اهلا بيكم كلكم

(غلطة مطبعية ترحب بكل زوارها الاعزاء وبتمنى ليكم قضاء وقتت ممتع ومفيد فى مدونتى المتواضعة )

روعة الايمان

روعة الايمان

جوهرة الحياة هى ذكر الله

جوهرة الحياة هى ذكر الله

الأحد، 14 ديسمبر، 2008

ليه ؟؟؟؟؟؟

والله احترت كتير اكتب البوست ده ولا لا..... زى ما ساعات كتير بيبقى جوايا كلام وبحتار اقوله ولا لا


ببقى سعيدة دايما لما بحس ان اللى حواليا مبسوطين حتى لو جوايا حزن وشفت اللى بحبهم مبسوطين ببقى فى غاية السعادة


طب اعمل ايه بقى لما ادخل المدونة الاقى نص اللى بحبهم كلهم متضايقين واللى توقف عن التدوين واللى قفل المدونة واللى قرر انه يبعد من غير ما يقول انا هبعد


فوجئت بمجنون ومولان قافلين المدونة


برينسيس وسام تايمز بيمروا بفترة توقف عن التدوين


تامر وفارس بلا جواد وحبيب ومحاسن وليكوريكا ومحمود وكولد اير وكلمة وباجوجو و اورجانيل هارت بقالى كتير جدا مشفتهمش نزلوا بوستات جديدة حتى اللى منهم نزل تهنئة بمناسبة العيد كان بقاله فترة منقطع او انقطع بعديها


طبعا انا عارفة ان فى ناس كتير متوقفة علشان الامتحانات وظروف الدراسة او الشغل دووووول انا مش هعلق عليهم لان طبعا ده كتير بيكون هو الصح منخليش الكماليات تأثر على الاساسيات


والله مش عارفة اقول ايه انا ببص عندى فى قائمة المدونات لاقت تقريبا المدونين كلهم فى اجازة

طب انا واحدة من الناس مبعرفش بعد لما اتعلق بالناس يبعدوا عنى


يا جماااااااااااعة ليه منبقاش اقوياء ومنديش فرصة لاى ضعف يهزنا


ليه نسيب الدنيا تلعب بينا وتتحكم فى قرارتنا لييييه


ليه منقلش لاى حاجة تضايقنا لا ونقف فى وشها لحد ما نلغيها من حياتنا


ليه دايما بنستخسر فى نفسنا لحظات السعادة ونحب نعيش فترات طويلة من الحزن


ليه منحاولش نرسم ابتسامة على وشنا دايما علشان نعرف نرسمها على وش غيرنا


ليه منزدادش قوة بايمانا بالله وثقتنا فى ربنا وان اى حاجة بتحصلنا اكيد ربنا ليه فيها حكمة


مش معنى كلامى ان انت تفضل علطول فرحان والابتسامة من الخد ده للخد ده


لكن بقول منسبش لحظات الحزن دى تطول معانا وتأثر على قرارتنا وبدل ما نواجه نهرب


نفسى والله انادى بصوت عالى اوى وارجع الناس دى كلها تانى بس ياترى هتسمعوووووووووونى ولا برضه هتستسلموا وتسيبووونى
تحديث :
حسيت انى كان ليا حق احتار قبل ما اكتب الكلام
انا بس احب اوضحكلكم انى مكتبتش الكلام ده هجوم على الناس دى قد ماهو والله حب ليهم ورغبة فى رجوعهم
انا لما قلت احنا ليه كذا وكذا كنت بكلم نفسى قبل ما اكلمكم
عارفة ان الواحد بييجى عليه لحظات مبيقدرش يعمل حاجة ووالله عارفة شعوركم كويس بس انا جربت اللحظات دى وجربت اللحظات اللى ودعت فيها الحزن صدقونى انا كان قصدى نحاول نكون اقوى من حزننا ونتغلب عليه او على الاقل نحاول نخرج نفسنا منه ومنستسلملهوش
انا عارفة انك مش هتدوس على الزرار تبقى سعيد وتقفله تبقى حزين
والله انا فاهمة الكلام ده كله
بس انا بجد كنت نفسى كلكم تبقوا سعداء بجد من قلبى
وعلى العموم انا اسفة لو كان حد حد كلامى على محمل هجوم
اختكم
ايمى




هناك 36 تعليقًا:

princess يقول...

انا مقدرش اسمعك بتنادى وما اجيش
انا لسه بفكر صدقينى وحتى لو قفلتها هتلاقونى اكيد بتباعكم متقلقيش يا بنتى
:)

ABOALI يقول...

ايمى العزيزة

ان كان الهم كبير فرب الهم اكبر
فوجئت مثلك ببعض ممن من كتبتى اسماء مدوناتهم انهم مبتعدين عنها للاسف

فى بعض الاحيان يكون البعد ايجابى
يهيىء به البعض بعض اوراق حياته
ويقلب فى صفحاتها ثم يعود قويا مبتهجا" يحمل المسك فى يده ليعطى منها الجميع

ولكن الذى لاحظته

انه بعد سلبى

نتج عن تغليب العواطف على التفكير فى معطيات الحياه
مع انها حياه بها جميع الطعام والنكهات
فيها المالح والطيب فيها العسل وفيها الزعتر

ايمى

نحتاج كلنا تقوية العزيمه وتنمية الرغبه دائما فى الحياه والعمل والصبر

وهذا لا ياءتى الا باليقين
باءن هناك خالق يدير هذا الكون

ومطلوب من كل شخص

تحديد هدفه فى الحياه
حتى يحدد دوره فيها


اعجبنى صراحتك وبوستك وكلماتك
التى تنم عن الشخصية الناضجة الواثقة
التى ادعو ان تنتشر وتستمر مدى الحياه

دائما اقول
ان الانسان مثل كرة التنس
كلما يضرب يرتفع الى فوق ولا تنحنى له رقبه امام توابل الحياه او المشاكل كما يسميها البعض

تحياتى مرة ثانية لبراعتك وصدقك
فهل من مستمع ليعى ؟

موناليزا يقول...

انتى جميلة اوى على فكرة
وياريت كل اللى بتحبيهم يقدروا ده ومايبعدوش

الرومـيصاء يقول...

ازيك ياجميل


عامله ايه
ليكى وحشه والله

كل سنه وانتى طيبه



مشاعرك واحاسيسك
راقيه مشاء الله

يارب تفضلى مع الى بتحبيهم دايما

وانا مش اى مدون عامل مدونه مفيده وراقيه انه يقفلها

لازم دايما صوته يبقى مسموع


وده ميمنعش اننا بنحتاج اوقات نراجع حسابتنا

بس لازم نرجع تانى


ربنا ييسر امورنا ويصلح حال المسلمين
امين


دمتى بحفظ الله

عالم حبيب يقول...

السلام عليكم ورحمة الله وبركاته

كل عام أنتي بخير أختي الفاضلة آيمي

أنا أيضا كنت افكر في نفس الموضوع وكنت حابب أكتب تقريبا نفس الفكرة

أحيانا البعض ينشغل بأمور حياتية كالعمل والدراسة وغيره

وأحيانا فعلا يكون الوقت موجود لكن يمر الإنسان بظروف لا يطاوعه القلم عن أن يخط حرف واحد

لكن أوافقك الرأي أن في بعض الأوقات في ناس كتير بتحب تعيش لحظات " النكد " إن صح التعبير .. لأنهم يحتاجون إلى التعاطف معهم والذي هو موجود في الجو العائلي للمدونات في حين يفتقده البعض واقعا ملموسا في حياته الإجتماعية الحقيقية

لا أخفيكي أنني أغيب في بعض الأحيان لضيق الوقت وفي بعض الأوقات الأخرى لظروف نفسية خصوصا الوحدة في الغربة .. أفضل الإنسحاب لفترة بهدؤ دون إزعاج لأي أحد أعود بعدها أكثر نشاطا إن شاء الله .. لكن فكرة اغلاق المدونات هذه أظنها غير جيدة من وجهة نظري لأن التدوين ليست وظيفة يعتزلها الناس وإنما وسيلة للتواصل مع الآخرين للإفادة والإستفادة في أمور الدنيا والدين

جزاكي الله كل خير

princess يقول...
أزال المؤلف هذا التعليق.
شخـا بيــط مـحـجـوب يقول...

اخبارك يا ايمى
ان هئلك بكل بساطة معاكى كل كل الحق

تحياتى ليكى

شخابيط mahgoub

DR.HAMAS يقول...

هو بصراحة فيه تقلبات كتير

أحيانا بنحس اننا بنضحك على نفسنا

و أحيانا بنحس اننا بنفيد و نستفيد فعلا

القضية محتاجة ان التدوين يصبح وسيلة لا غاية

و لا يؤثر على حياتنا الواقعية

الموضوع محتاج توازن

و أنا حتى الآن لم احسم هذا الأمر لدى

فاعذريهم







د.حماس

smilyrose يقول...

حبيبتى ايمى على فكرة

دى ظروف وهتعدى ان شاء الله

واكييد كله هيعود

واكيد الناس اللى بنحبهم هيعودو من تانى

البت مولان قولتلها ترجع ياما هحرمها

من المصاصة اللى وعدتها بيها

واكيد مجنون اول ما يقدر يعود هيعود

والباقيين اكييد عندهم ظروفهم

بس هما على يقين ان فيه ناس مرتبطه بيهم
ومش هيقدرو يبعدوا كتير

ربنا ما يفرق شملنا ابدا

smilyrose

روح الحب الصادق

سفروتة يقول...

شوفي يا ايمي

في ناس لما بيأثر عليها شئ معين مبتعرفش تفصل -وانا واحدة من الناس دي علي فكرة-ولما يوصل بيهم الحال لدرجة الحزن والكآبة مبيعرفوش يخرجوا نفسهم من الحالة دي بسرعة
ممكن يكون بعدهم ده لانهم مش عاوزين يحملونا همهم ..او لانهم لما هيكتبوا كل الكلام اللي هيطلع هيبقي حزين ..او انهم بعدوا لانهم محتاجين فترة يبعدوا فيها عن كل حاجة ويعيدوا ترتيب حساباتهم من جديد
هما محتاجين مننا اننا ندعيلهم ان ربنا يفك عنهم ويبعد عنهم الهم والحزن
واكيد مش هيقدروا يبعدوا عن العيلة الجميلة اللي بتضمنا كلنا

وياريت كمان يشوفوا البوست ده ويعرفوا قد ايه فيه ناس بتحبهم

دمتي بكل ود
:)

mohamed ghalia يقول...

أنا والله بضم صوتى لصوتك
كل الناس الى اتكلمتى عنهم أنا كمان متابعهم ومفتقدهم بشده
الواحد فى عالم التدوين ارتبط بناس كتير
ربنا يجمعنا دايما على المحبة
ياريت نتعلم إزاى نكون سعداء
دمتى فى حفظ الله

ليكوريكا يقول...

محدش بيبعد لانه عاوز يبعد

اكيد في حاجات كتير بنعملها غصب عننا

كلامك بجد جميل ومحتاجين كلنا نطبقه

لكن للاسف احزاننا كتير بتنسينا كل اصوات العقل والحقيقه من حوالينا

صدقيني في مشكلات بيقف قدامها البني آدم عاجز عن عمل اي شيء

وومبيبقاش ليها حل غير اننا نلجأ لربنا

احساسنا بالياس بيخلينا نفقد طعم الحاجات الحلوه اللي حوالينا

التدوين واحد من الحاجات دي

بنخاف علي الناس اللي بنحبهم من كتر مبنتكلم عن احزاننا

بنحس بالملل من عبارات المواساه اللي بنقراها لو كتبنا حاجه

لكن صدقيني باذن الله الناس دي كلها هترجع

بس بنحتاج دعوه بظهر الغيب

دعوه بني آدمين مشافوش بعض لكن عرفوا كتير عن حيات بعضهم وارتبطوا بيها وعاشو احزانهم وافراحهم

بجد موضوعك جميل

ومندمتش اني جيت هنا وقريته

اشكرك مره تانيه

blue-wave يقول...

والله فعلا معاكى حق
وياريت الكل يسمع
ياريت نبقى اقوى ببعض ومع بعض
ياريت بجد

romansy يقول...

الصراحه مش عارف ايه اللى بيحصل بس هى ظروف بجد
انا مبسوط قوى ان ايمى هى اللى بتقول الكلام دا
الله يسعدك ويكرمك
وكلامك فعلا صح الصح
بس سا محينا

المبرمج المحترف يقول...

اكيد كل واحد ليه ظروووف

بس المهم ان احنا لازم نديهم عذر

يعنى ممكن اكون انا زعلت منك عشان بقالك كتييير مش بشوووفك ولا بتسألى ولا حاجه ..

كان المفروض انى افضل على زعلى ... لاطبعا


لازم اخلقلك عذر .. حتى لو مش عندك

عذر بس الاهم ان الصله مش تتقطع

ولازم نتابع بعض حتى ولو ب اوف لاين صغنونه "عامل ايه يا فلان"
بس هو كدا يبقا فى تواصل


اتمنى ان كل المدونين يسألوا على اللى غايب..بجد بتبقا ف منتهى السعاده لما لاقى حد بيسأل عليك وانت غايب ...

ومتتأخريش ها ..

كل سنه وانتى طيبة

طـــائر الليــــل الحـــــزين يقول...

بجد انتى واحشتينى جدااا يا ايمى
وكل الكلام اللى انتى كتبتيه بيدل على جمال شخصيتك وصفى قلبك وحبك الرائع للناس اللى انتى عرفتيهم عن طريق التدوين
وانا معاكى فى كل اللى قولتيه
وبنادى معاكى يا جماعة مينفعشى نستسلم لموقف صعب او حتى جرح او حالة نفسية بتمر علينا
لازم نقرب لربنا عشان يقوينا ويزود ايمانا
واتمنى ان كل المدونيين اللى بعدوا يرجعوا تانى بأذن الله
تحيااااااتى لبوستك الرائع يا ايمى

مولان يقول...

حبيبتي ايمي

ايه بس الكلام الكبير ده

انا معاكم اهو وبتابعكم لكن قفلت مدونتي عشان المي مش عاوزه حد يشوفه حزين وكمان حصل اكتفاء مش بقي عندي افكار انزلها وبالتالي يبقي اقفل المدونه واكيد لما هلاقي حاجه نفسي اخرجها هفتحها تاني وهكتب تاني لكن ان لسه بفتح الريدر وبقرا بوستاتكم وبرد عليكم وبتاعبعكم وبطمن عليكم
لاني ببساطه مقدرش ابعد عن اخواتي والناس اللي بحبها لكن محبهمش يشوفوني حزينه

ندائك غالي عندي اوي ياايمي ياقمر

وهاتي المثاثه تاعتي بقي :)

مولان يقول...

سميلي

********

لا مث تحرميني من المثاثه هزحل بقي

عااااااااااااااااااااااااااااا

حسن حنفى يقول...

بجد معاكي الف حق

ناس كتير حذفت مدوناتها بدون سبب واللي بيقفلها مؤقتا واللي مش بيفتحها الا في الاعياد

اتمني ان يكون الجميع بخير

wafaa يقول...

مش هقولك غلط كلامك
ولا هقول اللى بيبعد غلطان .. انا ده اول رجوع ليا من بعد غياب . هى مجرد فترة لتصفية الذهن واعادة ترتيب اوراق الحياة
احنا بشر يا ايمى , بنحب اللى حوالينا ومش بنحب نفارقهم لكن اما نلاقى روحنا بدأت تروح مننا لازم نقف شوية معاها ونشوفها زعلت مننا ليه ونتصالح مع نفسنا عشان نقدر نكمل مشوارنا
تحياتى لقلبك الدافى

نعكشة يقول...

:)

والله انتي سكرة

انا محتاجة الي حد ما الكلام اللي قولتية



مش عشان اوقف تدوين ولا افضل دون بس في الحياة عامتاً



محتاجاة بس المشكلة

اني مبقتش بعرف اجيب منين حتة السعادة دية


محتاجة اعادة هيكلة
وانا مش فاضية صراحة اعمل اعادة هيكلة

فالدنيا متكعبرة حتى يتاح الوقت

بس بين وقت للتاني بحاول اضحك برضو من نفسي

ههههههه

يلا كل سنة وانتي طيبة
سلام عليكِ

mero-moory يقول...

السلام عليكم و رحمة الله و بركاته

أول زيارة ليا هونا بث أولا اسمك غالي عليا جداااااا بيفكرني ببمبينو عثثثل بموت فيها

وثانيا عندك حق ياايمي والله في كلامك الاستسلام للحزن ضياع وموت بالبطيء بس صدقيني يمكن لاني حاسة بيهم وبمر بنفس اللي بيمروا بيه
بيبقى غصب عننا لما نلاقي حزننا غالب ويخلينا نبعد او نبكي او موش عارفين حتى نتكلم

انا كمان بتمنى ليهم كلهم يرجعوا وبتمنى ليا ارجع لنفسي نفسي لان الاولى موش كانت حزينة بالشكل ده

تسلمي بجد على البوست الحلو ده

في رعاية الله

صباح الصباح يقول...

بصى يا ستى

موضوع الحالة النفسية ماهياش عبارة عن سويتش ادوس علية اطير من الفرحة او ادوس تانى اعيط

لا يا ايمى الحياة فيها اعتبارات كتير اكتر من كدة.. يمكن عشان انتى لسة موجودة فى عالم محدود اللى هوة الكلية انما لما تخرجى للحياة العملية .. الواقع بجد مش ظريف ومليان مشاكل واحيانا كتير مهاترات وسخافات بدون حدود

اكيد فية فترات بنقع فيها.. المهم ان الوقوع ما يطولش ونرجع باذن اللة نقوم من جديد ونبدا بالامل مرة تانية (بصى كدة البوست اللى فات بتاعى)

الحياة مش دايما زفت بس برضة مش دايما شربات .. بين دة ودة والشاطر اللى يوازن

Son of Egypt يقول...

السلام عليكم
يمكن اول مره ازور مدونتك وانما فوجئت بالبوست اللى كله اخلاص ومحبه وسعاده وامنيات للغير هذا وان دل على شئ فيدل على انك انسانه رقيقه المشاعر حساسه محبه للأخرين ومخلصه للمحبين لقلبك
انا معاكى ان ده شئ يحزن بصراحه الناس اللى انتى ذكرتيهم كلهم من غيرهم التدوين ينقص كتييييييير جدا
عموما كان لازم اقولك انك حد طيب اوى
تقبلى مرورى

nageh

طوبة ذهب وطوبة فضة يقول...

مش انتى لوحدك اللى بتفتقدى الناس دى كلنا مفتقدنهم ونتمنى يرجعوا تانى فى وسطينا ذى ما اتعودنا يكونوا معانا بقلوبهم وبموضوعتهم يارب يا ايمى بس فعلا ما نعرفش ظروفهم ايه او ايه اللى شاغلهمربنا يقويهم ويرجعهم بالف سلامه وربنا يكرمك على سؤالك وان شاء الله يلبوا ندائك

EMMY BABY يقول...

برينسيس

ربنا يخليكى ليا

فكرى على مهلك صدقينى انا مش قلقانة بس انا عايزاكى تتابعنى وانا حاسة بيكى مبسوطة علشان انا كمان احس انى مبسوطة

تحياتى لتلبيتك النداء

ايمى

أحمد حشمت يقول...

انت فين
من زمان محدش سامعلك صوت
يا رب تكوني بخير دايما
وكويسه قوي جرعة التفائل دي
وكمان الثورة اللي انتي عاملاها
بجد لازم منسيبش نفسنا
تتحكم فيها الظروف
لازم نكون أقوياء
..............
تحياتي
وكل سنة وانت طيبة

M.K يقول...

السلام عليكم..
أنا زيك كده يا إيمي ...
بس الحمدلله إن بعضهم رجع زي كيارا..
والبعض بيتابع من بعيد..
ومستنينهم يرجعوا بالأجازه..
.......
إنتي شخص جدا حساس وبتحبي صحابك..
ربنا مايحرمنا منك يا عسل..
...
دمتي بخير..

فارس بلا جواد يقول...

ازيك يا ايمي
اولا باعتذر عن التأخير لكن ده ماكنش بسبب حالة حزن او شيئ من ده لكن بس مجرد زحمة شغل وحتي فترات الفراغ بالاقي القلم معاند مش عارف ليه
لكن انا باشكرك جدا علي المتابعة وعلي الكلام اللي قولتيه في البوست وعموما انا كنت منزل بوست امبارح قبل ما اقرا البوست بتاعك .. وان شاء الله الفترة الجاية هاكون متابع اكتر
وانا باتفق معاكي في كلامك كتير وملاحظ ان الحالة النفسية لبعض المدونين بتاثر علي مدوناتهم سواء لوجود الحزن في الكلمات او محاولة البعض لاغلاق المدونات
ربنا ييعد الجميع ويبعد عننا اي حزن
تحياتي

كلمة يقول...

السلام عليكم
اهلا ايمان
كل سنه وانتى طيبه
ياريت تكونى لسه فكرانى

بجد عندك حق احنا قصرنا جامد
مش هقولك اسباب ومبررات عن الغياب
كل ده كلام فاضى احنا بنضيع وقت كتير

بس اكيد راجعيين
وده اول رد اكتبه من اكتر من شهر

واسف جدا
تحياتى لكل المدونين وليكى بالخصوص

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
م/ الحسيني لزومي
مدونة /مواطنون ضد الشعب
-----------------

الازهرى يقول...

الجميلة ايمى

اضم صوتى اليك فى النداء

وليتهم جميعا يستمعون اليه ويعودون
او حتى تكون مجرد اجازات لتنشيط الذهن والراحة
اما الابتعاد نهائيا فانا لا احبذه

تحياتى دوما

مـجـنـووون يقول...

في أوقات الواحد بيبقي محتاج فترة يرتب فيها أفكاره ويستجمع فيها قوته علشان يقدر يواصل

وأنا بقولك أن مش صح أن الواحد يقفل مدونة أو يحذفه بس في أوقات بيكون بعده راحه لناس كتيرة

تقبلي مروري سيدتي الجميلة
مجنووون

مصطفي زهران يقول...

مدونتك مدونه جيدا واتمني ان تزيلي اللون الاسود منها لان كلها امل فلما السواد واتمني ان تزوري مدونتي واتشرف بذلك

ABOALI يقول...

ايمى
مررت من هنا لاءطمئن عليكى
واتمنى ان تكون الامتحانات فقط هى سبب ابتعادك عنا
فاءن كانت هى فاءن شاء الله ستمر عليكى بردا وسلاما
وان كانت غير ذلك فاءنت مثال لحواء الجميلة التى مهما قست عليها الدنيا فهى الملكة المتوجة

اتمنى لك كل الخير

تحياتى الراقية

Sometimes يقول...

يا نهار ابيض
يعنى انتى بتنادى عليا وانا معرفش
انا الحمد لله رجعت يا ايمى
يمكن بعد موضوعك بيومين
معلش يا ايمى لو زعلتك
بس بجد لو كنت كتبت حاجه وانا فى نفسيتى الهباب اللى كنت فيها كنت هحس بالذنب انى بتعبكوا معايا
بس تعرفى انى تعبت اكتر انى بعدت عنكم
ربنا ما يحرمنى منك ابدا

ياترى اخبار امتحاناتك ايه؟؟
ربنا يوفقك يا حبيبتى ويحميكى ويخليكى ليا