اهلا بيكم كلكم

(غلطة مطبعية ترحب بكل زوارها الاعزاء وبتمنى ليكم قضاء وقتت ممتع ومفيد فى مدونتى المتواضعة )

روعة الايمان

روعة الايمان

جوهرة الحياة هى ذكر الله

جوهرة الحياة هى ذكر الله

السبت، 23 أغسطس 2008

متعة العطاء

بجد انا مش عارفة هقدر اقول كل اللى حاسة بيه ولا الكلام مش دايما بيكفى للتعبير عن كل حاجة


امبارح الحمد لله رحت الفافلة صحيت الساعة 5 وربع علشان الميعاد ميرحش عليا ونزلت الساعة 7 كنت حاسة انى فى منتهى النشاط


رحت لاقيت الناس لابسة تيشرتات موحدة مكتوبة عليها رسالة من قدام ومن ورا متعة العطاء


كنت فاكراهم اعضاء رسالة نفسهم طلعت الباص فوجئت انهم بيدونى تيشرت البسه انا كمان قلتلهم هو لازم قالولى ده فى مصلحتكم علشان اولا متهوش ثانيا علشان لما سكان القرية بيهجموا بيعاملونا احنا معاملة خاصة من غير ضرب يعنى


ولبست التيشرت وبما انى مكنتش اعرف القافلة دى بتبقى عاملة ازاى رحت بابيض ههههههههههه ومادراك ما الابيض لاقيت الناس بتقلى جاية بابيض قولى على لبسك يارحمن يارحيم وابص الاقى الكل لابس الوان غامقة قلت يلا مش مهم المرة الجاية ابقى اجى بغامق


اصلا لبست التيشرت وهاتك ياضحك عاملين التيشرتات واسعة جدا جاية عليا بحر كنت عايزة حد تانى معايا ههههههههههه


المهم حصل مشكلة وهى ان الاتوبيسات تاهت من بعضها وده كان سبب تاخير كنا قاعدين جوة الباص ومن حظنا برضه التكييفات كانت مش شغالة ومقلكمش بقى على مدى الحر اللى كنا فيه بس سبحان الله فى وسط كل ده بدأوا بقى المنظمين يكلمونا عن ان كل مازادت المشقة زاد الثواب واقلنا حبة اذكار وبدأنا نعدد النوايا بجد قالوا حبة نوايا كانت جميلة جدااااااااا زى مثلا


ادخال سرور على مسلم


فك كربة من كربات الدنيا


فى هناك ايتام فتعتبر كفالة يتيم


فى منهم ارامل ومساعدة الستات الارامل بيكون عند ربنا احسن من الجهاد فى سبيل الله


غير تركيب الاسقف بيبقى حماية لانسان من حر الشمس علشان ربنا يخفف عننا حر يوم القيامة
وبرضه افطار صائم لان الشنط اللى بنوزعها دى هيفطروا منها بعد كدة
وبناء بيت مسلم لاننا كنا بنساعد فى تجهيز العرايس


غير بقى نوايااااااااااااااااااااااا كتير جدا بجد


المهم وصلنا على صلاة الجمعة دخلنا القرية كنا 6 اتوبيسات سياحية كبيرة وورانا عربيات النقل محملة وكنا 350 متطوع بقى اهل القرية بيبصلنا بتعجب وانتم مين وجايين هنا ليه وكدة بقى D:


وبدأنا الشغل كنت انا فى فريق توزيع الشنط على الاسر الفقيرة الجروب بتاعنا وكانت كل اسرة ليها شنطتين بجد الشنطة كانت بتبقى تقيلة جدا وبنمشى بيها فى القرية ونلف على بيوت ناس معينة كان معانا كشف باسماء الناس المحتاجة


وكان فى مشاريع للناس كانت مشاريع خضار


والولاد بجد تعبوا جامد حفروا علشان يدخلوا مواسير المية وعملوا الاسقف كانت اسقف جاهزة


وكانوا بيشيلوا الغسالات ماشاء الله عليهم


وكان فى فوانيس للاطفال وتنظيف للمساجد وتجهيز عرائس يعنى جايبنلهم حاجات فى الجهاز وكدة واسمعوا الزغاريد هههههه عقبالكم كدة ياشباب وعقبالنا :))


بجد تخيلوا ان القرية نادر لما تلاقى فيها مية نظيفة كنا هنموت من العطش فعلا على اخر الرحلة فما بالكم باهل القرية ياما يشربوا مية مش نظيفة ياما يموتوا من العطش
والله ياجماعة احنا فى نعمة عارفين يعنى ايه ان فى ناس عمرها ماشافت اللحمة عمرها ماعملت رز ومكرونة الاكل اللى بالنسبة لنا احنا حاجة عادية عمرهم ماشفوه
عارفين يعنى ايه تكون واحدة مكفوفة وملهاش زوج وهى اللى مسئولة انها تراعى اطفالها
عارفين يعنى ايه زوج فقد عقله وتقاعد وملهوش غير الله ثم مراته اللى مفيش فى ايدها حاجة
والله مآسى انا عمرى ماكنت اتخيل ان الوضع كدة
كان فى واحدة حكتلنا على موقف حصل معاها فى قافلة تانية وكانت قافلة استكشافية انها دخلت لاقت سيدة مسنة مكفوفة لها ابن ولكن زوجة ابنها تمنعه من زياراتها او مساعدته لا يزورها احد ولما سألوها نفسك فى ايه قلتلهم انا مش عايزة حاجة غير ان حد يزورنى وبعد كدة ذكرت انها حوشت فلوس كفنها لكن جارتها ماتت ولم يجدوا لها كفنا فاعطتها كفنها
وهى دلوقتى بتحاول تحوش تانى فلوس كفنها تانى !!!!!!!!!!!!!!!


وخلصنا على الساعة 7 كان كله بيشتغل بكل طاقته كان فعلا كله عايز يشتغل لدرجة ان احنا كان معانا مكفوفين بيساعدونا


ووصلنا قدام الدار زى ماوعدونا فعلا 8 وربع


بس انا روحت البيت على 10 ونصف D: لان انا اصلا بعيد عن مكان الدار نفسها كمان


كنت هلكانة


بس بجد عمرى ماكنت تعبانة بالمنظر ده ومبسوطة بالشكل ده


رجعت البيت قعدت اقول لاخواتى احمدوا ربنا على المية دى


شوية اقلهم احمدوا ربنا على الاكل بجد


ههههههههههههههه عقدتهم :))


واختى الصغيرة قالتلى انا هطلع معاكى القافلة اللى جاية قلتلها ان شاء الله ياحبيبتى


بجد فعلا صحيت من النوم كان جسمى مكسر بس كنت فرحانة جدا قمت مبتسمة كدة


بجد ياجماعة انا بحمد ربنا جدا انى طلعت القافلة دى والحمد لله اتعرفت على ناس جميلة ربنا يكرمهم


تخيلوا كم الثواب اللى هتاخده علشان خاطر حبة تعب صغيرين حتى لو الواحد مقدرش ييجى بس قال لحد والحد ده جه فهو هياخد الثواب زيه لان الدال على الخير كفاعله


الحمد لله على نعمة الاسلام ونعمة الصحة والمال


تحياتى


ايمى

هناك 39 تعليقًا:

عالم حبيب يقول...

مش عارف صحيح أنا أول تعليق ولا دي غلطة مطبعية هههههههههه

نجرب كده

عالم حبيب يقول...

لا أول تعليق بجد .. ايه الحلاوة دي

نرجع بقى لموضوعنا .. أختى الفاضلة ايمان .. أولا ربنا يجزاكي وكل اللي شاركوا واللي كان نفسهم يشاركوا خير الجزاء

بجد كنت أتمنى أكون معاكم زي ما كتبت في التدوينة اللي فاتت .. ادعولنا ربنا يرجعنا مصر ان شاء الله على خير

انتي نقلتي الصورة بمشاعر صادقة حتى ان الواحد حس انه معاكم وشايفكم وانتم بتدخلوا السعادة في قلوب الناس دي .. شاركت قبل كده في حاجات زي كده .. أد ايه عمل بسيط ممكن يسعد قلب حزين .. وأد ايه فرحتك رغم أي تعب بتشوفه مستشعرا الثواب من الله

الأجر على قدر المشقة .. الأجر في التكييف غير الأجر في الحر .. شوفي اهوه دلوقتي راح التعب والحر وكل شئ .. فكري في الثواب ان شاء الله

ربنا يارب يوفقكم ويحفظكم

أخوكم : حبيب

ليكوريكا يقول...

فكرتيني بايام السنه اليل فاتت

احنا بقي كان اياميها عاملين الشنط بابيدينا وموزعينها بابيدينا

يارب بس الدوره تخلص والحقهم علي الاقل قبل ميوزعوا

بجد مش بس الراحه النفسيه واحساس الخير اللي بيملا الواحد

لا استني وشوفي بركة العمل اللي انتي عملتيه ده علي مدار السنه الجايه كلها

ربنا يجعله في ميزان حسناتكم ويارب دايما الشباب للخير

ليكوريكا

موناليزا يقول...

يااا الله
ما اجمل هذا الاحساس
اتذكر مرة رحت مع قافلة ولكنها كانت اقل من الامكانيات دى بكتير ومع ذلك كنت مبسوطة جدااااا
فعلا والله العطاء نعمة بجد ويمكن الفرحة بتكون اكتر من فرحة اللى بياخد
ربنا يقدرنا دايما على فعل الخير
وكل سنة وانتى طيبة وتقبل الله منا ومنكم صالح الاعمال

EMMY BABY يقول...

عالم حبيب
هههههههههه لا مش غلطة مطبعية ولا حاجة :))


ربنا يجزينا واياك ان شاء الله

وان شاء الله ترجع مصر بالف سلامة وتشارك معانا كمان


انتي نقلتي الصورة بمشاعر صادقة حتى ان الواحد حس انه معاكم وشايفكم وانتم بتدخلوا السعادة في قلوب الناس دي .. شاركت قبل كده في حاجات زي كده .. أد ايه عمل بسيط ممكن يسعد قلب حزين .. وأد ايه فرحتك رغم أي تعب بتشوفه مستشعرا الثواب من الله

الأجر على قدر المشقة .. الأجر في التكييف غير الأجر في الحر .. شوفي اهوه دلوقتي راح التعب والحر وكل شئ .. فكري في الثواب ان شاء الله

فعلا والله زى ماقلت الثواب لاهانا تماما عن التعب الحمد لله

ربنا يوفقنا جميعا ان شاء الله

تحياتى

ايمى

EMMY BABY يقول...

ليكوريكا

بجد ربنا يجازيكم خير وتفضلوا دايما كدة وقوافل رمضان جاية كتير يارب اكرمنا ونقدر نطلع

وان شاء الله تقدر تلحقهم وتوزع معاهم

وربنا يجازيك خير ان شاء الله

ولعلمك لو تمنيت تعمل الحاجة اوى ومكنش فى استطاعتك تعملها بتاخد ثوابها برضه ربنا كريم فعلا

تحياتى

ايمى

EMMY BABY يقول...

موناليزا
وانتى طيبة

ربنا يجزينا واياكى ان شاء الله

فعلا الاحساس مش ممكن يتوصف

فعلا متعة العطاء :)

ربنا يكرمك يارب

تحياتى

ايمى

Ahmed Atia يقول...

جزاكى الله خيراً ايمى بيبى
فيه يوم الاتنين قافله وبالحجز بس معنديش اى تفاصيل عنها حالياً

EMMY BABY يقول...

جزانا واياك ياحمد

انا فعلا سمعت عنها وهى طالعة للبحيرة

بس احنا يوم الاتنين هننزل نقابل الطلبة الجدد فى الكشف الطبى فمش هينفع
هو لسة فى كتير

حتى فى فى رمضان كل يوم جمعة وسبت

تحياتى

ايمى

طلاب من أجل مصر يقول...

ياااااااه...انا اكبر غلط في حياتي اني معرفتش مدونتك دية من زماااان

لا انا كده هلفها لف من الالف الى الياء

مدونتك مش هقول راائعه ولا جميله ...هيه اكتر من كده بكتييير
وانا هقد هنا كل يوم استنى بوست
:)

بجد انا اغبطك بشــــــــــده على الزيارة دية
نفسي نفسي قبل ما اموت اعمل حاجه زي دية ولو مرة

تعرفي انا حاسه بطعمها من قبل ما اعملها فما بالك لو عملتها

ياااااااااااه هتبقى اكبر فرحه ليا

ربناااا يرزقك النك تروحي مرة تانيه
وهيه فعلا ....متعه ومتعه ومتعه ومتعه

بالذات انك بتقدمي المساعده لناس محتاجين

...
على حكاية الميه برده انتي بتقللنا واحنا مش هنسدق الا اما نشوووف والانسان بيعرف النعمه اما تتاخد منه

ربنااااا يوفقك ويبارك فيكي ...ويجعل ما عملتيه خالصا لوجهه وجزاك الله الفردوس

Unknown يقول...

بجد ربنا يباركلك يا إيمى ويجعله فى موازين حسناتك .. ان شاء الله



اه متنسيش يا إيمى التاج ها ...


تحياتى

أنا حر يقول...

المجتمع المدني دلوقتي لازم يكون ليه دور اساسي فعلا في تنمية مجتمعنا لأن الحكومة مش هتعمل كل حاجة
رسالة قامت بخطوات متميزة دورنا اننا نشارك معاها ومع غيرها لتطير مجتمعنا
بهنيكي على التجربة المتميزة دي وبتمنالك كل توفيق بس المرة الجاية تكوني لابسة غامق وتلاقي تيشيرت على قدك
:)
مدونة متميزة فعلا
تحياتي

كلام على بلاطة يقول...

عايز انضم لرساله
كل عام وانتم بخير
تحياتى

EMMY BABY يقول...

عبد الهادى _سارة

بجد تعليقك اسعدنى ماشاء الله عليك انك بتتمنى كنت تروح بالشكل ده ومتقلقش فى قوافل جاية كتير حتى فى فى رمضان كمان يعنى الثواب هيكون مضاعف

وربنا يرزقنا كلنا اننا نروح مرة تانية

وجزانا واياك الفردوس الاعلى

وميرسى جدا على الزيارة الحلوة دى واتمنى متكنش اخر زيارة

تحياتى
ايمى

EMMY BABY يقول...

عمر منور

ربنا يباركلك انت كمان


وان شاء الله هحل التاج متخفش


تحياتى

ايمى

EMMY BABY يقول...

انا حر

فعلا رسالة قامت نتيجة المتطوعين ربنا يقدرهم فعلا على مساعدة الناس المحتاجة دى

اما بخصوص ان البس غامق فتوبة دى اخر مرة اروح بابيض :))

لكن حكاية الوسع دى فلا مفر منها

ميرسى جدا لزيارتك الحلوة دى ويارب تتكرر علطول

تحياتى

ايمى

EMMY BABY يقول...

كلام على بلاطة

شوف اقرب فرع ليك واقلى وانا اجيبلك نمرته

وان شاء الله تشترك وتقدم حاجات حلوة كتير


تحياتى

ايمى

حسن حنفى يقول...

هههههههه

بوست جميل جدا

مستني اجابات التاج

EMMY BABY يقول...

حسن حنفى

ميرسى لمرورك

والحمد لله ان البوست عجبك

اما اجابات التاج فان شاء الله هحلها قريب

تحياتى

ايمى

سفروتة يقول...

ايمااااااااااااااااان

انا اللي مش عارفة اقولك ايه

بجد بجد والله عيشتيني الموقف كأني كنت معاكم

ربنا يجازيكم خير يارب

ويجعله في ميزان حسانتكم ان شاء الله

حاجة جميلة جداااااااااا ان الواحد يشعر انه بيعمل عمل خير ...وخصوصا لما يشوف الناس دي سعيدة قد ايه ...ده بيبقي اجمل

ربنا يكرمك يارب

Ahmed Hishmat يقول...

بسم الله الرحمن الرحيم :
(( فمن يعمل مثقال ذرة خيرا يره ،، ومن يعمل مثقال ذرة شرا يره ))
صدق الله العظيم
........................
أسعدتني زيارة مدونتك الفواحة بالخير
ويسعدني زيارتك لمدونتي المتواضعة
.......................
تحياتي
ولك كل الخير

Tamer Alhosiny يقول...

للاسف النت سامحه الله هو السبب في تاخر ردي علي البوست الي الان
رغم اني كلمت ايمان بس مش رضيت اني اقولها اي شيء يخص تعليقي
عن البوست ده ..........


عزيزتي ايمان
انا وانا اقراء البوست شعرت بسعادة وفرحة شديد ان هناك شباب مصري مثلك
من المتطوعين للخير ولرسم البسمة علي وجه الاخر
لقد نجحتي يا ايمان في ان تكوني شخصية ايجابية
فاعلة سباقة للخير
وانا سعيد بهذه التجربة وكلي ثقة انكي ان شاء الله
ستجعلين العمل التطوعي مكان هام بحياتك
ولذلك انا اتمني لكي كل الخير واتمني من كل قراء المدونة ان يحتزو حزو ايمان
وان يجعلو طريقهم الله الاخرة رسم البسمة علي شفاه المحتاجين في الدنيا

اما عن حالة الست الاي ذكرتيها يا ايمان فا انا اعرف حالة مشابهة والحمد لله حاولت رسم البسمة علي وجها وانارة بيتها الذي كانت تعيش فيه في ظلام الي ان توفاها الله رحمها الله
ولقد عوضني الله بنور في حياتي
اكرام لنور اضئته في حياة من يحتاجه

تحياتي لكي يا ايمان
واتمني ان تستمري وربنا معاكي
وكلنا هنشارك كل واحد بالصورة الاي يضمن بيها انه يكون ايجابي
تحياتي

تامر الحسيني
انسان عاشق حر

blue-wave يقول...

فعلا
فعل الخير له طعم جميل
اجمل من ان تحلم به
جزاكى الله كل الخير واعاننا على تقليدك

EMMY BABY يقول...

سفروتة حبيبة قلبى

كنت اتمنى فعلا تكونوا كلكم معايا والله كان يوم محتاجكم فعلا وتخيلتك يا سفروتة وانتى شايلة شنطة وماشية جنبى ههههههههههههههههههه

والله صعبتى عليا :))


جزانا واياك

ولعلمك لما تجربى الاحساس كمان اجمل كتير من الحكاية


تحياتى

ايمى

EMMY BABY يقول...

احمد حشمت

اسعدنى مرورك الكريم


ونورت المدونة

وربنا يكرمك على ذكر الاية الكريمة

وان شاء الله هزور مدونتك

تحياتى

ايمى

EMMY BABY يقول...

تامر الحسينى

ربنا يسامحه النت اللى اخر التعليق الحلو ده لحد دلوقتى

والله انا مش عارفة ارد على الكلام ده اقول ايه

ده كتير اوى عليا وكمان لو هنكلم على الايجابية فماشاء الله كلنا بناخد خطوات بس كل واحد بطريقته
يعنى انت ماشاء الله ايجابى جدا فى حياتك عامة

ربنا يكرمك وينولك كل اللى تتمناه


ربنا يجزيك على اللى قدمته للسيدة شوف كم الثواب اللى انت خدته

تحياتى

ايمى

EMMY BABY يقول...

بلو ويف ذو التعليق الصغير الذى لا يتعدى 3 اسطر


لا دى مش جملة ده اسمك الجديد :))


جزانا واياك يادكتور عمرو وربنا يرزقك بفعل الخير ويوقعه فى طريقك

تحياتى

ايمى ذات التعليق الكبير :))

abo salah يقول...

بعد السلام عليكم

بجد كلامك كله أدخل السرور إلى قلبى

كلامك وفرحتك وسرورك خلونى اتخيل أنى كنت معاكم وتذوقت فرحة فعل الخير وادخال السرور على الناس الغلابة دى

ربنا يجازيكى خير دايما
ودايما يقدرك على فعل الخير
ويجعله فى ميزان حسناتك
وربنا يديم عليكى سعادتك بفعل الخير

ويقدرنا احنا كمان على فعل الخير

تحياتى ليكى
وكل سنة وأنتى طيبة وأسرتك كلها بخير
وإلى الله أقرب

EMMY BABY يقول...

ابو صلاح

ياريتكم فعلا كنتم معانا فعلا

ربنا يجازيك خيرا ايضا ويرزقك بقافلة :))

ربنا يقدرك انت كمان على فعل الخير

وكل سنة وانت طيب وبصحة وسلامة


ورمضان كريم

تحياتى

ايمى

Elshaimaa يقول...

" متعة العطاء "

و الله فعلا متعة... مش مجرد عبارة

تخيلوا أما تيجى الحتة دى من الأرض يوم القيامة بإذن الله منورة... أثار خطواتك فى الخير معلمة فيها

أما تسيبى حتة من الأرض بعد ما غيرتيها بفضل الله للخير, يبقى:
" إن الله لا يغير ما بقوم حتى يغيروا ما بأنفسهم"
و يبقى نشوف بعنينا أثار العمل فيمنحنا الأمل فى حياتنا العملية

أما نشاط تطوعى واحد يبقى فيه كل ده ...

أمال باقى الانشطة هاتعمل ايه فى الواحد

الحمد لله الذى هدانا لهذا و ما كنا لنهتدى لولا أن هدانا الله :)

شكرااا يا إيمى على المتابعة

EMMY BABY يقول...

دكتورررررة شيماء

بجد والله العظيم فرحت جدا لما لاقيت كومنت منك لدرجة انى مصدقتش وقلت ممكن تشابه اسماء :))

طول عمرى فقيقة انتى عارفة

بجد كومنتك روعة فعلا والله متعة بجد انك تعمل خير

الحمد لله وان شاء الله هنروح مابعض برضه القافلة اللى جاية

تحياتى

ايمى

كرهتك يا مصر يقول...

بجد يعنى مصر بخير ؟؟؟؟؟؟

موش مصدق؟؟


مصر بخير ؟؟؟؟


عطاء ايه ومتعة ايه ؟؟؟


احنا كل يوم بنتسرق؟؟

والجمعيات دى اغلبها نصاب..انا بنفسى راسلت جمعية رسالة ولا حد حتى رد عليا بكلمة ..


انا خلا ص كل يوم بكره البلد دى

EMMY BABY يقول...

كرهتك يامصر

لا فعلا لسة فى خير كتير

صدقنى لو كنت معانا يوم القافلة دى

لما القافلة يطلع فيها 350 متطوع شباب وناس كبار حتى المكفوفين يبقى اكيد لسة فى خير

وكمان اخبار رسالة مالية النت انا عرفت الاخبار عن طريق النت

وعلى العموم ياسيدى لو فى اى قافلة تانى هبعت اقلك واكتبها عندى هنا


نورت المدونة

وخليك اكثر تفاءل وانوى فعلا خير بجد ربنا هييسرهولك

انك لاتهدى من احببت ولكن الله يهدى من يشاء

تحياتى

ايمى

شفـقــة و إحســــان يقول...

جزاكم الله الف خير
ربنا يجعله فى ميزان حسناتكم
كل سنة وانتى طيبة

EMMY BABY يقول...

جزانا واياكم

بجد انا سعيدة بمروركم لمدونتى

وكل سنة وانتم طيبين وكل الامة الاسلامية طيبة

تحياتى

ايمى

مـجـنـووون يقول...

ربنا يتقبل منك كل حركة وكل سكنه في سبيله

بس مقولتيش الجمعية إلي هي بتوزع الحاجات دي تبع أيه بالظبط ، علشان اأبقي أديكم عنواني علشان تعملوا حسابي في الزيارة إلي جايه هههههههههه

مجنوووون <<<<<<<<< عمره ما شاف اللحمة
تقبلي مروري
مجنووون

EMMY BABY يقول...

ههههههههههههههههههه

ده انا هوصيهم مخصوص محدش يقلك العنوان

يا مجنون

ربنا يتقبل منا ومنكم

نورت المدونة

بس اتقبل مرورك ازاى قبل ماتدفع جمارك المرور :))

تحياتى


ايمى

Hidden يقول...

Emmy


انا مدون جديد وعارف إن إشادتي بفكرك و عذوبة حديثك مهما بلغت فلن تصل إلى القدر الذي تستقه مدونه مثلك

و بجد المدونه رائعه و إحساسك المرهف احسن ما فيها

فعلا بجد و حقيقي الناس اللي محتاجه المساعده ف الدنيا كتير اكتر من الهم ع القلب بس اللي بيساعدوا فعلا قليلين
مش عاوز اقول قليلين
لدرجة إن فيه ناس ممكن تموت من الجوع
لدرجة إن فيه ناس بتأضى عمرها مستنيه العلاج اللي مبيجيش
لدرجة إن فيه ناس مشلاقيه مأوى اساسا
مش قريه و هنساعدهم
لدرجة إني ساعات بفقد الأمل ف التحسن
بجد الكلام كتير و انا مش عارف هو البلد حالها بيحصلوا إيه


آسف ع الإطاله تقبلوا مروري و ياريت نلاقي بينا منك كتير

تحياتي

محمد

EMMY BABY يقول...

اهلا يا محمد

والله مش عارفة اقلك ايه على الكلام ده

ده فعلا من ذوقك ودايما الجميل بتكون عينه بتشوف الناس زيه

فعلا فى ناس كتير محتاجة رعاية وماوى ربنا يتولاهم بس احنا فى ايدينا نساعدهم كل واحد فينا لازم يساعد حتى لو بمجهوده بس

وماعلينا الا الدعاء

ربنا يكرمك

كل سنة وانت طيب ورمضان كريم

تحياتى

ايمى