اهلا بيكم كلكم

(غلطة مطبعية ترحب بكل زوارها الاعزاء وبتمنى ليكم قضاء وقتت ممتع ومفيد فى مدونتى المتواضعة )

روعة الايمان

روعة الايمان

جوهرة الحياة هى ذكر الله

جوهرة الحياة هى ذكر الله

الثلاثاء، 19 أغسطس 2008

اسمعووووووووووا واعوووووووووووووووا ده مفضلش الا يومين

كان نفسى دايما من زمان انى اشارك فى قافلة سواء كانت خيرية او طبية ففى كلا الاحوال هتقدر تقدم حاجة غيرك محتاجها فعلا
ومن كام يوم كنت نفسى اوى اشارك فى جمعية رسالة باسرع وقت ممكن
وسبحان الله جالى لينك لاقت رسالة فيها تنظيم من جمعية رسالة لاكبر قافلة لمركز قليوب محافظة قليوبية وبسرعة جدااااااااا بصيت فى التفاصيل لاقت الموضوع ميسر جداااا يعنى اتوبيس من امام الدار لا ومش بس كدة داحنا هنرجع فى نفس اليوم وطالما فى نفس اليوم فممكن بابا وماما يوافقوا
رحت قايمة من على الكمبيوتر رحت عاملة لماما ازاى اوعى ترفضى بجد دانا نفسى اوى قالتلى هو ايه ده قلتلها هطلع قافلة يوم الجمعة وقلتلها التفاصيل بس مجاش فى دماغى اقلها انه لمحافظة القليوبية المهم وافقت
شوية لاقتها بتقلى هو انا ينفع اطلع معاكى اهو نرجع سوا قلتلها طبعااااااااااااااا قالتلى هو لفين ؟؟؟؟؟؟
احم احم ماما بتسألنى
قلتلها لمحافظة القليوبية قالتلى ايه ده يايمان طب ازاى لا استئذنى ابوكى قلتلها طب قوليله انتى قالتلى لاا انتى اللى لازم تقوليله
طبعا مقلتلهوش لانه كان عايز ينام
استنينت لحد ماصحى بعد الفجر ورحت قايلاله بابا انا طالعة قافلة تبع رسالة لمحافظة القليوبية طبعا بابا قعد يسأل وانا قاعدت اجاوب والحمد لله حصلت على الموافقة من كلاا الطرفين
طبعا اكيد انا مش هرضى ابدا انى اطلع لوحدى بجد عايزين كلنا نشارك نفسى والله تطلعوا بجد هما محتاجين متطوعين كتير
واللى محتاج تفاصيل
ده نص الرسالة
اولى مفاجآت رساله قبل رمضان ودى قافله تابعه لرساله مصر الجديده احد اكبر واهم الفروع لكن اى حد يحب يشارك فى القافله من اى فرع او غير متطوع اهلا بيه القافله دى من اكبر القوافل لرساله ومحتاجين متطوعين كتير جدا واللى طلع معانا قافله امياى ببنها شاف العدد حوالى 6 اتوبيسات ان شاء الله دى محتاجين عدد اكبر فى انتظاركم كلكم ان شاء الله سواء من فرع مصر الجديده او من اى مكان التفاصيل:قافله توزيع لقريه السد-مركز قليوب-محافظة القليوبية يوم الجمعه 22/8/2008ان شاء الله القافله دى حتشمل:-شنط غذائيه-توصيل مياه-مشاريع صيانة أسقف-تجهيز عرائس- توزيع سراير ومراتب-توزيع بوتاجازات وغسالات وكراسى متحركه-معرض ملابس معرض اطعمه التجمع ان شاء الله الساعه 8ص امام الدار والتحرك حيكون 9ص والرجوع 8م لاشتراك برجاء تسجيل الاسم باداره المتطوعين وفريق الاتصالات بلجنة القوافل
اه صحيح ياجماعة انا اتصلت بادارة المتطوعين فعلاا وسجلت اسمى و ياريت بجد انتم كمان تشاركوا اكيد احنا كلنا محتاجين الشعور ده
وللى عايز يتصل النمرة اهى
26211307
ولما اتصلت قالتلى ان ان شاء الله هيكون فى قافلة تانى يوم السبت علشان اللى مش هيقدر يشارك يوم الجمعة ممكن يشارك السبت
كل سنة وانتم طيبين ورمضان كريم
تحياتى ليكم كلكم
ايمى

هناك 21 تعليقًا:

عايش... ولكن !!!! يقول...

حلو الموضوع ده بس للاسف مش هقدر اشارك لانى اليومين دول مشغول جدااااااااااا تتعوض ان شاء الله لو فى مره تانيه
وابقى احجزيلى معاكى

EMMY BABY يقول...

عايش ولكن

ان شاء الله تتعوض مرة تانية هى قالتلى ان فى قافلة تانى يوم السبت علشان اللى مش هيقدر يوم الجمعة

وان شاء الله تتعوض فعلا

احجزلك معايا فى ايه بقى هههههههههه ده مش حجز دانت بتسجل اسمك معاهم كمتطوع يعنى لو هتروح بس وكمان دانت بتمليهم اسمك ورقم تليفونك يعنى بالظبط فى دقيقة

نورت المدونة

تحياتى

ايمى

نونو يقول...

ربنا يجعلة فى ميزان حسناتك
ادعيلنا كتتتتتتتير جداااا

EMMY BABY يقول...

نونو

نورتى المدونة وان شاء الله هدعيلكم وتدعولى وكلنا ندعى لبعض D:

تحياتى

ايمى

Ahmed Atia يقول...

امتياز ايمى بيبى ربنا يوفقك دايماً وكملى اعلانات لاى حاجه محتاجه متطوعين وفيها خير الواحد مننا لازم يخلى وقت ثابت للحاجات دى انا هحاول وربنا يسهل
واكرر شكرى وتحياتى
ا.ع

EMMY BABY يقول...

احمد عطية

ده دايما اللى اعرفه عنك انك سباق للخير

ربنا يكرمك يارب

وان شاء الله لو فى اى حاجة تانى هبلغكم


تحياتى

ايمى

Cold air يقول...

السلام عليكم

ازيك يا إيمي بجد سوري عالتأخير
و مرسي علي تشريفك لعيد الميلاد
و عقبال منحتفل بيوم ميلادك

^_^

و أنت دايما صاحبة رسالة و أكيد شعور خير منك إنك تحبي مساعدة الناس
جزاك الله كل الخير و يا رب أنا كمان أقدر أشارك في قافلة عندنا بالشرقية

مع تحياتي

عالم حبيب يقول...

الله يوفقكم يارب .. جميل جدا مشاعرك وحرصك في المشاركة في حاجة زي كده .. كنت أتمنى اشارك معاكم .. ان شاء الله لما ارجع مصر نشارك .. ربي ييسرلكم ويجزيكم كل خير

عالم حبيب يقول...
أزال المؤلف هذا التعليق.
ابو صهيب ( الجمعاوي الاصيل)سابقاً يقول...

مبروك تحقق املاكم

واسعدكم الله دائماً بفعل الخيرات

وتقبلها منكم

وتقبلوا خالص تحياتي

Tamer Alhosiny يقول...

عزيزتي ايمان
اسمحي لي اني احيي فيكي هذا الاحساس الاجتماعي الراقي
واتمني ان ده يبقا في ميزان حسناتك باذن الله
وعايز اقولك يا ايمان ان افضل شيء للخروج من اي ذكري اليمة انك ترسمي البسمة علي شفاه الاخرين
وصدقيني لما تشوفي بسمتهم هتحصلي علي الابتسامة الحقيقية الاي انتي محتاجاها
علشان تكملي طريقك بنجاح

تحياتي ليكي

تامر الحسيني
انسان عاشق حر

Unknown يقول...

والله يا إيمى الواحد هنا ف اسكندرية مش عارف يعمل ايه ف الحاجات الجميلة اللى بتعملوها دى

لو فى حاجه داخل اسكندرية قوليلى

اه نسيييييت
انا هديتك تاج
ولازم لازم لازم لازم عارفه يعنى ايه لازم

لازم تجاوبى عليه انتى ونورى

http://elmobarmeg-elmo7taref.blogspot.com/

سلالام
خلينا نشوفك ع الياهو

Unknown يقول...

السلام عليكم
ازيك يا امى
بجد مشروع حلو جداا وفقك الله الى ما يحبة ويرضاه

بصى لو تسمحى ادخلى عندى ثانية وشوفى اللى انا كتبتة بس للاسف مش كل الحقيقة

فارس بلا جواد يقول...

أزيك يا أيمي
باحب أوي فكرة القوافل .. بس للاسف ماكنش ليا حظ اطلع قافلة
كان في قوافل عندنا في الكلية بس كانت قوافل طبية بتقدم خدمات وعلاج لأهل المدينة وكانت بتستمر لمدة أسبوع .. بس المشكلة كانت الاعداد محدودة وفي ناس كتير عايزة تطلع عشان كده ماكنش ليا حظ اروح
بس اكيد بيبقي عندك احساس بالسعادة لأنك قدمتي خدمة لمحتاج
ربما يعينك دايما علي فعل الخير
تحياتي

EMMY BABY يقول...

احمد كجول

نورت المدونة وشكرا لزيارتك ومبروووك على بداية العمل ربنا يوفقكم

تحياتى

ايمى

EMMY BABY يقول...

حازم ولا سورى ولا حاجة وكمان حد يفوت عيد ميلاد حازم

وربنا ييسرللك انك تروح قافلة

بس انا من القاهرة مش من القليوبية

ولعلمك اكيد فى فروع لرسالة عندكم

تحياتى

ايمى

EMMY BABY يقول...

عالم حبيب ربنا يرجعك بالسلامة لمصر وتقدر تشارك

وتحقق خير كتير

ربنا يوفقك

تحياتى

ايمى

EMMY BABY يقول...

الجمعاوى الاصيل

ميرسى لمرورك

ربنا يتقبل منا ومنكم صالح الاعمال

تحياتى

ايمى

EMMY BABY يقول...

تامر الحسينى

دايما تعليقك بيسعدنى والله

وفعلا والله احساس روعة يخلى الواحد ينسى الدنيا بهمومها اصلا

ربنا دايما يجعلنا سبيل فى رسم الابتسامه

تحياتى

ايمى

EMMY BABY يقول...

عمر

اكيد هتلاقى حاجات حلوة عندكم برضه دور بس

على العموم لو عرفت اى حاجة فى اسكندرية هقلك

وان شاء الله هحل التاج

تحياتى

ايمى

EMMY BABY يقول...

نهر الحب

وعليكم السلام

انا كويسة الحمد لله تمام

ودخلت والله فعلا ماساة ربنا يتولاهم برحمته

تحياتى

ايمى