكي الله خيرا

EMMY BABY يقول...

احمد

اولا انا سعيدة بمرورك لمدونتى

وبتمنى تكون عجبتك


وربنا ميجبش عياط ابدا وان شاء الله كلنا هنحقق احلامنا

وميرسى جدا على احساسك ده

تحياتى

ايمى

EMMY BABY يقول...

نونااااااااا حبيبتى

منورة والله


طبعاااااااا امنياتك نو كومنت عليها غير ربنا يوفقك بجد وتحققى كل اللى انتى عايزاه

وربنا يرزقك بزوج صالح فعلا يراعى ربنا فيكى

وتبقوا تجيبوا بيبى على اسمى ههههههه

نورتى المدونة

تحياتى

ايمى

seven يقول...

هوه انا عاوز اقول ملحوظة رفيعة
ان فى فرق بين الاهداف والاحلام
الاحلام حاجة بنبقة نفسنا فيها
بس الاهداف حاجة نفسنا فيها وبنجتهد عشانها او سعات
عيشين عشانها
غير ان الاحلام مش لازم تبقة واقعية الاحلام معلهاش جمرك يعنى
بس الاهداف لازم نشتغل على شنها
يعنى بيل جيست كان عنده هدف مش مجرد حلم
ووصله لما اشتغل عشانه
فعشان نحول الحلم لهدف لازم نشوف الاول امكانية تحقيقه
ولو الحلم مش خيالى سعتها ندور على سبل تحقيقه
ونستعين بربنا وان شاء الله تتحقق
بالنسبة لاهدفى بقة
هوه اكبر هدف فيهم انى ابقة مميز فى اى مجال ابقة فيه
اين كان المجال ده بس ابقة مميز فيه ومعروف فيه
ورلنا يوفقنى اوعمل كده
ويارب كل حد عندع هدف وبيسعى فيه ربنا يحققهولو

Ahmed Atia يقول...

ياااااااه الاحلام
نفسى العرب ياكلوا اكلهم بفاسهم هتلاقى قرارتهم من راسهم
نفسى نتوحد نعاقب الظالم ونعيش كويس بدل المرمطه اللى الناس عايشه فيها اما اهدافى الخاصه انى املك مدينه كبيره اوى بيها اكبر دار لرعايه الايتام والمسنين وذوى الاحتياجات الخاصه ومستشفى تعمل اللى مافى مستشفى فى العالم بتعمله انها تعالج وتكتشف ادويه وتساهم بجد فى خدمه البلد مش هدفها الفلوس بس واعمل نادى رياضى صح مش للفلوس للرياضه ولمحبى الرياضه فقط وممكن من البطولات نصرف عليه ومن اكتشافات المركز نصرف على االمستشفى ومن التبرعات والهبات بتاعتنا احنا نصرف على الدار وعلى المدينه الترفيهيه للاطفال والخضره تعم المكان يااااااااه ان شاء نسعى لتحقيقه

EMMY BABY يقول...

الله على احلامك ياحمد

طبعا زى ماعودتنا طموح اخر حاجة

بجد ربنا يقدرك وتقدر تحقق احلامك

وان شاء الله هتقدر

تحياتى

ايمى

EMMY BABY يقول...

seven

نورت المدونة واتمنى يكون البوست عجبك

وفعلا فى فرق بين الهدف والحلم ولعلمك انت ممكن تحقق اى حلم ليك لو كنت بتتمناه اوى

اما بخصوص حلمك فربنا يوفقك بس حاول تحدد من دلوقتى انت هتبقى فين بالظبط

وربنا يقدرك وتحقق حلمك مهما كان
تحياتى