اهلا بيكم كلكم

(غلطة مطبعية ترحب بكل زوارها الاعزاء وبتمنى ليكم قضاء وقتت ممتع ومفيد فى مدونتى المتواضعة )

روعة الايمان

روعة الايمان

جوهرة الحياة هى ذكر الله

جوهرة الحياة هى ذكر الله

الجمعة، 10 يوليو 2009

مهازل مرئية

بسم الله الرحمن الرحيم
((ان الله لا يغير ما بقوم حتى يغيروا ما بانفسهم ))
كلنا عارفين كويس ان فى مهازل كتير اوى بتحصل فى حياتنا.......ناس بتبيع ضميرها ,ناس بتقبل رشاوى واللى يقلك اكرامية غير الكوسة وساعات بسلة علشان اللى مبيحبوش الكوسة وكدة يعنى :)

مش عارفة اقول ايه بس لما الوضع ده يبقى عينى عينك كدة وكلنا شايفينه وساكتين يبقى اكيد احنا كمان غلطانين

انا عارفة ان اللى بقوله ممكن ميكنشى مقنع بالنسبة لكتير منكم بس اللى بيخلينى اكلم ان نادر اوى لما اشوف حد بيحاول يغير الاوضاع لكن معظمنا بيتكيف مع الاوضاع وبنشوف الغلط ونقول عدى عدى... هو ده اول واحد يغلط يعنى فى غيره غلطوا قبل كدة كتير
ومش بس كدة ده المضحك كمان دلوقتى ان اللى يمشى صح يبقى حاجة من اتنين ياما شخص مثالى نادر مينفعشى يعيش فى وسطينا
ياما مجنون وبيتكلم فى حاجات خرافية

كل واحد فينا بيشوف مهازل كتير فى مهنته او فى مجال شغله عموما
حبيت اتكلم من منظور بيطرى شوية (الحنين بقى والانتماء انتم عارفين ههههههههههه)
لما الطبيب البيطرى اللى مفروض مسئول عن حماية الحيوان والمحافظة على صحة الانسان يتقاضى رشوة مقابل انه يسمح بدبح حيوان غير صالح للدبح
لما الطبيب البيطرى يبقى واقف مهزوز وخايف قدام الجزار لحسن يرفع عليه سكينة
لما نلاقى ان فى امراض بتدخلنا عن طريق اللحوم او المنتجات او الحيوانا ت والطيور المستوردة يبقى راحت فين الرقابة

يبقى راح فين ضميرنا :(

ده طبعا مبيحصلشى فى مجال الطب البيطرى لوحده لا بيحصل فى مجالات كتير

لما تلاقى عمارات بتتبنى وتانى اسبوع بتتهد علشان الغش فى مواد البناء وتوفير التكلفة

لما نلاقى الطبيب بيعمل عمليات مفهاش اى نسبة شفاء او الحالة مش محتاجها لمجرد انه ياخد فلوس

وغير ها كتير ................

كل اللى احنا وصلناله ده احنا السبب فيه لاننا بعنا ضميرنا ومفكرناش فى اخرتنا يوم ما نقابل رب اسمه الكريم

نعيب زماننا والعيب فينا......... وما لزماننا عيب سوانا

انا عارفة ان الكلام ده انتم حافظينه صم بس انا اتعودت انى اقول اللى مضايقنى وانا معاكم ومستنية اسمع رأيكم واتمنى انكم تجاوبوا على الاسئلة دى وبصراحة
*هل انت ممن يسعون للتغيير ام ممن يتكيفون مع الاوضاع ؟؟؟؟؟؟؟وياريت لو فى موقف حصلك تذكره
*ايه الحلول المنطقية للتغيير او الحد من اللى احنا فيه دلوقتى من وجهة نظرك ؟؟؟؟؟؟؟
*هل انت ممن ينظرون الى من يريدوا تغيير الاوضاع على انهم اشخاص مثاليين او مجانين ؟؟؟؟؟؟؟؟

*******************************************************************
ملحوظة
انا نجحت يا جدعااااااااااااااااااااااااان يلا بقى عايزة اسمع زغرودة حلووووووووة اوى

لولولولولولولولولولى

ومش مصدقة انى هدخل رابعة خلاص عجزت بدرى بدرى وراح زمن الشباب
عقبال امتحان التدريب علشان ابقى خلصت من السنة بتدريبها
يلا اديكم على حلاوة نجاحى
نياهاهاها
تحياتى
ايمى

هناك 55 تعليقًا:

موناليزا يقول...

الف مليون مبروووووووووك
وعقبال السنة الجاية:)

romansy يقول...

اول تهنئه بالنجاح السعيد

ل



رومانسى

romansy يقول...

مش لازم نتكلم عن المهازل دلوقتى

جايين نبارك ونهنى

romansy يقول...

طب فين الساقع بقى

romansy يقول...

طب فين الساقع بقى

romansy يقول...

شكل العمليه ناشفه امشى احسن بقى

EMMY BABY يقول...

موناليزا

الله يبارك فيكى
ربنا يكرمك اللهم امين

تؤتؤ لن اسمح بالتهرب من التعليق على البوست الاساسى

p:

تحياتى

ايمى

EMMY BABY يقول...

رومنسى

تانى تهنئة ههههههههههههه

EMMY BABY يقول...

رومنسى لا لازم نتكلم دى المهازل اهم يابنى بلا نجاح بلا وجع قلب

الله يبارك فيك يا رومنسى

الساقع يالهوووووووووى على الطمع فين طب حلاوة نجاحى p:

لا يابنى ناشفة ايه انت فكرنى منين هه ركز p:

تحياتى

ايمى

mohamed ghalia يقول...

مليون مبروك على الناج
وأكيد العيب فين
نحن من نصنع هذه المهازل
دمتِ فى سعادة

ABOALI يقول...

ايمى
مبروك اولا
والنجاح مش غريب عليكى
لاءنك بنت موس
وكمان لو ايمى لم تنجح يبقى فعلا دى مهازل مرئية

دايما النجاح بيكون حليف الانسان المجتهد الواثق المحدد هدفه



اما عن حالنا

كما شرحه البوست

غياب روح الدين هى السبب الاساسى فى اللى احنا بنعانى منه

لاءننا اخذنا الدين انه مجرد طقوس فى المساجد او البيوت

ثانى حاجة
القدوة مهمة جدا يا ايمى

هى اللى بتشعل الهمم وتحفزها

ثالث حاجة
الاصرار والعزيمة

لاءن لما يكون الشخص عارف انه صح
هايبقى اكيد عارف انى الطريق مش مفروش بالورد وبه تحديديات


فى مثل شائع حاليا بيقول

رب صدفة خير من الف خطة

وده خلى الناس عايشة فى فهلوة وهمبكة

والناس مش عارفه
انه كما تدين تدان

يعنى اللى غشته النهاردة هايرجع ليك بكرة


اما عن اسئلتك

ممكن تقولى ان وضعونى على الاعناق
فسأمسك الغصن وارفع رايات الزيتون
تعالى هنا يا بلدى ها هو عزك المصون
يا من تقولون لا اله الا الله
الا تعرفون دفع الشك والظنون
الا تكونوا الخلفاء كما خلق رب الارباب
ارفعوا الهامات
فقدوتكم هامته كانت عالية
كان عنوان دعوته الشقاء
حتى وصل فكان قاب قوسين او ادنى
يا بلدى
حان الوقت لنكون ممن يفعلون
حتى نكون فى ربوة وظلال رابية



الحلول

نبدء تحويل الكلام الى الافعال
ونؤثر فى من حولنا بالسلوك
ونقول ستوب فى رعاية وحب


من يريد التغير انظر اليه كيف

يااااااااااااااااه
حبيبى وابن حبيبى وليه مصاصة هدية



ايمى احملى لواء التغير
وقولى لنفسك لن يكون نجاح بدون مسامير
وان كان فى العمر فمتو ثانية
فسأظل احمل لواء التغير


تحياتى

رؤية يقول...

اولا الف مبروك على النجاح ودايما كدا متفوقة
ثانيا: اما عن المهازل المرئية
فهى ليست مرئية فقط بل مسموعة ومقروءة لذلك صارت كالهواء تستنشقه فى كل مكان
وان كنت تسالين عن مدى قابليتنا للتغير فنحن نحاول ان نغير من حولنا قدر الامكان وان نصحح من انفسنا قدر المسطاع
لكن احيانا كثيرا يغلبنا الياس

ثالثا: ليكى تاج عندى اتمنى تقبليه

تحياتى

جحا المصرى يقول...

إنها حقا مهازل ليتها نتتهى
بس انا قاعدلهم بقى هههههههههههههههههههه
بس أوعى يكون فى حد سامعنى ههههههههههه
مبروك النجاح

سندس وأمل يقول...

مبروووووووووووووووووووووووووك
النجاح وبعدين مفيش هدايا المفروض الشهاده

هى الى تاخد:)ذيى كده يعنى انا عايزه هديتى

لما تخلصى كليه خالص يبقى ليكى هديه

(بخل) معلش بقى:)


وبالنسبه للمهازل احنا الى هنغيرها

فلازم كل واحد يبدأ من عنده

سلامات ياقمرايه:)

وادى الزغروطه.....لوووووووووووووووووووووووووووووووووووووووووووووووووووووووو
ووووووووووووووووووووووووووووووووووووووووووووووووووووووووووووووووووووو
ووووووووووووووووووووووووووووووووووو
ووووووووووووووووووووووووووووووووو
اى (ولا اجدعها زغروطه):)
قرى واعترفى....

سنديسووووووووووو

Rosie يقول...

أولا مبرووووووووووووك يا أحلى ايمى و عقبال البكالريوس و عقبالنا كمان..
كدة ده المضحك كمان دلوقتى ان اللى يمشى صح يبقى حاجة من اتنين ياما شخص مثالى نادر مينفعشى يعيش فى وسطينا
ياما مجنون وبيتكلم فى حاجات خرافية
يااه أنا مش قادرة أقولك أد أيه الكلام ده صح كأنك بتنطقى بلسانى..ده هم يبكى..
............
بالنسبة للأسئلة...
السؤال الأول..لحد ما آه..هو أنا بعمل حاجات مختلفة عن اللى الناس بتعمله..بس بتبهدل بهدلة فى الموضوع ده..
الحل أن الناس تشوف التغيير كحاجة حلوة مشرفة مش حاجة تكسف ..و نصدق انه ممكن..
السؤال التالت..و لا مجابين و لا مثاليين..هو يا كده يا كده..لأ بانظر لهم انهم أشخاص طبيعين بيفكروا صح ..بيعملوا اللى عاليهم..

الازهرى يقول...

انا كنت ناوى اقول مبروك لكن وقفت فى زورى
مالك ومال الجزارين بس ؟
انا ليا اصحاب كتير فيهم وبيخدمونى تمام ويختاروا لى احسن لحمة
عموما بلاش مبروك
الف مليون مبروك
واخبار سفروته ايه ؟


اما بخصوص باقى الكلام
فامثلتك فعلا صح
وعن نفسى انا فعلا بغير او على الاقل باحاول اغير اى شىء غلط يقابلنى
يعنى مركز الشباب بتاعنا كان مهجور ويفكرك بالمركز بتاع فيلم التجربة الدانماركية
حاليا بيمارس فيه عدد من الالعاب على رأسها الكاراتيه وراجعين امبارح منة امتحان كان فيه 54 لاعب كلهم ناجحين والحمد لله وحققنا عدد من المراكز فى اخر بطولة وغيرها من الامثلة


الحلول المنطقية ان نجلس مع انفسنا ويرى كل منا عيوبه ويبدا فى اصلاحها وكفانا انتقادا لاخرين ربما يكونوا افضل منا فالمجتمع والامة هم مجموعنا كافراد ولو انصلح كل منا فسينصلح المجتمع

اما من يريدون التغيير فانا انظر اليهم على انهم بشر ليسوا مثالين فكلنا خطاء وليسوا مجانين لان ما يفعلونه هو الشىء الصحيح الذى من المفترض ان يفعله كل الناس

تحياتى دوما

elsha3er يقول...

السلام عليكم

كلامك جميل جدا وما فهوش اى استغراب لان دة الواقع

بس لما يبقى دولة عندها فراغ سياسى وحكم هش يبقى لازم تشوفى كل دة التغير اول مرة احس نه لازم يكون من فوق الاول من قمة الهرم انا شايف ان فى مصر العكس صحيح


تحياتى لقلمك


احمد الشاعر

شبــ اون لاين ـــاب يقول...

السلام عليكم ورحمة الله وبركاته

اولا اقولك مبروووووك على النجاح

وطبعا مستنى الحلاوه ههههههههه

وثانيا مش تقولى انك بيطريه

وسيبانى اجيب دكتور من بره للقطه

اما بقى على البوست فهو جميل

بس زى العاده احنا مش هنغير الكون

لوحدنا

فى رعايه الله

joker

أبو كريم يقول...

بلدنا مبقتش لينا
والكلام ده بقاله سنين
تايهين على طول ضايعين
واحنا مستسلمين!!
مهربتش من جيشها
طيب من طوابير عيشها
طب دقت فيوم اللحمه
ولا العضم من قراقيشها
مشفتش مجاريها..طيب موقعتش فيها
ولا ليك مسؤل أو واسطه
عشان تعرف تتعين بيها
دور جواك تلقاها هى الذل وهى القهر
مصر بلدنا حضاره وحجاره وفراعنه ونهر
يمكن ناسى لانك فيها زى الطور راسه فسواقيها
بس الى مجرب وفارقها..قال والله راح أرجع ليها

تسنيم حسين يقول...

السلام عليكم ورحمة الله وبركاته

اولا مليون مبروك على النجاح وعقبال لما تخلصى خالص...
بالنسبه للموضوع المهازل اللى بتحصل دى كلها حلها فى كلام الله تعالى وكلام نبيه صلى الله عليه وسلم..
قال تعالى :(ان الله لايغير مابقوم حتى يغيروا ما بأنفسهم)
وقول الرسول صلى الله عليه وسلم :(تركت فيكم ما ان تمسكتم به لت تضلوا بعدى ابدا كتاب الله وسنتى).
واكيد الى بيحصلنا من امراض وابتلاءات وحرب على الإسلام والمسلمين كل ده بسبب الإبتعاد عن منهج الله تعالى واتباع منهج الشهوات والشيطان...
ونيجى للأسئله:
1 نعم وبفضل الله تعالى ربنا يثبتنا للحق ويهدينا واذا لم يكن التغي باللسان فعلى اضعف الإيمان يكون بالقلب ربنا يجعلنا ممن يجهرون بالحق ولا يخافون لومة لائم.
2 طبعا الحل واضح هو فى الرجوع الى كتاب الله تعالى وسنة رسوله صلى الله عليه وسلم.
3 انظر اليهم على انهم اشخاص مثاليين ويجب ان يتخذوا-بضم الياء- قدوه..

والسلام عليكم ورحمة الله وبركاته

EMMY BABY يقول...

محمد

الله يبارك فيك

ممنوع التهرب من الاجابات ههههههههه

تحياتى

ايمى

EMMY BABY يقول...

ابوووووووووووعلى

الله يبارك فيك يا جدوو ههههههههه انا موس طب ياريت فكرتنى بالمدرسين كانوا دايما يقولولى الكلمة دى مفروض انا موسة مش موس p:
ربنا يكرمك بجد يا ابو على اتمنى اكون دايما عند حسن ظنك




اما عن حالنا

كما شرحه البوست

غياب روح الدين هى السبب الاساسى فى اللى احنا بنعانى منه

لاءننا اخذنا الدين انه مجرد طقوس فى المساجد او البيوت
**************************
فعلا والله وفى ناس بقت مسلمة شرعا ولا تمس للاسلام بصلة فى المعاملات بالرغم ان الدين المعاملة


ثانى حاجة
القدوة مهمة جدا يا ايمى

هى اللى بتشعل الهمم وتحفزها
******************************
وللاسف كلنا مفتقدين قدوة فى واقعنا الحالى

ثالث حاجة
الاصرار والعزيمة
لاءن لما يكون الشخص عارف انه صح
هايبقى اكيد عارف انى الطريق مش مفروش بالورد وبه تحديديات
فى مثل شائع حاليا بيقول
رب صدفة خير من الف خطة
وده خلى الناس عايشة فى فهلوة وهمبكة
والناس مش عارفه
انه كما تدين تدان
يعنى اللى غشته النهاردة هايرجع ليك بكرة
*****************************
ياريت الناس تفهم كله عايز الطريق الاسهل والاسرع حتى لو على حساب مبادئه وضميره


اما عن اسئلتك

ممكن تقولى ان وضعونى على الاعناق
فسأمسك الغصن وارفع رايات الزيتون
تعالى هنا يا بلدى ها هو عزك المصون
يا من تقولون لا اله الا الله
الا تعرفون دفع الشك والظنون
الا تكونوا الخلفاء كما خلق رب الارباب
ارفعوا الهامات
فقدوتكم هامته كانت عالية
كان عنوان دعوته الشقاء
حتى وصل فكان قاب قوسين او ادنى
يا بلدى
حان الوقت لنكون ممن يفعلون
حتى نكون فى ربوة وظلال رابية
********************************
الله عليك يا ابو على اهو ده الكلام ولا بلاش



الحلول

نبدء تحويل الكلام الى الافعال
ونؤثر فى من حولنا بالسلوك
ونقول ستوب فى رعاية وحب
********************
حلوة اوى نؤثر فى من حولنا بالسلوك دى بجد لان لو غيرنا سلوكنا وبدأنا بنفسنا اكيد فعلا التاثير هيكون اقوى من الكلام

من يريد التغير انظر اليه كيف
يااااااااااااااااه
حبيبى وابن حبيبى وليه مصاصة هدية
********************************
ههههههههههههههههههههه عايزة مصاصة مليش دعوة اشمعنى هو


ايمى احملى لواء التغير
وقولى لنفسك لن يكون نجاح بدون مسامير
وان كان فى العمر فمتو ثانية
فسأظل احمل لواء التغير
**************************
ياعينى ياعينى ربنا يارب يقدرنى واقدر اغير حاجة


تحياتى
ايمى

EMMY BABY يقول...

رؤية

الله يبارك فيكى يارب



اما عن المهازل المرئية
فهى ليست مرئية فقط بل مسموعة ومقروءة لذلك صارت كالهواء تستنشقه فى كل مكان
*******************
بجد عجبتنى اوى اوى الجملة دى تسلم ايدك

ربنا يقدرنا جميعا على التغيير

وميرسى جدا على التاج هلبسه قريب ان شاء الله ههههههههه

تحياتى

ايمى

EMMY BABY يقول...

جحا

داخل حامى ههههههههههههه ربنا يقدرك وتفضل قاعدلهم علطول

الله يبارك فيك

تحياتى

ايمى

سفروتة يقول...

احم احم
لقد حضرت ملكة السفاريت
نياهاهاهاهاهاهاهاهاها
D:

عوامل كتير جداجدا جدا خلت فيه نفوس ضعيفة في مجتمعنا
اي مجتمع لازم يكون فيه الصالح والطالح
بس نسبة الفاسدين كترت اوي عندنا
والميزان اختل
وكل ما هيجي زمن هيقول القدامي
الله يرحم زماننا ده كان وكان وكان

بالنسبة لسؤال حضراتكم
1- هل انت ممن يسعون الي التغيير ام ممن يتكيفون مع الاوضاع؟
بحاول اسعي للتغيير حتي لو مكانش في النقطة اللي اتكلمتي عنها ... ممكن اكون بقوم من فكر اللي حواليا... بحاول اشجعهم علي حاجات نفسهم يعملوها وهتبقي مفيدة ليهم بس مش عارفين يبدأوا منين ... بحاول ابقي نموذج كويس الناس ممكن تغير منه عشان تبقي زيه وبالتالي نبقي صلحنا ولو جزء بسيط

2- ايه الحلول المنطقية للتغيير؟
اي حد مقبل علي انه هيخلف عيال (اولاد ييعني عشان انتي مش بتحبي الكلمة دي)يربيهم صح ... وكل واحد لما يربي صح هيبقي عندنا في المستقطهايلة متوجهة صح وعارفة هي بتعمل ايه وهتقضي ع الفساد .. علي فكرة ده مش حلم لو كل واحد اخد الكلام ده علي محمل الجد فعلا هنعمل حاجة كويسة
هتقولولي طب والناس اللي من مستويات منخفضة ومش واعيين للكلام ده
هقول ان فيه جمعيات اهلية كتير فيها ناس فكرها سليم ممكن تتبني الاهالي دول في تقويم فكرهم وتوجهيهم للتربية السليمة لاولادهم

3-هل انت ممن ينظرون الي من يريدوا ان يغيروا الاوضاع علي انهم اشخاص مثاليين او مجانيين؟
هما ولا مثاليين ولا مجانين يا ايمي هما ناس بتفكر صح عشان يعيشوا صح
ياريت كلنا نفكر زيهم

تحياتي للموضوع الرائع كما عودتينا
:)

انا ودماغي يقول...

مبرووووووووووووووووووووووووووووك يا قمر و إن شاء الله كل حياتك تبقى نجاح

بصى انا علقت على الجزء اللى فيه تفاؤل..لكن بصراحة الجزء الاسود اللى فى البوست بصيت عليه سريعا كدة لأنى بصراحة مش قادرة اتنكد..ما صدقت لقيت نفسى فرحانة شوية فعايزة افضل كدة لأكتر وقت ممكن


مبرووووووووووووك كمان مرة
مووووووووووووووه

قلم رصاص يقول...

ألف مبروك النجاح يادكتورة

هدية نجاحك وصلتك خلاص بمجرد وصولي هنا
أكييييييد حضرتك دخلتي التاريخ بمروري هنا هههههههههههههههه

شوية تواضع بقى ياعم انت !

اما بخصوص البوست فالموضوع جد مهم وخطير
والله حضرتك اتكلمتي في نقطة هامة جدا وهي المتعلقه بجزئية التغيير من جانب من يرى ويعيش الى جوار المهازل

المهازل كل يوم بيترسخ وجودها في حياتنا واللي يغيظ اكتر انها كل يوم بتتطور وبيظهر منها فصائل وانواع جديدة زي الفيروسات اللي ماليه العالم
ههههههههههههه

وبجد والله انا وجهة نظري الهازل للأسف وصلت الى الحالة جييييييييييييم !!!
لكن مش شايف أي جرس انذار ولافرق انقاذ ولا أي حاجة

بس رغم كللللللللل ده انا مفقدش الامل في التغيير رغم سواد الصورة وعدم وضوح الرؤية ، لأني متفائل بطبعي الحمدلله

احييكي مرة تاني على البوست المتميز

دمتي في تميز وابداع

وطيبتم وطاب سعيكم وممشاكم

قلم رصاص

elsha3er يقول...

السلام عليكم



فى انتظار جديدك


تحياتى

احمد الشاعر

EMMY BABY يقول...

سندس

الله يبارك فيكى

ومبروووووووك نجاحك ياجميل فين هدية نجاحك هههههههههه

فعلا يا سندس احنا اللى هنغير

حلوة الزغروطة دى بس بتعتى احلى ههههههههههه

تحياتى

ايمى

EMMY BABY يقول...

روزى

الله يبارك فيكى يا حبيبتى وربنا يكرمك يارب

ربنا يثبتك انتى كدة تمام اوى وماشية صح وهما بقى ربنا يهديهم

منورانى دايما بجد

تحياتى

ايمى

EMMY BABY يقول...

الازهرى

هههههههههههههههه الله يبارك فيك يا باشا وانا براحتى اقول اللى انا عايزاه انتى هتخوفنى بالجزارين اصحابك

وكمان ياسيدى صوابعك مش زى بعضها انا بكلم على امثلة موجودة مش على الكل

سفروتة تمااااام وزى الفل

كيفك انت

بالنسبة للمركز والله برافو حسستنى ان فى امل

ربنا يوفقك دايما ان شاء الله الى ماتحبه وترضاه

تحياتى

ايمى

EMMY BABY يقول...

الشاعر

وعليكم السلام ورحمة الله وبركاته

انا والله مبقتشى استغراب بس منكرشى انى مصدومة من جوايا

فعلا عندك حق فى اللى قلته

تحياتى

ايمى

EMMY BABY يقول...

جوكر

وعليكم السلام ورحمة الله وبركاته

الله يبارك فيك

ههههههههههههههههههههههه انت مكنتش تعرف دانا كاتباها فى بروفايلى

يلا يا سيدى اقلى قطتك مالها ؟؟وجبتلها دكتور ليه

مش هنغير الكون لوحدنا بس لو كل واحد راعى ضميره اكيد فى حاجات كتير هتختلف

تحياتى

ايمى

EMMY BABY يقول...

ابو كريم

اهلا اهلا منور والله وازاى كريم عامل ايه ؟.

بجد والله جميل اوى كومنتك مفيش كلام بعديه يتقال

ربنا يتولانا برحمته ويهدينا جميعا

نورت المدونة

تحياتى

ايمى

EMMY BABY يقول...

تسنيم

وعليكم السلام ورحمة الله وبركاته

الله يبارك فيكى وانتى عملتى ايه ؟؟؟؟

فعلا والله يا تسنيم محتاجين نرجع لدينا ونمشى على خطا الحبيب

ربنا يهدينا بجد

تحياتى دوما

ايمى

EMMY BABY يقول...

سفروتى

والله كومنت احلى من البوست يابنتى

ايه ده كله ههههههههههههههه

عجزت كلماتى عن الرد عليك

بس عجبتنى جدا الحلول المقترحة واسلوبك فى مواجهة الفساد

تحياتى ليكى يا بنتى

ايمى

EMMY BABY يقول...

انا ودماغى

الله يبارك فيكى


ماشى ماشى تقصدى تقولى انى نكدية (اهىء اهىء اهىء ااااااه )

على العموم ربنا يفرحك دايما

تحياتى

ايمى

EMMY BABY يقول...

قلم رصاص

الله يبارك فيك


هدية نجاحك وصلتك خلاص بمجرد وصولي هنا
أكييييييد حضرتك دخلتي التاريخ بمروري هنا هههههههههههههههه

شوية تواضع بقى ياعم انت !
***************************

ههههههههههههههههههههههههههههههه طبعا طبعا ده كدة انت متواضع كمان



المهازل كل يوم بيترسخ وجودها في حياتنا واللي يغيظ اكتر انها كل يوم بتتطور وبيظهر منها فصائل وانواع جديدة زي الفيروسات اللي ماليه العالم
ههههههههههههه
*****************************
حلوووووو اوى التشبيه ده بجد

وبجد والله انا وجهة نظري الهازل للأسف وصلت الى الحالة جييييييييييييم !!!
لكن مش شايف أي جرس انذار ولافرق انقاذ ولا أي حاجة
****************************
لا ولسة

بس رغم كللللللللل ده انا مفقدش الامل في التغيير رغم سواد الصورة وعدم وضوح الرؤية ، لأني متفائل بطبعي الحمدلله
**************************
طب الحمد لله دى اهم حاجة فعلا اننا نعمل اللى علينا ونتفاءل خير


بجد نورت المدونة فعلا واتمنى التواصل الدائم

تحياتى

ايمى

EMMY BABY يقول...

الشاعر

ان شاء الله فى جديد

تحياتى

ايمى

محمد سعد القويري يقول...

مبروك


والمهازل ده

عاوزه واحد يشفرها

ـــــــــــ
زيارة أولى

blue-wave يقول...

الف مليووووووون مبروووووووووووووك

كيكى عوووووو يقول...

فعلا نعيب زماننا ولاعيب فينا!!!
لولاولولولولووولىىىىىىىىىىىىىى
مبرووووووووووووووووووووووووووووووك
عقبالنا كلنا السنه الجايه

ضحكات الحياة يقول...

السلام عليكم

انا كده هاخد كومنتين
خلينا فى الاول اللى انا فيه

مبروووووووووووووووووووووووووووووووووووووووووووووووووووووووك و الف مبروووووووووووووووووووووووووووووووووووووووووووووووووووووك

و عقبال التدريب و السنين الجاية ان شاء الله

ضحكات الحياة يقول...

اييييييييييييييييه دنيا فعلا

نعيب زماننا و العيب فينا
و ما لزماننا عيب سوانا

أهم سؤال فعلا راح فين الضمير
لكن العيب فى أناس باعوا ضمير الأرواح
و أشتروا ضمائر أشخاص باعوا ضميرهم بارتياح
و لكن ليس العيب عيب زمان و لكنه عيب انسان
باع الضمير و كأنه سلعة يتاجر بها من يملك المال
و لكل ضمير سعره و تفاوتت اسعاره فى سوق الانسان
و يقولون انما الامم الأخلاق ما بقيت
و لكن اشتروا الان الاخلاق بزهيد الاموال
فما بقيت هناك أمم و لم يتبقى سوى أحلام
فلا تعجب ان وجدت نفسك تائها فهذا من ظلمك فى الحياة

ضحكات الحياة يقول...

أما بالنسبة ليا فانا ممن يسعون الى التغيير و التكيف مع الاوضاع فى نفس الوقت فانتى قلتها بنفسك "المضحك كمان دلوقتى ان اللى يمشى صح يبقى حاجة من اتنين ياما شخص مثالى نادر مينفعشى يعيش فى وسطينا
ياما مجنون وبيتكلم فى حاجات خرافية"

و الحل هو التكيف و لكن لا يكون هو ذات نفسه يفعل الخطأ يحاول التكيف مع أخطاء الاخرين مع محاولة تغيير هذا الخطأ
هى معادلة صعبة بس نعمل ايه

كل ده علشان احنا بعدنا عن ديننا و اسلامنا

مع تخياتى للبوست الجميل

EMMY BABY يقول...

محمد سعد

منورنى فى زبارتك الاولى

والله يبارك فيك

اتمنى التواصل الدائم

تحياتى

ايمى

EMMY BABY يقول...

بلو ويف

الله يبارك فيك

تحياتى

ايمى

EMMY BABY يقول...

كيكى

الله يبارك فيكى يابنتى

عقبالك يارب

تحياتى

ايمى

EMMY BABY يقول...

ضحكات الحياة

وعليكم السلام ورحمة الله وبركاته

خد كومنتات براحتك يافندم بس كله بحسابه

الله يبارك فيك يافندم وعقبالك

EMMY BABY يقول...

أهم سؤال فعلا راح فين الضمير
لكن العيب فى أناس باعوا ضمير الأرواح
و أشتروا ضمائر أشخاص باعوا ضميرهم بارتياح
و لكن ليس العيب عيب زمان و لكنه عيب انسان
باع الضمير و كأنه سلعة يتاجر بها من يملك المال
و لكل ضمير سعره و تفاوتت اسعاره فى سوق الانسان
و يقولون انما الامم الأخلاق ما بقيت
و لكن اشتروا الان الاخلاق بزهيد الاموال
فما بقيت هناك أمم و لم يتبقى سوى أحلام
فلا تعجب ان وجدت نفسك تائها فهذا من ظلمك فى الحياة
***************
مش هينفع اقول حاجة بعد الكلام ده

EMMY BABY يقول...

ضحكات الحياة كلاكيت تالت مرة

على فكرة هى دى المعادلة الذكية ربنا يكرمك وتقدر تغير حاجة

تحياتى

ايمى

ABOALI يقول...

ها وبعدين
الجميل راح فين ؟

EMMY BABY يقول...

ابو على

ههههههههههههههه بيتمشى على الكورنيش وزمانه راجع p:

Ahmed Atia يقول...

هل انت ممن يسعون للتغيير ام ممن يتكيفون مع الاوضاع ؟؟؟؟؟؟؟وياريت لو فى موقف حصلك تذكره


لو انا مغيرتش اللى هشوفه قدامى مستنى اللى ميشوفوش هو اللى يغيره عجيب والله

لازم نتغير ونقاوم وبالفعل مش بالقول مخلاص كفاااايه سلبيه


*ايه الحلول المنطقية للتغيير او الحد من اللى احنا فيه دلوقتى من وجهة نظرك ؟؟؟؟؟؟؟



نبدأ مننا وميصدرش مننا العيبه زى مابيقولوا

ونربى عيالنا بعد كده ان مفيش كسوووف من الحق غلط صلحه وقول غلط للى قدامك اياً كان



*هل انت ممن ينظرون الى من يريدوا تغيير الاوضاع على انهم اشخاص مثاليين او مجانين




مثاليين ويجب ان نقتدى بهم ونساعدهم ونبقى زيهم وافضل ولو الكل شايفهم مجانين حد يدلنى على السرايا الصفرا

لانى معاهم سواء كانوا مثالين او مجانين او اى حاجه المهم انهم عاوزين يغيروا وبيغيروا

وربنا بينصر الحق دوماً

شكراً على اتاحه الفرصه للتنفيس عما فى الصدر

انطلقى وربنا يكرمك

EMMY BABY يقول...

احمد عطية

بجد ربنا يكرمك

فعلا الحلول اللى انت قلتها هى انسب حلول للتغيير الاوضاع

وربنا يهدينا جميعا لطريق التغيير ونكون مممن ينصروا الحق حتى ولا على حساب حياتهم

بشكركم انتم لانك اتاحتولى فرصة التنفيس معاكم

تحياتى

ايمى