اهلا بيكم كلكم

(غلطة مطبعية ترحب بكل زوارها الاعزاء وبتمنى ليكم قضاء وقتت ممتع ومفيد فى مدونتى المتواضعة )

روعة الايمان

روعة الايمان

جوهرة الحياة هى ذكر الله

جوهرة الحياة هى ذكر الله

السبت، 6 سبتمبر، 2008

يا ناس يا عسل التاج وصل



بدون مقدمات انا هخش فى الموضوع علطول ممكن توسعوا شوية علشان اخش



ها




خلاص وسعتم



يلا



ا



2


3


ايه الرخامة دى


يلا يابنتى خلصينا


طيب خلاص هبتدى اهو


كنت اهديت تاج منذ فترة للغالية عليا مش عارفة اودى جمايلها فين بس ياربى original heart وطبعا لازم تنتقم فاهدتنى بتاج جميل عسول خالص يلا هحله اهو علشان لسة فى واحد كمان :))

بدأت تدون من امتى ؟ودخلت العالم ده ازاى ؟

بدأت تدوين من يوم 16 يوليو 2008 يعنى بقالى حوالى شهر ونصف وشوية


دخلت ازاى بقى كنت طول السنة الدراسية اللى فاتت ادخل على الايميل الاقى سفروتة تبعتلى لينك مدونتها اشوف اخر بوسيت عملته ومش بس كدة كنت بقرأ الكومنتات واقلها رايى فى الاشخاص هههههه


ولما خدت الاجازة طقت فى دماغى الفكرة فجأة وكانت وقتها سفروتة بتكلمنى ولاقتها بقى شجعتنى وتمت بحمد الله عمل مدونة غلطة مطبعية وكانت الذ غلطة مطبعية فى حياتى


ايه كان انطباعك في البداية ؟

كنت حاسة ان محدش هيعرف مدونتى ولا حد هيحط كومنت حتى وكنت حاسة انى هقعد بالشهور محطش ولا بوست لكن الوضع حاليا بقى عكس كدة تماما الحمد لله مبقدرش اقعد اكتر من اسبوع محطش بوست جديد


مين اكتر واحد بتهتم بتعليقه علي بوستك الجديد ؟


اى حد الحمد لله بيحط تعليق عندى يهمنى وبرد عليه وادخل مدونته واتابعها بانتظام


ايه أهم حاجة اتعلمتها من عالم التدوين ؟

الصبر بجد انا ممكن اقعد على المدونة حوالى 3 ساعات ارد على الكومنتات واتابع اللى حطوا بوستات جديدة وادخل على مدونات الناس الجديدة لا وايه اقرى كل بوست للاخر


وبلاحظ ان المدونين بيحطوا كلهم بوستات جديدة فى مرة واحدة ادخل الاقى حوالى 8 حطوا بوستات جديدة

ايه أكتر حاجة كرهتها ؟


الناس اللى بتناقش قضايا فيها اساءة للاسلام او الناس اللى بتدخل تشتم هو ده محصليش فى مدونتى لكن فوجئت بناس فعلا فى منتهى قلة الذوق معندهمش اى حياء او احترام للشخص الاخر او الراى الاخر فى مدونات ناس كتير




حاسس ان التدوين له تأثير ؟


اكيد طبعا


لازم الانسان يستفيد من كل حاجة بيعملها ياما ميعملهاش احسن لانها هتبقى تضييع للوقت


من رايى ان زيارتى لمدونة شخص تعنى ان قدامى فكر كامل يعنى بعرف افكار مختلفة اراء مختلفة واعتقادات مختلفة


بصراحة عمرى ماكنت اعتقد ان فى ناس ممكن تشتم او تهين الاسلام او او بس بجد الواحد لما بيشوف بعينه بيكتشف انه كان ساذج لانه اعتقد ان الناس كلها محترمة


بجد اكتساب المعلومات سواء دينية سياسية تاريخية او حتى اجتماعية وعلمية


يعنى كل لما اقرى بوست لشخص انا خدت خبرته فى مجال معين


بتعرف على ناس بجد جميلة زيكم جديرة بالاحترام فعلا بعتبر كل واحد فيكم اخت او اخ ليا


تهدى التاج لمين ؟
قلتيلى بقى


اسمع منى هقلك ايه


سفروتة -تامر الحسينى -محمود العدل -كواراث -قلب مصرى -رومنسى -نهرالحب -مجنون -cold air-ليكوريكا
عاشقة الفردوس -باجوجو -همس الاحساس -DR:m -صباح الصباح -ادم

واى حد يحط عندى كومنت


وكل اللى عايز


شفتم الكرم اى خودعة نياااها


نيجى بقى يا حلوين للتاج التانى واللى جالى برضه على غفلة من المبرمج المحترف مفروض يعملوا كلكس يصفر قبل مالتاج ييجى علشان ميبقاش على غفلة


بطلى رغى وحلى


طيب اهو بس متزقيش


معرفش ايه العنف ده


خلاص اهو يلا اربطوا حزام الامان

1-أذكر 5 أحلام على الاقل تخص ماضيك وتحلم فيها بتغيير أشياء ماذا ستعدل وماذا ستترك ؟

1كنت بحلم وانا صغيرة اكون رسامة مشهورة اوى بس اكتفيت انى اخليها هواية لما كبرت


2كنت بحلم البس بالطو ابيض وابقى دكتورة والحمد لله ادينى لبسته وبقيت دكتورة


3حلمت اول مادخل الكلية امسك امينة اتحاد الكلية على اساس انى كنت فاهمة غلط طبعا وكنت فاكره صوت الطلبة وادينى بقيت فى الاتحاد وفهمت الحقيقة المرة


4حلمت ماما تجيبلى بيبى صغير وكنت بقعد اقلها ماما كلى 100 طبق رز علشان تجيبلنا نونة هههههههه واهى جابتلى وادينى حرمت اطلب بيبى تانى


5حلمت بحاجات كتير اوى حلمت ابقى محامية كدة واقعد اكلم فى المحكمة


6وحلمت ابقى مدرسة علشان اضرب العيال بالعصاية هههههههههههه كنت عدوانية شكلى


هما كتير اوى الواحد اصلا مبيبطلش يحلم

2-أذكر 5 أحلام على الأقل تخص مستقبلك ؟

1انى اكون اسرة صغيرة ويكون عندى ولد(يوسف ) وبنت (ملك) وتكون اسرة فى منتهى السعادة وتكون مبنيه على اساس الدين


2انى اكون حد جامد جدا فى مجال الاتش ار واوصل مانجر اتش ار


3انى اتعين معيدة فى الكلية ههههههههههه بقدرة قادر


4نفسى بجد جدا اكون حد قريب من ربنا اووووووووووووى


5نفسى احج واعمل عمرة


6نفسى اوى اوى اشوف الرسول فى المنام




3-أذكر شخصين على الأقل متواجدين في حياتك حاليا .. كنت تود وجودهم قبل الآن بزمن ؟


نورى (سفروتة )ونودة (دى مش مدونة دى صاحبتى )

4-أذكر شخصين على الأقل غير متواجدين في حياتك حاليا .. كنت تود وجودهم الآن أو في حياة أولادك مستقبلا ؟


الرسول صلى الله عليه وسلم


سيدنا ابوبكر


كان نفسى اوى بجد اكون معاهم



5-لمن تهدي هذا التاج ؟


ياسلام الخير كتير


اورجانيل هارت


الحكمة ضالة المؤمن


محمد الدخاخنى


عبد الهادى _سارة


كيارا


هايدى


عمروجيه


موناليزا
فارس بلا جواد

DR.A.S.BLACK

حنين

عالم حبيب





لو اى حد برضه عايز يجاوب عليه يتفضل بكل ثقة واياك يتردد


ولا اقلكم انا عارفة انكم هتترددوا



كل اللى يعدى من هنا يحله هههههههههههههه



معلش تعبتكم معايا وانا كمان تعبت والله


تحياتى


ايمى

هناك 73 تعليقًا:

عايش ولكن يقول...

اول كومنت محجوز
هرجع اقرا بقا واجى

عايش ولكن يقول...

الحمد لله كويس انى ملقيتش اسمى
هههههههه عاوزه تبقى مدرسه علشان تضربى العيال
بس كويس ان احلام كتير من احلامك اتحققت
ربنا يحققلك كل اللى بتتمنيه يارب
دمتى موفقه
علاء

حسن حنفى يقول...

بجد اجابات جميله وان شاء الله تبقي

معيده زي ما انتي عاوزه يارب

وان شاء الله تحققي كل احلامك

انا حليت التاجين قبل كده

:d

سفروتة يقول...

امممممممممممممممممممممممممممممممممممممم

لازم يعني التدابيس اللي علي الهواء مياشرة دي

يا بنتي ده انا في تاج في رقبتي لسة محلتهوش

عموما يللا زي بعضه ...كفاية انه من اعز مخلوقة عندي في الدنيا دي كلهاااااااااااااااااااااااااااااااا


وبعدين الدخلة اللمضة اللي انتي داخلاها علينا دي هااااا

هههههههههههههههههههههههههههههههههه
..........

التاج الاول
_________________

بجد يا ايمان انا مبسوطة اوي انك اتأقلمتي بسرعة علي عالم المدونات ..في ناس تانية بتاخد وقت كبير اوي علي ما تتأقلم...وده شئ كويس جدا وكنت متوقعاه ليكي كمان

التاج التاني
__________________
ربنا يحققلك احلامك كلها يارب واشوفك مانجر اتش ار قد الدنيا...ومعيدة في قسم التشريح هههههههههههههههههههههههههههههههههههههههه

خلاص خلاص بهزر والله ...يارب تبقي معيدة في القسم اللي بتحبيه.

وميرسي بجد لانك اختارتني من ضمن الناس اللي كنتي تتمني يبقوا موجودين في حياتك ...دي حاجة تشرفني بجد...ولاني انا كمان كنت اتمني اني اعرفك من زمااااااااااااااااااااان.

تحياتي

ليكوريكا يقول...

عالم التدوين من اجمل الحاجات الموجوده فب النت دلوقتي

كفايه انه بيعرفنا علي ناس حلووين اوي من كله حته فمصر او غير مصر

وزي منتي قلتي

انتي مبتتعامليش مع مواضيع

انتي بتتعاملي مع فكر شخص كامل

وربنا يحفظزنا من الناس اللي معندهاش حياء وبتدخل تشتم

انا كان عندي في البلوج بتاع مجرد مشاعر واحد فاكرني بنت وقعد مسك المواضيع القديمه ورد عليها كلها تقريبا

وكل موضوع بشتيمه شكل

يللا الحمد لله

وربنا يحققلك كل احلامك وتعملي كل اللي نفسك فيه

------------------------------

ليكوريكا

EMMY BABY يقول...

علااااااااااااااااء

احنا عندنا هنا الحجز بفلوس

هههههههههههه والله كنت هحط اسمك بس افتكرت انك كنت حلتهم قبل كدة قلت طب استعبط واحط اسم مسلم افتكرت ان مدونتك اسلامية فقط قلت خلاص حظه نفد منها

ربنا يارب يحققلنا احلامنا كلنا

وتحقق احلامك كلها

تحياتى

ايمى

EMMY BABY يقول...

حسن حنفى ربنا يكرمك

ميرسى ليك خالص

ياااااااااارب ابقى معيدة يارب اقولوا امين احنا هنهزر

ربنا يوفقك انت كمان وتحقق كل احلامك

مهو انا عارفة انك حليت التاجين علشان كدة معرفتش ادبسك هدبسك هدبسك متخافش متخافش :))


نورت يا باشا

تحياتى

ايمى

EMMY BABY يقول...

سفروووووووووووووووتة حبى الوحيد


هههههههههه يابنتى هى الدخلة اللمضة دى اللى فيها المفيد سيبك انتى

وكمان يابنتى لازم التدبيس يكون على الهوا مباشرة علشان يكون فى شهود عيان لو حبيتى تزوغى نرفع قضية فى المحكمة

كويس والله انك كنتى متوقعالى هذا التأقلم السريع يبقى فاهمنى اكيد منا مامتك

كويس انك لحقتى نفسك قال معيدة فى قسم التشريح قال داحنا هنشرحوكىىىىى

وكمان انتى كنتى متوقعة اصلا انى ممكن مختاركيش :))

بجد انتى بنتى واختى وصحبتى

تحياتى لاحلى سفروتة

ايمى

EMMY BABY يقول...

ليكوريكا

فعلاا والله ربنا يحفظنا

وكمان هو كان بيشتمك ليه كل ده علشان فاكرك بنت ولا بيشتم من غير سبب

ناس غريبة والله

اللى زى دول احذف تعليقكهم ومتردش عليهم غير الرد على امثالهم الصمت والتجاهل

ربنا يحققلنا احلامنا كلنا وتحقق انت كمان احلامك

تحياتى

ايمى

romansy يقول...

كل تاج وانتى طيبة
وعقبال كدة يارب تتحققى احلامك
وتبقى ام يوسف
وام ملك
ويطلعوا جامدين زيك كدة فى التدوين
ويوسف يكون محامى
وملك تكون مدرسة

نهر الحب يقول...

كل سنة وانتى طيبة
ويارب تحققى كل كل احلامك وما تتمنية
ويرزقك من حيث لا تحتسبى

نهر الحب يقول...

ان شاء الله يوم السبت الموافق 13/9
هيكون فى تجمع للتبرع فى مستشفى ابو الريش للاطفال
بناء على اقتراح قوس قزح
اتمنى انى اشوفكم هناك
تعالوا نحاول نرسم بسمه ونطهر ذنب
وبعدين هيكون فى افطار جماعى

EMMY BABY يقول...

رومانسى

وانت طيب

هههههههههه ياااارب ييجوا ويقولوا يا ماما وانا اعلمهم كل حاجة فى التدوين واهو ندون سوا

بس كدة الاتنين هيدخلوا ادبى ومش هيطلعوا لمامتهم والله اعلم كمان ابوهم هيكون ايه

يلا هعلم ملك من صغرها اوعى تضربى العيال ههههههههههههههه

تحياتى

ايمى

EMMY BABY يقول...

نهر الحب

وانتى طيب

يارب انتى كمان تحققى كل اللى بتتمنيه

اما حكاية التبرع فانا هحاول ان شاء الله اجى واقول للناس

ربنا يكرمك

وجزاكى الله خيرا

تحياتى

ايمى

كيارا يقول...

الاول اجابات جامده وربنا يحققلك احلامك يارب

ثانيا

انا حلييييييييت التاج قبل كدا

كيكيكييكيكيكييكيكيك

ثالثا ليه لينك ايام زمان عندك بيقول ان اخر بوست الحضاره الفرعونيه الجزء الاول مع اني منزله اربع اجزاء عليهم

ابقي اقري الاجابا بتاعت التاج في ضي القمر ياعسل

تحياتي لايمي الغاليه وانا فرحانه اكتر انك افتكرتي كيارا

هيك هيك هيك هيك هيك

oRiGiNaL HeArT يقول...

اجباتك جميلة اوى
مش عارفة كل بوست بيزيد احساسى انك شخصية جميلة اوى
شخصيه ليها معنى
هههههههههه
هو كدة بقى
بس شكلك عدوانية اوى على فكرة مش عشان العيال اللى هتضربيهم بس
لا دانتى مختارانى اول اسم وكانك بتنتقمى
طب كنتى حطى اسمى فى النص كدة على الاقل كنت الاقى حجة واقلك عينى زغللت ومشوفتش اسمى
ههههههههههه
كل سنة وانتى طيبة يا ايمى وربنا يحققلك كل الاحلام الجميلة اللى بتحلمي بيها

فارس بلا جواد يقول...

السلام عليكم
بالنسبة لأجاباتك عن التاج الأول أحييك جدا عليها وباتفق معاكي في حاجات كتير بالنسبة لرأيك في التدوين
والتاج التاني كنت سعيد أني عرفت بعض جوانب شخصيتك وربنا يحقق كل أمنياتك
أشكرك جدا علي أهداء التاج
تحياتي

blue-wave يقول...

ههههههههه
بجد عجبتنى اجاباتك
وكتتى بتحلمى تكونى دكتورة؟
اديكى بقيتى يا ستى
بذمتك مش ندمانه؟؟؟:)))
والله الرسم كان احسن

Dr/Salma يقول...

السلام عليكم
أنا مش حقلك عجبتني غجاباتك لأن المدونة كلها عاجباني و خصوصا الشعر اللي في الأول ....ما شاء اللع و اللي عاجبني أكتر أنها مدونة إسلامية ..أتمني التواصل الدائم
تحياتي

Rosie يقول...

جميل اوى الحوار و اجاباتك صدقة و بسيطة..يارب تحققى احلامك كلها إن شاء الله..بس هو ايه الاتش ار ده؟..

البنت الشقيه يقول...

الف الف الف مبروك ياجمبل على التاج

وبالمره اقولك واحنا فى شهر الصوم

يترب احلامك كلها تتحقق يارب

,,,,,,,,,,,,,,,,
تحياتى
البنوته الششقيه

Sometimes يقول...

ماشاء الله ولا قوة الا بالله
مدونتك سكرة زيك
ربنا يحقق لك كل احلامك
ويقدرك دايما على فعل الخير
عجبنى موضوع القافله اوى
بجد الواحد لما يعمل خير نفسيته بترتاااااااااح جدا

كل سنه وانتى طيبه يا قمر
رمضان كريم

EMMY BABY يقول...

كياااااااااارا

ههههههههههههه ميرسى ياقمر حظك من السما يابنتى

اما بخصوص اللينك فانا فعلا خدت بالى ساعات النت بيخرف بعيد عنك بس على مين دخلت عندك برضه اطمن بنفسى


انا مقدرش انسى حد اهتم بقراية حاجة من مدونتى

تحياتى يا كياراااااااا

هيك هيك هيك

ههههههههههه

تحياتى

ايمى

EMMY BABY يقول...

اورجانيل هارت

والله بجد كلامك فرحنى اوى ربنا يخليكى يارب يا حبيبتى

وكمان لو انا شخصية بتعجبك فانا قلتلك احنا شبه بعض دورى على مواهبك وطلعيها بقى هه مستنياكى

يابنتى ده مش انتقام دى محبة علشان اشوف دايما بوستاتك

وانتى طيبة ياقمر

مستنية اجاباااااااتك ههههههههه

تحياتى

ايمى

EMMY BABY يقول...

فارس بلا جواد

وعليكم السلام

الحمد لله انك متفق معايا فعلا التدوين ليه تاثير على كل واحد فينا

اما بالنسبة للتاج التانى فيا ترى عرفت ايه من جوانب شخصيتى ؟؟؟؟؟

غير انى عدوانية ههههههههههههه

يلا مستنية اجاباتك على التاج

تحياتى

ايمى

Tamer Alhosiny يقول...

عزيزتي الغالية ايمان
طبعا التاج بيذداد بريق وجمال
فوق راس حضرتك
علشان كدة مع كل اجابة لسؤال بحس فعلا بالبريق ده

اولا احب اقولك ان دخولك التدوين ده من اجمل الاحداث بجد
لانه خلاني وخلي كل المدونين يتعرفوا علي شخصية قد كدة محبة للخير ورقيقة
وبجد بجد اجمل غلطة مطبعية في التاريخ
هههههههههههههه
وطبعا بشكر نوري لانها كانت طريقك للمدونات لان بجد مدونتك اضافة جميلة للمدونات

كمان احلامك بجد جميلة
وخاصة حلمك انك تشوفي الرسول عليه الصلاة والسلام
يارب يتحقق حلمك الجميل ده
كمان ربنا يخليلك نوري ونودة
(مش عارف ايه الاسماء الغريبة دي )
ههههههههههههههههه
ويارب الاي مش قدرتي تشوفيهم في الدنيا
تشوفيهم في الجنة يارب
سيدنا رسول الله والصديق ابو بكر

تحياتي ليكي يا نوري
ادكي 20 من 20
علي التاجين دول
بجد اكتر من ممتاذة
وربنا يارب يسعدك ويوفقك

تحياتي
انسان عاشق حر
تامر الحسيني

EMMY BABY يقول...

دكتور عمرو


هههههههههههههههههه كويس انها عجبتك

لا والله حلو انك تبقى دكتور هواية برضه هههههههههه لكن الرسم موهبة

تفرق تفرق تفرق يعنى يا دوك :))

عارفة طبعا انك حليت التاجين قبل كدة معرفتش ادبسك المرة دى بس مصيرى هدبسك

تحياتى

ايمى

EMMY BABY يقول...

دكتورة سلمى


والله كلامك حلو اوى وكتير عليا كمان ربنا يكرمك يارب

والشعر اللى فى الاول ده مش انا اللى كاتبه دى كلمات اغنية بس هى فعلا بتوصف احساس دلوقتى

وبجد مبسوطة ان المدونة عجبتك ويارب متقطعيش عننا الزيارة

تحياتى

ايمى

EMMY BABY يقول...

روزى

انتى اللى جميلة بجد ربنا يخليكى

والحمد لله ان البوست عجبك

الاتش ار ده معناه(humen reasource)

يعنى موارد بشرية هو اللى بيعين الناس فى الشركة عن طريق الانترفيوهات ويعرف الشخصيات ومكانها المناسب فى الشركةوهو المسئول عن رفع الروح المعنوية للموظفين وهكذا )

دى نبذة مختصرة

ونورتى المدونة

تحياتى

ايمى

EMMY BABY يقول...

البنت الشقية

الله يبارك فيكى

ويارب كدة كلنا نحقق احلامنا

تحياتى

ايمى

EMMY BABY يقول...

sometimes

بجد انتى اللى سكر نورتينى والله وبجد انا مبسوطة جدا ان الاجابات عجبتك والمدونة عجبتك

وموضوع القافلة ده بجد فعلا والله الخير ليه طعم حلو اوى

يارب تجربيه واجرؤبه انا وانتى مع بعض ان شاء الله

وكل سنة وانتى طيبة يا قمرين

تحياتى

ايمى

EMMY BABY يقول...

تااااااااااااااامر

والله بجد ايه الكلام الحلو ده كله والله انا اللى بجد سعيدة انى دخلت وسطكم وبقيت معاكم وعرفت اخوات حلوين كدة زيكم

وفعلا كانت اجمل غلطة مطبعية فى حياتى

وربنا يارب يستجيب لدعائك ويحققلى حلمى ده بالذات

وانا فعلا بشكر نورى انها كانت سبب فى دخولى لهذا العالم


تحياتى

ايمى

باجوجو يقول...

إيه دا يإيمى
أنا بشكرك على التاج الجامد ده

بس أنا بصراحة أول مرة يجيلى تاج

فا مش واخد على كده
بس أوعدك أجاوب عليه

بس هيبقى فيه تشابه كبير بين إجابتنا

إن شاء الله قريب قوى هجاوب

واشكرك مرة تانية

EMMY BABY يقول...

باجوجو

والله بجد انا سعيدة انى اهديلك اول تاج


بكرة تتعود انا اول اسبوعين ليا فى التدوين جالى تاج وبعد كدة نزلت ترف ههههههههههههههه

وان شاء الله تجاوب عليه كدة ويبقى اجاباتك جامدة

تحياتى

ايمى

صباح الصباح يقول...

ما شاء اللة

ما شاء اللة

اية الاحلام والطموحات الجامدة دى

ومحامية وحركات

وحضرات القاضة والمستشارين

وان المتهم من النوع المالوف على راى عادل امام

هههههههههههههههه

يا بنتى مش هتستحملى تشوفى اصلا منظر القاعة والمساجين طب هتعملى اية لما تقفى هناك بالروب الاسود

اوعى تعملى زى تامر وشوقية

هههههههههههههههههه
تاج يجنن بجد

EMMY BABY يقول...

صباح الصباح

ههههههههههههههه مهو انا علشان مش هستحمل منظر الناس فى السجن هحاول بكل مقدرتى علشان اطلعهم

بس انا كتير اوى لحد دلوقتى بيقولولى كنتى تنفعى محامية او مذيعة او محاورة ههههههههههههههههه

نورتنى ياباشا

منتظرين اجاباتك الجامدة على التاج

تحياتى

ايمى

عالم حبيب يقول...

السلام عليكم ورحمة الله وبركاته

كل سنة وانتي طيبةايمي

تاجين " جومال " جدا .. والاجابات في الصميم ما شاء الله

جزاكي الله خير على اهداء التاج .. مع انك مررتي لي التاج التاني لكن ان شاء الله هأحل الواجب كامل وبكرة اجيبلك الحل " يأبلة " علشان تصححيه :)

كمان جزاكي الله خير مرورك في المدونة .. لكن صدقيني انا اتابع مدونتك بانتظام مع مدونات اخواني واخواتي جميعا لأنكم كلكم اعزاء على قلبي وصحبتكم غالية .. اسأل الله أن يجعلها خالصة لوجهه الكريم .. لكن تعرفي ضيق الوقت خصوصا في رمضان ما بين شغل وكذا وكذا .. وكمان أنا بأدخل بالتليفون فبطئئئئئئئ .. كل عام وأنتم بخير

هــــــــــــايدي يقول...

السلام عليكم ورحمه الله وبركاته
كل سنه وانتى طيبه
ربنا يحققلك كل امانيك ديما
ومش تزعلى من البيبى لما يكبر هتشوفى حجات تانيهبس اصبرى

مرسى على لتاج ان شاء الله ارد عليه من تاج رومنسى

بنوتة مصرية يقول...

ياسلام تعالى وانا احقللك حلمك
مش انتى نفسك تكونى مدرسة وتضربي العيال بالعصايا ياشريرة
تعالى بس معايا المدرسة واللى يضايقنى هخليكي تضربية
وااقدم بعدهااستقالتى بكرامتى بدل اما اترفض

EMMY BABY يقول...

حبيب

وعليكم السلام ورحمة الله وبركاته

وانت طيب يا حبيب

ووالله انا مزعلتش وبجد ربنا يعينك بجد والله انا عرف الوقت بس انا قلت اجى اقلك على التاج علشان هذا هو المتعارف عليه

والحمد لله ان الحلول عجبتك

ومستنية الواجب علشان اعلمه هههههههههه

تحياتى

ايمى

EMMY BABY يقول...

هايدى

وعليكم السلام ورحمة الله وبركاته

وانتى طيبة يا هايدى

وربنا يارب يحققلك كل اللى بتتمنيه انتى كمان

ومستنية اجاباتك

تحياتى

ايمى

EMMY BABY يقول...

بنوتة مصرية

هههههههههههههههههه واضح انك زى العسل ودمك خفيف كمان

لا منا خلاص بطلت شر وبقيت طيبة

هاجى اديهم مصاصة وتاخدى انتى علاوة :))

نورتى بجد المدونة

واتمنى تكرار الزيارة

تحياتى

ايمى

عالم الحب يقول...

هااااى انا صديك جديد من عالم يطلك علية عالم الحب انا سعيد جدن لكى رايت مدونة جميلة زى غلطة مطبعية وعجبنى اوى التاج بتاعك هوة انتى غلستى علينة شيوية بس والله غلاسك عسل ولله والتاج بتاعك جميل اوى والله وعجبنى جدن بس انتى محطارة تدى التاج لمين يا ستى ادهونى انا انا لسة هتنقى ههههههههههههه المهم انا بجد سعيد بمرورى على المدونة بتعتك لانها من احسن المدونات الى ابلتهاها دة اول تعليق عندك يريت واتمنا لو شريكتينى بى رايك فى المدونة بتعتى تحياتى وكل عام وانتى بخير اتمنا لكى التوفيك واتمنا لو بجد زورتى مدونتى وك انا مستنى تعليقاتك الى انشاء الله هتفدنى تحياتى

EMMY BABY يقول...

عالم الحب

هههههههههههههه الحمد لله ان التاج عجبك

وميرسى خالص على الكلام الحلو

وياسيدى التاجين هدية منى ليك حلهم يلا وورينا شطارتك

ومتنساش الغلاسة

ونورت مدونتى واتمنى انها متكنش اخر زيارة

تحياتى

ايمى

عالم حبيب يقول...

بدأت التدوين من امتى ؟ ودخلت العالم ده أزاي ؟

بدأت التدوين في آخر ليلة من رمضان للعام 1427 هـ .. بالميلادي الأحد,تشرين الأول 22, 2006 .. نقلت التاريخ زي ما هو كده من مكتوب بس مش عارف ايه تشرين ده .. المهم

دخلت أزاي ؟ طبعا سميت الله ودخلت .. يمكن ما كانش غريب عليا هذا العالم لأن قبلها كنت أشارك في العديد من المواقع والمنتديات .. وكان عندي موقع ومنتدى اسمه ( نبضات إيمانية ) .. المنتدى اخترق عن طريق أحد الهاكرز .. وأصلا ساعتها كنت وصلت لدرجة من الملل من الأنترنت بكل ما فيه .. فزي ما تقولوا قلت خير وبركة .. أول مدونة لي كانت على مكتوب .. بعد كدة رحت على الوورد بريس .. ما حستش براحة فيهم .. وأخيرا استقرينا في البلوجر

ايه كان انطباعك في البداية ؟

بصراحة في البداية كان دخولي عالم التدوين هو هروب من عالم المنتديات والأنترنت بالكامل .. كنت وصلت لدرجة من الملل .. فانشأت المدونة وكنت أنوي أن تكون عالمي الخاص .. مجرد مكان أنقل فيه ما أخطه في دفتري .. ويمكن تلاحظوا ده في أول تدوينة لي

علشان كده سميت المدونة " عالم حبيب " .. أول مدونة لي على مكتوب كان اسمها " جئنا لنشر الخير " وهو الأسم اللي كنت اشارك بيه في المنتديات وهو نشيد رائع جدا لأبو عبد الملك

مين اكتر واحد بتهتم بتعليقه على بوستك الجديد ؟

كل الناس في السؤال ده بتجاوب إجابات دبلوماسية .. يعني بيقولوا كل الناس وكده .. لكن أكيد في ناس معينة الواحد بيهتم بتعليقهم .. وأكيد انت / انتي واحد منهم طالما إنك بتقرأ هذه الكلمات :) ـ

إيه أهم حاجة اتعلمتها من عالم التدوين ؟

إن الواحد يحاول يستفيد قدر الإمكان من الأفكار الكتيرة
إني أكون موضوعي في نظرتي للأشياء .. وعدم الحكم على شخص من موضوع واحد كتبه أو كلمة قالها
إن الإختلاف في الرأي لا يفسد للود قضية
إن أنا وأنت اللي بنقرر حجم استفادتنا من أي موضوع مهما كان الموضوع مهم جداً جداً جداً .. أو مجرد فكرة بسيطة

أكتر حاجة كرهتها ؟

كلمة الكره كلمة كبيرة .. ولكن ممكن أقول حاجات ما حبتهاش
حسيت إن ناس كتير لمجرد انهم عملوا مدونة وناس بدات تزورهم ويتناقشوا في قضايا .. بيبدأوا يحسوا انهم كبار بقى و "يخبطوا" في خلق الله
ما حبتش ان في ناس بيدخلوا يعلقوا .. ويكون الموضوع في وادي والتعليق في وادي .. وده معناه انهم ما قرأوا أصلا أي شئ
العلاقات بين بعض المدونين خصوصا الشباب والفتيات .. ساعات بأحس في بعض الحوارات والتعليقات إن الولد والبنت قاعدين مع بعض على المصطبة .. أو متربيين مع بعض تحت سقف واحد .. بيتخطوا كل الحواجز

حاسس إن التدوين له تأثير ؟

طبعا .. على المستوى الفردي .. يعني .. الواحد بيحاول إنه يعرف أفكار جديدة .. يكتسب معلومات جديدة في مختلف النواحي والأفكار .. بأقدر أنمي قدراتي في الكتابة والتواصل مع الآخرين .. أدب الخلاف إن حدث

على المستوى السياسي والإجتماعي .. له تأثير أيضا .. وإن كانت حكومتنا الإسمنتية لا يؤثر فيها شئ ولا بيهمها لا تدوين ولا غيره .. كتير من السياسيين عندهم مدونات علشان يوصلوا للناس ويخطبوا ودهم .. التدوين بيقدر يوصل لهموم الناس والحاجات اللي وسائل الإعلام ما بتقدرش تنقلها .. لأنه بإختصار : من الناس وإلى الناس

EMMY BABY يقول...

حبيب بجد والله بدون مجاملة اجابات جميلى الى حد بعيد بحس فى اسلوبك بالهدوء والرزانة

عجبنى اوى اجاباتك على الحاجات اللى اتعلمتها والحاجات اللى محبتهاش بلاش كرهتها

بس سؤال ليه يا حبيب محلتش التاج على مدونتك علشان تتيح فرصة ان اصحابك كلهم يقروه لانه بجد يستاهل انه يتقرى

نورت الكومنتات بحلك للتاج

سلام عليكم

تحياتى

ايمى

عالم حبيب يقول...
أزال المؤلف هذا التعليق.
عالم حبيب يقول...

وعليكم السلام ورحمة الله وبركاته ايمى

جزاكم الله كل خير

أنا ما كنتش خلصت الواجب فعلشان كده حطيت هنا اللي خلصته .. والأن الواجب كامل في المدونة للتصحيح

بارك الله فيكم وجزاكم الفردوس الأعلى

mregypt7 يقول...

السلام عليكم
اول زياره ليا لمدونتك
واضح انها حلوه من اولها كده
بس اييه يا ايمى الرغى ده كله
ده انا تعبت يا شيخه
هى عادتكم ولا هتشتروها هههههههههه
اجاباتك جميله ونموزجيه شكلك كنتى بتغشى من كراسه الاجابه
اكيد اللجنه كانت سايبه او انتى عارفه المراقب
ماهى الكوسه كترت فى البلد
وعلى راى المثل
لو النيل صلصه ماكنش كفى الكوسه اللى فى البلد ههههههههه
بوست لذيذ وتاج الذ
جوعتينى وانا لسه صايم ههههههه
منتظر تشريفك
وكل سنه وانتى طيبه
تحياتى
بيبــــــــو

انا ودماغي يقول...

هههههههههههههه
و الله انتى زى العسل و إن شاء الله تحققى كل أحلامك بس بلاش ضرب العيال دى(على إيه يعنى توجعى إيديك)

مدونتك زى العسل و كل سنة و انتى طيبة

مـجـنـووون يقول...

كم اسعدني مروري علي مدونتك الجميله

اسف بجد أني أتاخرت في التعليق

المهم ما علينا

أمنياتك جميله ، وأحلي أمنيه عجبتني
هااا

عرفتيها

فكري كويس

شغلي مخك

فتحي عينك


خلاص حقولك


أنك تبقي محاميه يعني تبقي نصابه زيي هههههههههه


تقبلي جنوووني
مجنووون

عايش ولكن يقول...

ايه يا ايمى فين جديدك

حنين.. يقول...

هههههههههههههههههه يا بنتى انتى كان نفسك تكونى محاميه ولا دكتوره ولا ابله
ههههههههههههه كل المراكز والوظائف يا مفتريه
وعلى العموم يا ستى اهو بقيتى دكتوره
ربنا يباركلنا فيكى يارب
ويحققللك كل احلالالالالالالامك
وتبقى معيده بقدرة قادر ههههههههه
دمتى سااالمه
وجزاكم الله خيرا انك افتكرتينى قمورتى
فى انتظااااااااااار المزيد
حنين

كلام على بلاطة يقول...

كل عام وانت بخير
تحياتى

كلام على بلاطة يقول...

كل عام وانت بخير
تحياتى

عالم الاحلام يقول...

بسم الله كل سنه وانتى طيبه انا اول مرة ارسل رساله فى عالم التدوين بجد انامعجب بمدونتك والتاج جميل اوى والبوست روعه من الخيال وياريت مدونتى تعجبك تحياتى

شفقة هانم واحسان بك يقول...

مبروك على التاج يا قمر

EMMY BABY يقول...

حبيب

بارك الله فيك

ربنا يرزقنا جميعا الفردوس الاعلى ان شاء الله

وانت اصلا مش محتاج تصحيح دانت غلبت الاساتذة فى اجابتك

تحياتى

ايمى

EMMY BABY يقول...

mregypt7

وعليكم السلام

ههههههههههههه انا رغاية
وعادتكم كمان بتغلط فى بنات حوا كلهم طب احذر بقى ان كيدهن عظيم خد ساتر بدل ماتتضرب

مش مهم انتم تتعبوا المهم احنا نرغى براحتنا


والحمد لله ان الصلصة كفت يووووه قصدى البوست عجبك

نورتنى

وان شاء الله متكنش اخر زيارة

تحياتى

ايمى

EMMY BABY يقول...

انا ودماغى

كل سنة وانتى طيبة


انتى اللى زى العثل والثكر كمان هههههههههههه


خلاص مش هضرب العيال

وربنا يحققلنا احلامنا كلنا

تحياتى

ايمى

EMMY BABY يقول...

ماااااااااااااازن

ههههههههههههههههه نصابة كمان

اول مرة اعرف انك محامى بتلبس بقى الروب الاسود وتقول سيادة القاضى وحضرات المستشارين

نورت المدونة

وان شاء الله تبقى نصاب قد الدنيا هههههههههههههه محامى يعنى

تقبلنا جنونك

تحياتى

ايمى

EMMY BABY يقول...

علاء

امممممممم سؤال وجيه بس والله فعلا مشغولة معلش بس انتم عارفين طبعا انى مبقدرش اغيب عن المدونة كتير

انتظرونى قريبا ادعوا انتم بس

تحياتى

ايمى

EMMY BABY يقول...

حنيييييييين هههههههههههههههههههه

اه فعلا احلام طفولة بقى بس والله كنت بحس بالامل

يارب يحققلنا احلامنا كلها

مقدرش انساكم اصلا علشان افتكركم

نورتينى يا حنين

تحياتى

ايمى

EMMY BABY يقول...

كلام على بلاطة

وانتم بخير

تحياتى

ايمى

EMMY BABY يقول...

عالم الاحلام

بجد انا سعيدة بمرورك والحمد لله ان التاج عجبك

واتمنى تكرر الزيارة

ونورت عالم التدوين

تحياتى

ايمى

EMMY BABY يقول...

شفقة هانم واحسان بيك

الله يبارك فيكى عقبالك كدة ربنا يرزقك بتاج امور طيب ابن حلال هههههههههههههه

كل سنة وانتى طيبة

تحياتى

ايمى

سندس وأمل يقول...

البوست جميل وانتى اجمل ........

صراحة أنا كنت برده نفسى أطلع مدرسه

علشان أطلع عين العيال مش أضربهم بس..

بس لما كبرت تفكيرى اتغير .....

وشكرا على التاج اللى بتهديهولنا

كلنا .

وجزاكى الله خيرا........

سندس وأمل يقول...

اسفة نسيت أنا سندس

EMMY BABY يقول...

سندس

انتى اللى جميلة ربنا يكرمك يارب

اخيرا واحدة نصرتنى هههههههههههههه

انا كمان تفكيرى اتغير بقيت بحب الاطفال

نورتى المدونة يا سندس واتمنى متكنش اخر زيارة ليكى

تحياتى

ايمى

أختكم فى الله يقول...

ما شاء الله

مدونة زى العسل

واجابات جميلة

انا سعيدة اوى بانى دخلت المدونة هنا

اسمحيلى بمتابعتها تملى

كل سنة وانتى طيبة

تقبلى مرورى

EMMY BABY يقول...

اختكم فى الله

ربنا يكرمك يارب انتى اللى جميلة

وبجد انا يسعدنى انك تتابعيه ونبقى على تواصل دائم

وكل سنة وانتى طيبة وبصحة وسلامة

نورتى المدونة

تحياتى

ايمى

عبدالهادى_سارة يقول...

اجباتك جميله ويارب يحقق امنياتك


بس انا اسف لانى مش هعمل التاج ده لانى احنا عملناه قبل كده


تحياتى

EMMY BABY يقول...

عبد الهادى _سارة

ميرسى جدا ربنا يكرمك

وكمان ولا يهمك تتعوض فى تاج اخر

ربنا يحققلنا احلامنا كلنا

تحياتى

ايمى