السعاااااااااااااادة كنز لا يفنى

اولا ازيكم كلكم وحشتنى اوى الكتابة بس انا تقريبا الامتحانات مبتخلصشى ادعوووووووووووووووووووولى كتير

نيجى بقى لموضوع النهاردة وهو اجابات تاج السعادة من محمد غالية صاحب مدونة البحث عن السعادة بجد ربنا يكرمه لان فعلا الناس بقت مفتقدة معنى السعادة او بقت السعادة كلمة مبهمة فى قواميسهم مش هرغى كتير هدخل فى الموضوع علطول

السؤال الأول:ماهى السعادة من وجهة نظرك؟

السعادة معناها من وجهة نظرى نسبيا

ان ربنا يكون راضى عنى بجد واكون قريبة منه اوى بجد بتكون اسعد لحظات حياتى

انى احس بحب الناس اللى حواليا واحس بوجودهم جنبى وبتأثيرى فى حياتهم

لما احس ان كل اللى بحبهم كويسين وفرحانين ومفيش حاجة بتؤرقهم ببقى سعيدة

لما انام وانا بالى مرتاح محدش زعلان منى ومكنتش سبب فى جرح حد

لما احس انى بقرب من اهدافى فى خطوات ثابتة

هى دى السعادة من وجهة نظرى

السؤال الثانى: كيف تصل إلى السعادة؟

بحاول دايما اقرب من ربنا واراعى ربنا فى تصرفاتى

لما بلاقى حد ايا كان عنده مشكلة بفكر فى حل ليها قبل ما افكر فى حل لمشكلتى

بحاول انسى همومى فى وسط عيلتى وصحابى

لما بتكون عندى مشكلة او حاجة بفكر فيها كتير مسببالى حزن بشغل نفسى باى حاجة تانية علشان مفكرشى فيها كتير

السؤال الثالث: هل السعادة وهم أم أنها حلم صعب؟

اكيد مش وهم ياما مكنش حد عرف يحل التاج

ممكن نقول حقيقة صعبة المنال

السؤال الرابع: هل السعادة طريق للنجاح ؟وضح؟

هههههههههههههههههههه حلو وضح دى فكرتنى بامتحانات الدراسات وضح مع ذكر الاسباب

اه السعادة اكبر طريق للنجاح لان الانسان لما بيكون سعيد بيملك من الطاقة ما يمكنه من فعل الكثير من الانجازات والقرب من اهدافه وتحقيق النجاح

السؤال الخامس: ماهى أكثر اللحظات التى شعرت فيها بالسعادة؟

الحمد لله كتير لحظات السعادة ما اكثرها فعلا

السؤال السادس:هل ممكن أن تحقق كل شىء؟

ده بيبقى توفيق من ربنا بس لو الانسان عمل اللى عليه ومشى بترتيب صح وخطط للحاجة دى صح وتوكل على الله وربنا كان رايد تحقيق هذا الشى باذن الله هيتم

ولكن هناك الكثير من المعوقات التى تعيق تحقيق بعض الاشياء

السؤال السابع: السعادة تجعلك تقبل على الحياة أم لا؟

اكيد لما ببقى سعيدة بحس انى طايرة وانا فى مكانى بحس انى بحب الناس اوى وشايفة الدنيا ربيع وعايزة اذاكر وابقى عايزة اعمل اى حاجة كويسة

السؤال الثامن: هل أحسست يوما انك وصلت لقمة السعادة؟

معتقدشى لاننا نجهل قمم الاشياء المعنوية بس لو هقول القمة بالنسبة لمستوى سعادتى انا يبقى لما بكون قريبة من ربنا اوى اوى اوى

السؤال التاسع: لماذا تمر أوقات السعادة بسرعة؟

فى اعتقادى ان السعادة الشديدة بتخلينا فى حالة من عدم الواقعية وبالتالى بتكون غير متناسبة مع حياتنا فبنحاول فى كثير من الامور اننا نكون واقعين فبيخف تأثيرها ولكن هذا لا يعنى انها مرت بل هى موجودة وتستمر مادام لم يعكر صفوها شيئا اخر

السؤال العاشر: هل ترى السعادة فى التدين؟

من وجهة نظرى هو السبب الاساسى للسعادة الانسان فعلا بالفطرة محتاج يكون قريب من ربنا وعلشان كدة لما بيبعد بيحس انه ناقصه حاجة ولما يقرب يحس انه سعيد

السؤال الحادى عشر: هل أنت متفاؤل وعندك أمل؟ وضح؟

الحمد لله بس بتفائل بواقعية فممكن اقول مثلا انا بتوقع ان كذا كذا يحصل لاسباب معينة الاقى حد بيقلى انتى متشائمة وفى الاخر بتحصل برضه

يعنى مش متفائلة التفاؤل بقى اللى هو انا واثقة من اى حاجة

لا هو ان شاء الله خيرا بس لازم تكون فى نسبة احتمالات مش كويسة

وساعات بكون متفائلة بدون سبب مجرد احساس قوى ان الحاجة دى هتحصل وغالبا الحمد لله بتحصل

السؤال الثانى عشر: إذا شعرت بالحزن ماذا تفعل؟

بدعى ربنا وبعيط

مبكلمشى غير قليل جدا

بحب اقعد لوحدى كتير اتامل وافكر

قبل مانام بقضيها عياط

السؤال الثالث عشر: هل يستمر معك الحزن فترة ام ينقضى فى الحال؟

لا الحمد لله مبحبش الحزن يستمر كتير وبتخلص منه بسرعة بس برضه على حسب المشكلة اللى خلتنى اوصل للحزن اصلا

السؤال الرابع عشر: ما رأيك فى الأفراد المتشائمين؟

ربنا يهديهم

قال رسول الله صلى الله عليه وسلم

(الطيرة شرك )

اللى لاحظته فى التاج ده ان غالبا معظمنا نفس الاجابات وده راجع اننا كلنا فعلا محتاجين حاجة واحدة وهى قربنا من ربنا

اللهم ارزقنا الثبات على دينك يا ارحم الراحمين

تحياتى

ايمى